حضرت عائشہ رضی اللہ عنہا سے روایت ہے انہوں نے فرمایا: ”کچھ اعرابی نبی صلی اللہ علیہ وسلم کی خدمت میں حاضر ہوئے اور انہوں نے کہا: ”کیا تم لوگ اپنے بچوں کو چومتے ہو؟“ صحابہ کرام رضی اللہ عنہم نے کہا: ”ہاں۔“ انہوں نے کہا: ”لیکن قسم ہے اللہ کی! ہم تو (اپنے بچوں کو) نہیں چومتے۔“ نبی صلی اللہ علیہ وسلم نے فرمایا: ”یہ میرے اختیار کی بات تو نہیں جب اللہ نے تمہارے اندر سے رحم کا جذبہ سلب کر لیا ہے۔““ [سنن ابن ماجه/كتاب الأدب/حدیث: 3665]

حضرت یعلی (بن مرہ) عامری رضی اللہ عنہ سے روایت ہے، انہوں نے کہا: حضرت حسن اور حضرت حسین رضی اللہ عنہما دوڑے دوڑے نبی صلی اللہ علیہ وسلم کے پاس آئے، آپ صلی اللہ علیہ وسلم نے انہیں سینے سے لگا لیا اور فرمایا: ”اولاد بخل اور بزدلی کا باعث ہے۔“ [سنن ابن ماجه/كتاب الأدب/حدیث: 3666]

حضرت سراقہ بن مالک رضی اللہ عنہ سے روایت ہے، نبی صلی اللہ علیہ وسلم نے فرمایا: ”کیا میں تمہیں سب سے افضل صدقہ نہ بتاؤں؟ تیری بیٹی جو (بیوہ ہو کر یا طلاق ہو جانے کی وجہ سے) تیرے پاس واپس آ جائے، اور تیرے سوا اس کا کوئی کمانے والا نہ ہو۔“ (اس کے اخراجات برداشت کرنا افضل صدقہ ہے)۔ [سنن ابن ماجه/كتاب الأدب/حدیث: 3667]

حضرت احنف بن قیس بن معاویہ رحمہ اللہ کے چچا حضرت صعصہ بن معاویہ تیمی رضی اللہ عنہ سے روایت ہے، انہوں نے فرمایا: ”حضرت عائشہ رضی اللہ عنہا کے پاس ایک عورت آئی، اس کے ساتھ اس کی دو بیٹیاں تھیں، ام المؤمنین رضی اللہ عنہا نے اسے تین کھجوریں دیں (اس وقت وہی میسر تھیں) اس نے دونوں بیٹیوں کو ایک ایک کھجور دی، پھر بچی ہوئی (تیسری کھجور) بھی دو ٹکڑے کرکے ان (بچیوں) کو دے دی۔ (بعد میں) نبی صلی اللہ علیہ وسلم تشریف لائے تو ام المؤمنین رضی اللہ عنہا نے یہ واقعہ عرض کیا، رسول اللہ صلی اللہ علیہ وسلم نے فرمایا: ”تعجب کیوں کرتی ہو؟ وہ عورت اس عمل کی وجہ سے جنت میں داخل ہوگئی ہے۔““ [سنن ابن ماجه/كتاب الأدب/حدیث: 3668]

حضرت عقبہ بن عامر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس کی تین بیٹیاں ہوں، وہ ان پر صبر کرے، جو کچھ میسر ہو اس میں سے انہیں کھلائے، پلائے اور پہنائے، قیامت کے دن وہ اس کے لیے جہنم سے رکاوٹ بن جائیں گی۔“ [سنن ابن ماجه/كتاب الأدب/حدیث: 3669]

حضرت عبداللہ بن عباس رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس شخص کی دو بیٹیاں جوان ہو جائیں اور وہ ان سے اس وقت تک اچھا سلوک کرتا رہے جب تک وہ اس کے ساتھ رہیں، یا جب تک وہ ان کے ساتھ رہے، وہ اسے جنت میں ضرور داخل کر دیں گی۔“ [سنن ابن ماجه/كتاب الأدب/حدیث: 3670]

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اپنی اولاد کی عزت نفس کا خیال رکھو، اور انہیں اچھے آداب (واخلاق) سکھاؤ۔“ [سنن ابن ماجه/كتاب الأدب/حدیث: 3671]