امام صاحب رحمہ اللہ مذکورہ بالا روایت مختلف اساتذہ سے بیان کرتے ہیں۔ [صحيح مسلم/كتاب الحيض/حدیث: 799]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے اپنے کپڑے پہنے، پھر نماز کے لیے نکلے تو آپ صلی اللہ علیہ وسلم کو روٹی اور گوشت کا تحفہ پیش کیا گیا، آپ صلی اللہ علیہ وسلم نے تین لقمے تناول فرمائے، پھر لوگوں کو نماز پڑھائی اور پانی کو ہاتھ نہیں لگایا۔ [صحيح مسلم/كتاب الحيض/حدیث: 800]

محمد بن عمرو بن عطاء رحمہ اللہ بیان کرتے ہیں کہ میں ابن عباس رضی اللہ عنہما کے ساتھ تھا، پھر اوپر والی حدیث بیان کی اور اس میں ہے کہ ابن عباس رضی اللہ عنہما نے نبی کریم صلی اللہ علیہ وسلم کو یہ کام کرتے دیکھا اور کہا: ”آپ صلی اللہ علیہ وسلم نے نماز پڑھی“، یہ نہیں کہا ”لوگوں کو نماز پڑھائی“۔ [صحيح مسلم/كتاب الحيض/حدیث: 801]

حضرت جابر بن سمرہ رضی اللہ عنہ سے روایت ہے کہ ایک آدمی نے رسول اللہ صلی اللہ علیہ وسلم سے پوچھا: کیا میں بکری کے گوشت سے وضو کروں؟ آپ صلی اللہ علیہ وسلم نے فرمایا: ”تیری مرضی ہے، چاہو تو کر لو اور چاہو تو وضو نہ کرو۔“ اس نے پوچھا: اونٹ کے گوشت سے وضو کروں؟ آپ صلی اللہ علیہ وسلم نے فرمایا: ”ہاں، اونٹ کے گوشت کے کھانے کے بعد وضو کر۔“ اس نے پوچھا: کیا بکریوں کے باڑے میں نماز پڑھ لوں؟ آپ صلی اللہ علیہ وسلم نے فرمایا: ”ہاں۔“ اس نے پوچھا: اونٹوں کے بٹھانے کی جگہ پڑھ لوں؟ آپ صلی اللہ علیہ وسلم نے فرمایا: ”نہیں۔“ [صحيح مسلم/كتاب الحيض/حدیث: 802]

امام صاحب رحمہ اللہ اپنے مختلف اساتذہ سے مذکورہ بالا روایت بیان کرتے ہیں۔ [صحيح مسلم/كتاب الحيض/حدیث: 803]

سعید رحمہ اللہ اور عباد بن تمیم رحمہ اللہ اپنے چچا سے روایت کرتے ہیں کہ نبی کریم صلی اللہ علیہ وسلم سے ایک انسان کے بارے میں شکایت کی گئی کہ اسے نماز میں یہ خیال آتا ہے کہ وضو ٹوٹ گیا ہے، آپ صلی اللہ علیہ وسلم نے فرمایا: ”اس وقت تک نماز نہ توڑے، جب تک اسے (ہوا نکلنے کی) آواز سنائی نہ دے یا اسے بدبو محسوس نہ ہو۔“ [صحيح مسلم/كتاب الحيض/حدیث: 804]

حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب تم میں سے کسی ایک کو اپنے پیٹ میں گڑبڑ محسوس ہو اور اسے اشتباہ پیدا ہو جائے کہ اس کے پیٹ سے کچھ نکلا ہے یا نہیں تو ہرگز اس وقت تک مسجد سے نہ نکلے، جب تک ریح کی آواز یا بدبو محسوس نہ کرے۔“ [صحيح مسلم/كتاب الحيض/حدیث: 805]

ہمیں یحییٰ بن یحییٰ رحمہ اللہ، ابوبکر بن ابی شیبہ رحمہ اللہ، عمرو ناقد رحمہ اللہ اور ابن ابی عمر رحمہ اللہ سب نے، ابن عیینہ رحمہ اللہ سے روایت سنائی، یحییٰ رحمہ اللہ نے کہا، ہمیں سفیان بن عیینہ رحمہ اللہ نے زہری رحمہ اللہ سے، عبیداللہ بن عبداللہ رحمہ اللہ کی ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ایسی بکری مردہ پائی جو حضرت میمونہ رضی اللہ عنہا کی آزاد کردہ لونڈی کو صدقہ میں دی گئی تھی، تو رسول اللہ صلی اللہ علیہ وسلم نے فرمایا: ”تم نے اس کا چمڑا لے کر اسے رنگ کیوں نہ لیا اور اس سے فائدہ کیوں نہیں اٹھایا؟“ انہوں نے کہا: یہ مردہ ہے، تو آپ صلی اللہ علیہ وسلم نے فرمایا: ”بس اس کا کھانا حرام ہے۔“ ابوبکر رحمہ اللہ اور ابن ابی عمر رحمہ اللہ نے اپنی روایت میں «عَنْ ابْنِ عَبَّاسٍ، عَنْ مَيْمُونَةَ» کہا (روایت ابن عباس رضی اللہ عنہما کی بجائے میمونہ رضی اللہ عنہا کی طرف منسوب کی)۔ [صحيح مسلم/كتاب الحيض/حدیث: 806]

مجھے ابوطاہر رحمہ اللہ اور حرملہ رحمہ اللہ نے ابن وہب رحمہ اللہ کے واسطہ سے یونس رحمہ اللہ کی ابن شہاب رحمہ اللہ سے، انہوں نے عبیداللہ بن عبداللہ بن عتبہ رحمہ اللہ سے اور انہوں نے ابن عباس رضی اللہ عنہما سے روایت سنائی کہ حضرت میمونہ رضی اللہ عنہا کی آزاد کردہ لونڈی کو ایک بکری صدقہ میں ملی تھی، وہ مر گئی تو رسول اللہ صلی اللہ علیہ وسلم اس کے پاس سے گزرے تو آپ صلی اللہ علیہ وسلم نے فرمایا: ”تم نے اس کا چمڑا کیوں نہیں اتارا تو تم اسے رنگ لیتے اور اس سے تم فائدہ اٹھا لیتے؟“ انہوں نے کہا: وہ مردہ ہے، تو آپ صلی اللہ علیہ وسلم نے فرمایا: ”بس اس کا کھانا حرام ہے۔“ [صحيح مسلم/كتاب الحيض/حدیث: 807]

حسن حلوانی رحمہ اللہ اور عبد بن حمید رحمہ اللہ نے یعقوب بن ابراہیم بن سعد رحمہ اللہ سے، انہوں نے اپنے باپ رحمہ اللہ سے، انہوں نے صالح رحمہ اللہ سے اور انہوں نے ابن شہاب رحمہ اللہ کی مذکورہ بالا سند سے یونس رحمہ اللہ کی حدیث کے مفہوم والی روایت سنائی۔ [صحيح مسلم/كتاب الحيض/حدیث: 808]