حضرت عبداللہ بن انیس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مجھے شب قدر دکھائی گئی پھر بھلا دی گئی اور میں نے اس کی صبح اپنے آپ کو پانی اور مٹی میں سجدے کرتے دیکھا۔“ حضرت عبداللہ بن انیس رضی اللہ عنہ کہتے ہیں کہ تیئسویں کی رات ہم پر بارش برسی تو رسول اللہ صلی اللہ علیہ وسلم نے ہمیں نماز پڑھائی، آپ صلی اللہ علیہ وسلم جب نماز سے فارغ ہوئے تو پانی اور مٹی کا نشان آپ صلی اللہ علیہ وسلم کی پیشانی اور ناک پر موجود تھا، عبداللہ بن انیس رضی اللہ عنہ کہا کرتے تھے کہ شب قدر تیئسویں ہے۔ [صحيح مسلم/كتاب الصيام/حدیث: 2775]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”شب قدر کو رمضان کی آخری دس راتوں کی طاق راتوں میں تلاش کرو۔“ ابن نمیر نے «الْتَمِسُوهَا» کہا اور وکیع نے «تَحَرَّوْا» کہا۔ [صحيح مسلم/كتاب الصيام/حدیث: 2776]

زر بن حبیش رحمہ اللہ سے روایت ہے کہ میں نے ابی بن کعب رضی اللہ عنہ سے پوچھا کہ آپ کے بھائی عبداللہ بن مسعود رضی اللہ عنہ کہتے ہیں: ”جو پورے سال کی راتوں میں کھڑا ہو گا (سال کی ہر رات قیام کرے گا) اس کو شب قدر نصیب ہو گی“ تو انہوں نے فرمایا: ”عبداللہ (رضی اللہ عنہ) پر اللہ تعالیٰ رحمت فرمائے، ان کا مقصد یہ تھا کہ لوگ (کسی ایک رات کے قیام) پر اعتماد و قناعت نہ کر لیں، ورنہ ان کو خوب پتہ تھا کہ شب قدر رمضان میں ہے اور اس کے بھی آخری عشرہ میں، اور وہ ستائیسویں (27) رات ہے“ پھر انہوں نے (پوری قطعیت کے ساتھ) بغیر «إِنْ شَاءَ اللّٰهُ» کہے قسم کھا کر کہا: ”وہ ستائیسویں رات ہی ہے“ تو میں نے دریافت کیا: ”اے ابوالمنذر! (حضرت ابی کی کنیت ہے) یہ آپ کس بنا پر کہتے ہیں؟“ انہوں نے کہا: ”اس علامت یا نشانی کی بنا پر کہتا ہوں جس کی رسول اللہ صلی اللہ علیہ وسلم نے ہمیں خبر دی تھی، اور وہ یہ کہ شب قدر کی صبح کو جب سورج نکلتا ہے تو اس کی شعاع نہیں ہوتی۔“ [صحيح مسلم/كتاب الصيام/حدیث: 2777]

زر بن حبیش رحمہ اللہ کہتے ہیں کہ حضرت ابی رضی اللہ عنہ نے شبِ قدر کے بارے میں کہا: ”اللہ تعالیٰ کی قسم! میں اسے جانتا ہوں۔“ شعبہ کی روایت میں ہے کہ انہوں نے کہا: ”مجھے زیادہ یقین (ظنِ غالب) اس بات پر ہے کہ یہی وہ رات ہے جس میں رسول اللہ صلی اللہ علیہ وسلم نے قیام کا حکم دیا اور یہ ستائیسویں رات ہے۔“ ان الفاظ میں شک شعبہ کو ہے کہ ”یہ وہی رات ہے جس کے قیام کا ہمیں رسول اللہ صلی اللہ علیہ وسلم نے حکم دیا تھا“، شعبہ کہتے ہیں: ”یہ الفاظ میرے ایک ساتھی نے استاد سے نقل کیے تھے۔“ [صحيح مسلم/كتاب الصيام/حدیث: 2778]

حضرت ابو ہریرہ رضی اللہ عنہ سے روایت ہے کہ ایک دن رسول اللہ صلی اللہ علیہ وسلم کے سامنے ہم نے لیلة القدر کا باہمی تذکرہ کیا تو آپ صلی اللہ علیہ وسلم نے فرمایا: ”کس کو یاد ہے کہ شبِ قدر اس رات میں ہے جس کی صبح چاند طشت کے ایک ٹکڑے کی طرح طلوع ہوتا ہے۔“ [صحيح مسلم/كتاب الصيام/حدیث: 2779]