سیدنا ابوہریرہ رضی اللہ عنہ نے بیان کیا کہ ہم رسول اللہ صلی اللہ علیہ وسلم کے پاس بیٹھے ہوئے تھے کہ سورۃ الجمعہ کی یہ آیتیں نازل ہوئیں: ﴿وَآخَرِينَ مِنْهُمْ لَمَّا يَلْحَقُوا بِهِمْ﴾ [سورة الجمعة: 3] ”اور دوسروں کے لیے بھی (آنسیدنا صلی اللہ علیہ وسلم ہادی اور معلم ہیں) جو ابھی ان میں شامل نہیں ہوئے ہیں۔“ سیدنا ابوہریرہ رضی اللہ عنہ کہتے ہیں میں نے عرض کی: ”یا رسول اللہ! یہ دوسرے کون لوگ ہیں؟“ آنسیدنا صلی اللہ علیہ وسلم نے کوئی جواب نہیں دیا۔ آخر یہی سوال تین مرتبہ کیا۔ مجلس میں سیدنا سلمان فارسی رضی اللہ عنہ بھی موجود تھے، آنسیدنا صلی اللہ علیہ وسلم نے ان پر ہاتھ رکھ کر فرمایا: ”اگر ایمان ثریا پر بھی ہوگا تب بھی ان لوگوں (یعنی فارس والوں) میں سے اس تک پہنچ جائیں گے۔“ یا یوں فرمایا کہ ”ایک آدمی ان لوگوں میں سے اس تک پہنچ جائے گا۔“ [اللؤلؤ والمرجان/كتاب فضائل الصحابة/حدیث: 1650]

عبداللہ بن عمر رضی اللہ عنہما نے بیان کیا کہ میں نے رسول اللہ صلی اللہ علیہ وسلم سے سنا، نبی مکرم صلی اللہ علیہ وسلم نے فرمایا: ”لوگوں کی مثال اونٹوں کی سی ہے، سو اونٹوں میں بھی ایک تیز سواری کے قابل نہیں ملتا۔“ [اللؤلؤ والمرجان/كتاب فضائل الصحابة/حدیث: 1651]