حضرت عبد اللہ بن ابی بکر فرماتے ہیں کہ میں نے حضرت عروہ بن زبیر کو اپنے والد سے بیان کرتے ہوئے سنا کہ مروان نے مجھ سے مسِّ ذکر کا تذکرہ کیا تو میں نے کہا کہ اس میں وضو نہیں ہے۔ وہ کہنے لگے کہ بسرہ بنت صفوان نے اس بارے میں حدیث بیان کی ہے۔ پھر انہوں نے بسرہ کی طرف ایک قاصد بھیجا جس نے آ کر بتایا کہ وہ بیان کرتی ہیں کہ رسول اللہ صلی اللہ علیہ وآلہ وسلم نے ارشاد فرمایا کہ جس شخص نے اپنے آلۂ تناسل کو ہاتھ لگایا وہ وضو کرے۔ [مصنف ابن ابي شيبه/كتاب الطهارة/حدیث: 1741]

حضرت ابن سیرین فرماتے ہیں کہ میں نے حضرت عبیدہ سے اللہ تعالیٰ کے قول { أَوْ لاَمَسْتُمُ النِّسَائَ } کے بارے میں سوال کیا تو انہوں نے اپنے ہاتھ سے اشارہ کیا، میں سمجھ گیا کہ وہ کیا کہنا چاہتے ہیں پس میں نے ان سے سوال نہیں کیا۔ ابن سیرین فرماتے ہیں کہ مجھے بتایا گیا کہ حضرت ابن عمر رضی اللہ عنہما جب شرم گاہ کو ہاتھ لگاتے وضو کیا کرتے تھے۔ محمد فرماتے ہیں کہ میرا خیال یہ ہے کہ حضرت ابن عمر رضی اللہ عنہما اور حضرت عبیدہ کا قول ایک ہی ہے۔ [مصنف ابن ابي شيبه/كتاب الطهارة/حدیث: 1742]

حضرت جابر بن زید فرماتے ہیں کہ جب کوئی شخص جان بوجھ کر شرم گاہ کو ہاتھ لگائے تو وضو کا اعادہ کرے۔ [مصنف ابن ابي شيبه/كتاب الطهارة/حدیث: 1743]

حضرت مکحول فرماتے ہیں کہ جب کوئی شخص شرم گاہ کو ہاتھ لگائے تو وضو کرے۔ [مصنف ابن ابي شيبه/كتاب الطهارة/حدیث: 1744]

حضرت مکحول فرماتے ہیں کہ جب کوئی شخص اپنی شرم گاہ کو پکڑے تو وضو کرے۔ [مصنف ابن ابي شيبه/كتاب الطهارة/حدیث: 1745]

حضرت سعید بن مسیب فرماتے ہیں کہ جو شخص شرم گاہ کو ہاتھ لگائے تو اس پر وضو واجب ہے۔ [مصنف ابن ابي شيبه/كتاب الطهارة/حدیث: 1746]

حضرت مصعب بن سعد فرماتے ہیں کہ میں اپنے والد کے لیے قرآن مجید (کا نسخہ) پکڑا کرتا تھا، ایک مرتبہ میں نے اپنا ہاتھ اس طرح اندر کیا یعنی شرم گاہ کو ہاتھ لگایا تو انہوں نے مجھے وضو کرنے کا حکم دیا۔ [مصنف ابن ابي شيبه/كتاب الطهارة/حدیث: 1747]

حضرت نافع فرماتے ہیں کہ ایک دن حضرت ابن عمر رضی اللہ عنہما نے چاشت کے وقت (فجر کی) نماز (دوبارہ) پڑھی اور فرمایا کہ میں نے (فجر سے پہلے) شرم گاہ کو ہاتھ لگایا تھا لیکن میں بھول گیا (اس لیے فجر کی نماز وضو کیے بغیر پڑھ لی چناچہ اب دوبارہ پڑھ رہا ہوں)۔ [مصنف ابن ابي شيبه/كتاب الطهارة/حدیث: 1748]

حضرت نافع فرماتے ہیں کہ حضرت ابن عمر رضی اللہ عنہما شرم گاہ کو ہاتھ لگانے کے بعد دوبارہ وضو کیا کرتے تھے۔ [مصنف ابن ابي شيبه/كتاب الطهارة/حدیث: 1749]

حضرت عطاء اور حضرت مجاہد فرماتے ہیں کہ جس نے شرم گاہ کو چھوا وہ وضو کرے۔ [مصنف ابن ابي شيبه/كتاب الطهارة/حدیث: 1750]