حضرت ابو موسیٰ فرماتے ہیں کہ میں حضرت ابن سیرین کے ساتھ ایک راستے سے گذرا، ان پر ایک پرنالے کا پانی گرا تو انہوں نے اس کے بارے میں سوال کیا۔ آپ کو بتایا گیا کہ یہ پاک ہے تو آپ نے اس پانی کی کوئی پرواہ نہ کی۔ [مصنف ابن ابي شيبه/كتاب الطهارة/حدیث: 2061]

حضرت عبداللہ رومی فرماتے ہیں کہ حضرت عثمان رات کو اٹھتے تو اپنے وضو کا پانی خود اٹھاتے تھے۔ ان سے کسی نے کہا کہ اپنے کسی خادم کو اس کا حکم دے دیں تو فرمایا مجھے یہ پسند ہے کہ میں اپنے وضو کا پانی خود اٹھاؤں۔ [مصنف ابن ابي شيبه/كتاب الطهارة/حدیث: 2062]

حضرت عباس بن عبدالرحمن مدنی فرماتے ہیں کہ رسول اللہ صلی اللہ علیہ وآلہ وسلم دو کاموں کو خود سر انجام دیتے تھے۔ ایک یہ کہ مسکین کو اپنے ہاتھ سے دیتے تھے اور دوسرا یہ کہ رات کو وضو کا پانی خود رکھتے اور اسے ڈھکتے تھے۔ [مصنف ابن ابي شيبه/كتاب الطهارة/حدیث: 2063]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ دس چیزیں فطرت کا حصہ ہیں۔ مونچھیں تراشنا، داڑھی بڑھانا، مسواک کرنا، پانی سے ناک صاف کرنا، ناخن کاٹنا، انگلیوں کے جوڑوں کو دھونا، بغل کے بال اکھیڑنا، زیر ناف بال صاف کرنا اور پانی سے استنجا کرنا۔ راوی حضرت مصعب کہتے ہیں کہ میں دسویں خصلت بھول گیا اور غالباً وہ کلی کرنا ہوگی۔ [مصنف ابن ابي شيبه/كتاب الطهارة/حدیث: 2064]

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا کہ پانچ چیزیں فطرت کا حصہ ہیں، ختنے کرنا، زیر ناف بالوں کو استرے سے صاف کرنا، ناخن تراشنا، بغل کے بال اکھیڑنا، مونچھیں کاٹنا۔ [مصنف ابن ابي شيبه/كتاب الطهارة/حدیث: 2065]

حضرت عمار بن یاسر فرماتے ہیں کہ رسول اللہ صلی اللہ علیہ وآلہ وسلم نے فرمایا کہ فطرت کی خصلتیں یہ ہیں، کلی کرنا، ناک صاف کرنا، مسواک کرنا، مونچھیں تراشنا، بغل کے بال اکھیڑنا، انگلیوں کے جوڑ دھونا، ناخن تراشنا، پانی سے استنجا کرنا اور ختنے کرنا۔ [مصنف ابن ابي شيبه/كتاب الطهارة/حدیث: 2066]

حضرت مجاہد فرماتے ہیں کہ چھ چیزیں حضرت ابراہیم کی فطرت کا حصہ ہیں، مونچھیں تراشنا، مسواک کرنا، بالوں کی مانگ نکالنا، ناخن کاٹنا، استنجا کرنا اور زیر ناف بالوں کو مونڈھنا۔ تین کا تعلق سر سے اور تین کا تعلق باقی جسم سے ہے۔ [مصنف ابن ابي شيبه/كتاب الطهارة/حدیث: 2067]

حضرت شعبی فرماتے ہیں کہ شیطان کی طرف سے ایک تری ہوتی ہے یعنی وہ آلۂ تناسل کے سوراخ کو تر کر کے وسوسہ ڈالتا ہے۔ [مصنف ابن ابي شيبه/كتاب الطهارة/حدیث: 2068]

ابراہیم فرماتے ہیں کہ جو انسان بھی اسے کھوج کر دیکھتا ہے وہ ضرور ایسی چیز دیکھتا ہے جو اسے ناپسند ہو یا اسے پریشان کرے، یعنی آلۂ تناسل کے سوراخ کی تری۔ [مصنف ابن ابي شيبه/كتاب الطهارة/حدیث: 2069]

حضرت منصور فرماتے ہیں کہ شیطان ذکر کے سوراخ کو تر کردیتا ہے۔ [مصنف ابن ابي شيبه/كتاب الطهارة/حدیث: 2070]