حضرت حارث بن مالک کہتے ہیں کہ میں حضرت حسن کے گھر میں ان کے پاس موجود تھا کہ ایک آدمی آیا اور اس نے سوال کیا کہ اگر ایک آدمی کسی کپڑے میں رات گذارے اور صبح اس کے کپڑوں پر پسو کا بہت سا خون لگا ہو تو کیا وہ اسے دھوئے، یا اس پر پانی چھڑکے یا انہی میں نماز پڑھ لے؟ فرمایا کہ نہ اس پر پانی چھڑکے، نہ اسے دھوئے بلکہ اسی حال میں نماز پڑھ لے۔ [مصنف ابن ابي شيبه/كتاب الطهارة/حدیث: 2041]

حسن فرماتے ہیں کہ مچھلی کے خون میں کوئی حرج نہیں البتہ اگر تمہیں برا لگے تو علیحدہ بات ہے۔ [مصنف ابن ابي شيبه/كتاب الطهارة/حدیث: 2042]

حضرت عطاء فرماتے ہیں کہ اگر تمہیں شکار کا خون لگ جائے تو اسے دھو لو۔ [مصنف ابن ابي شيبه/كتاب الطهارة/حدیث: 2043]

حضرت حسن (اس شخص کے بارے میں جس نے تیمم کیا ہو اور وہ پانی کے پاس سے گذرے لیکن اسے وضو کی احتیاج نہ ہو چناچہ وہ بغیر وضو کئے گذر جائے، پھر نماز کا وقت آئے لیکن اس کے پاس پانی نہ ہو) فرماتے ہیں کہ وہ دوبارہ تیمم کرے، اس لئے کہ پانی پر قدرت پہلے تیمم کو توڑ دے گی۔ [مصنف ابن ابي شيبه/كتاب الطهارة/حدیث: 2044]

حضرت حسن فرماتے ہیں کہ قے، شراب اور خون کے کپڑوں پر لگنے کا ایک حکم ہے۔ [مصنف ابن ابي شيبه/كتاب الطهارة/حدیث: 2045]

حضرت مجاہد فرماتے ہیں کہ اگر تمہارے کپڑوں پر شراب لگ جائے تو اسے دھو لو، کیونکہ یہ خون سے زیادہ بری ہے۔ [مصنف ابن ابي شيبه/كتاب الطهارة/حدیث: 2046]

حضرت حسن اور حضرت ابن سیرین فرماتے ہیں کہ جنبی اور حائضہ مسجد میں پانی چھڑک سکتے ہیں۔ [مصنف ابن ابي شيبه/كتاب الطهارة/حدیث: 2047]

حضرت انس رضی اللہ عنہ فرماتے ہیں کہ ایک مرتبہ ایک دیہاتی نے مسجد میں پیشاب کردیا تو حضور صلی اللہ علیہ وآلہ وسلم نے پانی کا ڈول منگوا کر اس پر بہایا۔ [مصنف ابن ابي شيبه/كتاب الطهارة/حدیث: 2048]

حضرت قیس فرماتے ہیں کہ ایک مرتبہ ایک دیہاتی نے مسجد میں پیشاب کیا تو حضور صلی اللہ علیہ وآلہ وسلم نے اس پر پانی بہانے کا حکم دیا۔ [مصنف ابن ابي شيبه/كتاب الطهارة/حدیث: 2049]

حضرت ابوہریرہ فرماتے ہیں کہ ایک دیہاتی حضور صلی اللہ علیہ وآلہ وسلم کی موجودگی میں مسجد میں داخل ہوا اور اس نے پیشاب کردیا، آپ نے پانی کا ڈول منگوا کر اس پر بہا دیا۔ [مصنف ابن ابي شيبه/كتاب الطهارة/حدیث: 2050]