حضرت ابو جعفر، حضرت عامر اور حضرت عطاء فرماتے ہیں کہ خون کو تھوک سے نہیں دھویا جائے گا۔ [مصنف ابن ابي شيبه/كتاب الطهارة/حدیث: 2091]

حضرت نافع فرماتے ہیں کہ حضرت ابن عمر رضی اللہ عنہما نے اپنے کپڑوں پر خون کا نشان دیکھا تو اسے دھو دیا، لیکن اس پر سیاہ نشان باقی رہ گیا۔ آپ نے قینچی منگوا کر اسے کاٹ دیا۔ [مصنف ابن ابي شيبه/كتاب الطهارة/حدیث: 2092]

حضرت شعبی فرماتے ہیں کہ جب تم خون کو دھو دو تو اس کا نشان باقی رہ جانے میں کوئی مضائقہ نہیں۔ [مصنف ابن ابي شيبه/كتاب الطهارة/حدیث: 2093]

حضرت حسن سے بھی یونہی منقول ہے۔ [مصنف ابن ابي شيبه/كتاب الطهارة/حدیث: 2094]

حضرت عائشہ رضی اللہ عنہا سے ایک عورت نے سوال کیا کہ اگر حیض کا خون کپڑوں پر لگ جائے تو کیا حکم ہے؟ فرمایا اسے دھو لو، اس عورت نے سوال کیا کہ میں اسے دھوتی ہوں لیکن اس کا داغ نہیں جاتا؟ حضرت عائشہ رضی اللہ عنہا نے فرمایا کہ اسے دھو لو، پانی پاکی کا ذریعہ ہے۔ [مصنف ابن ابي شيبه/كتاب الطهارة/حدیث: 2095]

حضرت حسن اس شخص کے بارے میں جسے بیٹھے بیٹھے بےہوشی طاری ہوجائے فرماتے ہیں کہ وہ وضو کرے گا۔ [مصنف ابن ابي شيبه/كتاب الطهارة/حدیث: 2096]

ابراہیم فرماتے ہیں کہ جب (بےہوشی یا دورے میں) مبتلا شخص کو افاقہ ہو تو وہ وضو کرے۔ [مصنف ابن ابي شيبه/كتاب الطهارة/حدیث: 2097]

حضرت عبیداللہ بن عبداللہ کہتے ہیں کہ میں حضرت عائشہ رضی اللہ عنہا کی خدمت میں حاضر ہوا اور میں نے عرض کیا کہ مجھے رسول اللہ صلی اللہ علیہ وآلہ وسلم کے مرض الوفات کے بارے میں بتائیے۔ حضرت عائشہ رضی اللہ عنہا نے فرمایا کہ رسول اللہ صلی اللہ علیہ وآلہ وسلم کو مرض لاحق ہوا تو آپ کی طبیعت بہت بوجھل ہوگئی، پھر آپ پر بےہوشی طاری ہوگئی، جب افاقہ ہوا تو آپ نے فرمایا کہ میرے لئے بڑے برتن میں پانی رکھو۔ چناچہ ہم نے اس میں پانی رکھا اور آپ نے غسل فرمایا۔ آپ بڑی مشکل سے اٹھے، پھر آپ پر بےہوشی طاری ہوگئی، جب افاقہ ہوا تو آپ نے فرمایا کہ میرے لئے بڑے برتن میں پانی رکھو، ہم نے ایسا ہی کیا۔ آپ نے پھر غسل کیا اور بڑی مشکل سے اٹھے، آپ پر پھر بےہوشی طاری ہوگئی۔ پھر افاقہ ہوا تو آپ نے فرمایا کہ میرے لئے پانی رکھو۔ چناچہ آپ نے پھر غسل فرمایا اور ایسا کئی مرتبہ کیا۔ [مصنف ابن ابي شيبه/كتاب الطهارة/حدیث: 2098]

حضرت موسیٰ بن طلحہ فرماتے ہیں کہ حضرت عثمان روزانہ غسل کیا کرتے تھے۔ [مصنف ابن ابي شيبه/كتاب الطهارة/حدیث: 2099]

حضرت علی رضی اللہ عنہ فرماتے ہیں کہ میں یخ بستہ رات میں بھی غسل کرتا ہوں۔ [مصنف ابن ابي شيبه/كتاب الطهارة/حدیث: 2100]