حضرت ابو امامہ بن سہل فرماتے ہیں کہ اسلاف آلۂ تناسل کے سوراخ کے گیلا ہونے کی بہت زیادہ پرواہ نہ کرتے تھے۔ [مصنف ابن ابي شيبه/كتاب الطهارة/حدیث: 2071]

حضرت عمرو بن مرہ فرماتے ہیں کہ شیطان کے وسوسے سب سے زیادہ اسی کے پیچھے پڑتے ہیں جو یہ سمجھتا ہے کہ وہ اس پر اثر کر رہے ہیں۔ [مصنف ابن ابي شيبه/كتاب الطهارة/حدیث: 2072]

حضرت طاؤس فرماتے ہیں کہ اپنے آلۂ تناسل کو دیکھتے ہی کیوں ہو؟ [مصنف ابن ابي شيبه/كتاب الطهارة/حدیث: 2073]

حضرت ابو امامہ بن سہل فرماتے ہیں کہ جو آدمی بھی اپنے آلۂ تناسل کو اس طرح کھوج کر دیکھتا ہے وہ ضرور ایسی چیز دیکھتا ہے جو اسے ناپسند ہو۔ [مصنف ابن ابي شيبه/كتاب الطهارة/حدیث: 2074]

حضرت ابن الزبیر فرماتے ہیں کہ شیطان انسان کے وضو، بالوں اور ناخنوں کی طرف سے آتا ہے۔ [مصنف ابن ابي شيبه/كتاب الطهارة/حدیث: 2075]

حضرت قیس بن سعد فرماتے ہیں کہ حضرت عطاء سے سوال کیا گیا کہ اگر کوئی آدمی وضو میں کلی کرنا یا ناک میں پانی ڈالنا بھول جائے تو کیا کرے؟ فرمایا کلی کرے، ناک میں پانی ڈالے اور دوبارہ نماز پڑھے۔ [مصنف ابن ابي شيبه/كتاب الطهارة/حدیث: 2076]

حضرت ابن عباس رضی اللہ عنہما فرماتے ہیں کہ جب آدمی نماز پڑھ لے اور وہ غسل جنابت میں کلی کرنا یا ناک میں پانی ڈالنا بھول گیا تھا تو دوبارہ کلی کرے اور ناک میں پانی ڈالے۔ [مصنف ابن ابي شيبه/كتاب الطهارة/حدیث: 2077]

حضرت عطاء فرماتے ہیں کہ اگر کوئی شخص کلی کرنا یا ناک میں پانی ڈالنا بھول جائے اور نماز پڑھ لے تو اس پر نماز کا اعادہ نہیں ہے۔ [مصنف ابن ابي شيبه/كتاب الطهارة/حدیث: 2078]

حضرت حسن اس شخص کے بارے میں جو کلی کرنا بھول جائے فرماتے ہیں کہ اگر اس نے نماز شروع کردی تو جاری رکھے اور اگر ابھی شروع نہیں کی تو کلی کرے اور ناک میں پانی ڈالے۔ [مصنف ابن ابي شيبه/كتاب الطهارة/حدیث: 2079]

حضرت ابراہیم فرماتے ہیں کہ اگر کوئی شخص کلی کرنا اور ناک میں پانی ڈالنا بھول جائے تو دوبارہ نماز پڑھے۔ [مصنف ابن ابي شيبه/كتاب الطهارة/حدیث: 2080]