حضرت شعبہ فرماتے ہیں کہ میں نے حضرت حکم، حضرت حماد اور حضرت قتادہ سے اس شخص کے بارے میں سوال کیا جو کلی کرنا اور ناک میں پانی ڈالنا بھول جائے یہاں تک کہ نماز میں کھڑا ہو جائے تو حضرت حکم اور حضرت قتادہ نے فرمایا کہ وہ نماز پڑھتا رہے حضرت حماد نے فرمایا کہ وہ نماز ختم کر دے۔ [مصنف ابن ابي شيبه/كتاب الطهارة/حدیث: 2081]

حضرت شعبی فرماتے ہیں کہ اگر کوئی شخص غسل جنابت میں کلی کرنا یا ناک میں پانی ڈالنا بھولا ہے تو وہ دوبارہ نماز پڑھے اور اگر وضو میں بھولا ہے تو کوئی حرج کی بات نہیں۔ [مصنف ابن ابي شيبه/كتاب الطهارة/حدیث: 2082]

حضرت حسن اس شخص کے بارے میں جو کلی کرنا اور ناک میں پانی ڈالنا بھول جائے اور نماز پڑھے فرماتے ہیں کہ اس میں کوئی حرج کی بات نہیں۔ [مصنف ابن ابي شيبه/كتاب الطهارة/حدیث: 2083]

حضرت ابراہیم فرماتے ہیں کہ ناک میں پانی ڈالنا واجب نہیں۔ [مصنف ابن ابي شيبه/كتاب الطهارة/حدیث: 2084]

حضرت حماد فرماتے ہیں کہ جب کوئی شخص کلی کرنا اور ناک میں پانی ڈالنا بھول جائے تو نماز کا اعادہ نہ کرے۔ [مصنف ابن ابي شيبه/كتاب الطهارة/حدیث: 2085]

حضرت منصور فرماتے ہیں کہ میں نے حضرت ابراہیم سے پوچھا کہ اگر ایک آدمی ناک میں پانی ڈالنا بھول جائے اور اسے نماز میں یاد آئے تو وہ کیا کرے؟ حضرت ابراہیم نے فرمایا کہ نماز پڑھتا رہے۔ حضرت منصور فرماتے ہیں کہ کلی کا بھی یہی حکم ہے۔ [مصنف ابن ابي شيبه/كتاب الطهارة/حدیث: 2086]

حضرت سعید بن جبیر فرماتے ہیں کہ ایک ام المومنین اپنے کپڑے پر لگے خون کو اپنے تھوک سے کھرچ دیا کرتی تھیں۔ [مصنف ابن ابي شيبه/كتاب الطهارة/حدیث: 2087]

حضرت یزید بن زیاد کہتے ہیں کہ حضرت حسن بن علی رضی اللہ عنہ نے اپنی قمیص پر خون دیکھا تو اس پر تھوک پھینک کر اسے رگڑ دیا۔ [مصنف ابن ابي شيبه/كتاب الطهارة/حدیث: 2088]

حضرت سلیط بن عبداللہ کہتے ہیں کہ حضرت ابن عمر رضی اللہ عنہما نے اپنے گریبان میں خون کا نشان دیکھا تو اس پر تھوک پھینک کر اسے رگڑ دیا۔ [مصنف ابن ابي شيبه/كتاب الطهارة/حدیث: 2089]

حضرت جعفر بن برقان کہتے ہیں کہ میں نے حضرت میمون بن مہران کو دیکھا کہ وہ نماز پڑھ رہے تھے اور دوران نماز انہوں نے اپنے کپڑوں پر خون کا نشان دیکھا تو اس پر تھوک پھینک کر اسے رگڑ دیا۔ [مصنف ابن ابي شيبه/كتاب الطهارة/حدیث: 2090]