حضرت ابو العالیہ فرماتے ہیں کہ رسول اللہ صلی اللہ علیہ وآلہ وسلم اپنے صحابہ کو نماز پڑھا رہے تھے کہ ایک نابینا آدمی آیا اور مسجد کے کنویں میں گرگیا۔ اس پر کچھ لوگ ہنسنے لگے، جب آپ نماز سے فارغ ہوئے تو آپ نے انہیں حکم دیا کہ وضو بھی دوبارہ کریں اور نماز بھی دوبارہ پڑھیں۔ [مصنف ابن ابي شيبه/كتاب الصلوات/حدیث: 3959]

حضرت عامر فرماتے ہیں کہ یہ فتنہ ہے، وضو اور نماز کا اعادہ کیا جائے گا۔ [مصنف ابن ابي شيبه/كتاب الصلوات/حدیث: 3960]

ابراہیم فرماتے ہیں کہ جب آدمی نماز میں ہنسا تو وہ وضو اور نماز دونوں کا اعادہ کرے گا۔ [مصنف ابن ابي شيبه/كتاب الصلوات/حدیث: 3961]

حضرت ابوبکر (ابن ابی شیبہ) فرماتے ہیں کہ وہ نماز کا اعادہ کرے گا لیکن وضو کا اعادہ نہیں کرے گا۔ [مصنف ابن ابي شيبه/كتاب الصلوات/حدیث: 3962]

حضرت ابراہیم فرماتے ہیں کہ جو شخص بیٹھ کر نمازپڑھے اس کے لئے مستحب ہے کہ وہ کھڑے ہو کردو رکعت ادا کرے۔ [مصنف ابن ابي شيبه/كتاب الصلوات/حدیث: 3963]

حضرت طاوس فرماتے ہیں کہ جو شخص بیٹھ کر نماز پڑھے اس کے لئے مستحب ہے کہ وہ اسے کھڑے ہوکر شروع کرے۔ [مصنف ابن ابي شيبه/كتاب الصلوات/حدیث: 3964]

حضرت ہلال بن یساف فرماتے ہیں کہ بعض اوقات میں بیٹھ کر نماز پڑھتا ہوں، جب میں رکوع کرنے لگتا ہوں تو اٹھ کر تھوڑی سی قراءت کرتا ہوں اور پھر رکوع کرتا ہوں۔ [مصنف ابن ابي شيبه/كتاب الصلوات/حدیث: 3965]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وآلہ وسلم تہجد کی نماز کھڑے ہو کر پڑھا کرتے تھے۔ جب آپ کی عمر مبارک زیادہ ہوگئی تو آپ بیٹھ کر نماز پڑھنے لگے، جب تیس یا چالیس آیات باقی رہ جاتیں تو انہیں کھڑے ہو کر پڑھتے اور پھر سجدہ کرتے۔ [مصنف ابن ابي شيبه/كتاب الصلوات/حدیث: 3966]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم بیٹھ کر نماز پڑھتے تھے، جب کسی سورت کی تیس یا چالیس آیات رہ جاتیں تو کھڑے ہوکر انہیں پڑھتے پھر رکوع فرماتے۔ [مصنف ابن ابي شيبه/كتاب الصلوات/حدیث: 3967]

حضرت محمد فرماتے ہیں کہ جس نے بیٹھ کر قراءت کی وہ رکوع سجدہ بھی بیٹھ کر کرے گا اور جس نے کھڑے ہوکر قراءت کی وہ رکوع اور سجدہ بھی کھڑا ہو کر کرے گا۔ حضرت حسن فرماتے ہیں کہ اسے اختیار ہے جس طرح چاہے کرلے۔ [مصنف ابن ابي شيبه/كتاب الصلوات/حدیث: 3968]