حضرت حسن فرماتے ہیں کہ خون کے چند چھینٹے اتنی طاقت نہیں رکھتے کہ آدمی کی نماز فاسد کردیں۔ [مصنف ابن ابي شيبه/كتاب الصلوات/حدیث: 3999]

حضرت سعید بن مسیب خون کی وجہ سے نماز نہیں توڑتے تھے جب تک کہ وہ ایک درہم کی مقدار کے برابر نہ ہو جائے۔ [مصنف ابن ابي شيبه/كتاب الصلوات/حدیث: 4000]

حضرت شعبہ کہتے ہیں کہ میں نے خون کی ناپاک مقدار کے بارے میں حضرت حکم اور حضرت حماد سے سوال کیا۔ حضرت حکم نے فرمایا کہ جب وہ ایک درہم کے برابر ہو۔ حضرت حماد نے پہلے فرمایا کہ جب ایک مثقال کے برابر ہو، پھر فرمایا کہ جب ایک درہم کے برابرہو۔ [مصنف ابن ابي شيبه/كتاب الصلوات/حدیث: 4001]

حضرت ابو الربیع کہتے ہیں کہ میں نے حضرت مجاہد کو ایسے کپڑے میں جن میں خون لگا ہوا تھا دیکھا ہے جس میں انہوں نے کچھ دن نماز پڑھی تھی۔ [مصنف ابن ابي شيبه/كتاب الصلوات/حدیث: 4002]

حضرت شعبی اس شخص کے بارے میں جس نے خون آلود کپڑوں میں نماز پڑھ لی فرماتے ہیں کہ وہ اس نماز کا اعادہ نہیں کرے گا۔ [مصنف ابن ابي شيبه/كتاب الصلوات/حدیث: 4003]

حضرت عاصم کہتے ہیں کہ میں نے ابو وائل کو اس حال میں نماز پڑھتے دیکھا کہ ان کے کپڑوں پر خون کے قطرے تھے۔ [مصنف ابن ابي شيبه/كتاب الصلوات/حدیث: 4004]

حضرت زہری فرماتے ہیں کہ جب خون کا نشان درہم کے برابر ہو تو نماز کا اعادہ کرے گا۔ [مصنف ابن ابي شيبه/كتاب الصلوات/حدیث: 4005]

حضرت ابراہیم فرمایا کرتے تھے کہ اگر کپڑوں پر دینار یا درہم کے برابر خون کا نشان ہو تو نماز دوبارہ پڑھی جائے گی۔ [مصنف ابن ابي شيبه/كتاب الصلوات/حدیث: 4006]

حضرت حصین کہتے ہیں کہ میں نے حضرت ابراہیم سے سوال کیا کہ اگر کوئی آدمی نما ز میں اپنے کپڑوں پر خون کا نشان دیکھے تو وہ کیا کرے؟ فرمایا کہ اگر خون زیادہ ہو تو اپنا کپڑا اتار دے اور اگر کم ہو تو نماز پڑھتا رہے۔ [مصنف ابن ابي شيبه/كتاب الصلوات/حدیث: 4007]

حضرت عاصم کہتے ہیں کہ میں نے ابو قلابہ سے سوال کیا کہ اگر میں نماز پڑھنے کے بعد اپنے کپڑوں پر خون کانشان دیکھوں تو کیا کروں؟ انہوں نے فرمایا کہ اسے دھو لو اور دوبارہ نماز پڑھو۔ [مصنف ابن ابي شيبه/كتاب الصلوات/حدیث: 4008]