حضرت ابراہیم فرماتے ہیں کہ اسلاف تشہد کو ای سے سیکھا کرتے تھے جیسے قرآن مجید کی سورت سیکھتے تھے۔ [مصنف ابن ابي شيبه/كتاب الصلوات/حدیث: 3039]

حضرت جابر فرماتے ہیں کہ نبی کریم صلی اللہ علیہ وآلہ وسلم تشہد میں بسم اللہ کہا کرتے تھے۔ [مصنف ابن ابي شيبه/كتاب الصلوات/حدیث: 3040]

حضرت عروہ فرماتے ہیں کہ حضرت عمرنے تشہد میں بسم اللہ پڑھی۔ [مصنف ابن ابي شيبه/كتاب الصلوات/حدیث: 3041]

حضرت حارث فرماتے ہیں کہ حضرت علی رضی اللہ عنہ جب تشہد پڑھتے تو بسم اللہ کہا کرتے تھے اور یہ کہتے کہ اللہ تعالیٰ کے ناموں میں سب سے بہتر نام اللہ ہے۔ [مصنف ابن ابي شيبه/كتاب الصلوات/حدیث: 3042]

حضرت مسیب بن رافع کہتے ہیں کہ حضر ت ابن مسعود نے ایک آدمی کو تشہد میں بسم اللہ کہتے ہوئے سنا تو فرمایا کہ یہ جملہ تو کھانے پر کہا جاتا ہے۔ [مصنف ابن ابي شيبه/كتاب الصلوات/حدیث: 3043]

حضرت حماد فرماتے ہیں کہ حضرت سعید بن جبیر تشہد میں بسم اللہ کہا کرتے تھے۔ [مصنف ابن ابي شيبه/كتاب الصلوات/حدیث: 3044]

حضرت ابو عبیدہ فرماتے ہیں کہ میرے والد حضرت عبدا للہ بن مسعود فرماتے ہیں کہ نبی کریم صلی اللہ علیہ وآلہ وسلم پہلی دو رکعتوں کے بعد اتنی تھوڑی دیر بیٹھتے تھے جیسے گرم پتھر پر بیٹھے ہوں۔ میں نے ان سے پوچھا کہ کھڑے ہونے سے پہلے؟ انہوں نے فرمایا ہاں کھڑے ہونے سے پہلے۔ [مصنف ابن ابي شيبه/كتاب الصلوات/حدیث: 3045]

حضرت تمیم بن سلمہ کہتے ہیں کہ حضرت ابوبکر دو رکعتوں کے بعداتنی دیر بیٹھا کرتے تھے جیسے گرم پتھر پر بیٹھے ہوں۔ [مصنف ابن ابي شيبه/كتاب الصلوات/حدیث: 3046]

ابراہیم ایک آدمی سے روایت کرتے ہیں کہ انہوں نے حضرت ابو بکرکے پیچھے نماز پڑھی، پہلی دورکعات کے بعد اٹھنے سے پہلے وہ اتنی دیر بیٹھے جیسے انگارے پر بیٹھے ہوں۔ [مصنف ابن ابي شيبه/كتاب الصلوات/حدیث: 3047]

حضرت مغیرہ فرماتے ہیں کہ ابراہیم دو رکعت پڑھنے کے بعد تشہد میں ٹھہر ٹھہر کر تشہد پڑھنے کی مقدار بیٹھتے اور پھر کھڑے ہوجاتے۔ [مصنف ابن ابي شيبه/كتاب الصلوات/حدیث: 3048]