حضرت ابو عثمان یوم شک کو روزہ رکھا کرتے تھے۔ [مصنف ابن ابي شيبه/كتاب الصيام/حدیث: 9761]

حضرت ابو عقرب اسدی کہتے ہیں کہ ہم حضرت ابن مسعود کی خدمت میں حاضر ہوئے، ہم نے انہیں کمرے کی چھت پر موجود پایا، ہم نے سنا کہ وہ نیچے اترنے سے پہلے کہہ رہے تھے کہ اللہ اور اس کے رسول نے سچ فرمایا۔ ہم نے ان سے کہا کہ ہم نے آپ کو سنا کہ آپ نے نیچے اترنے سے پہلے کہا اللہ اور اس کے رسول نے سچ فرمایا۔ حضرت عبد اللہ بن مسعود رضی اللہ عنہ نے فرمایا کہ شبِ قدر آخری سات راتوں کے درمیان میں ہے، اس کی علامت یہ ہے کہ اس دن سورج جب طلوع ہوتا ہے تو سفید ہوتا ہے اور کرنوں کے بغیر ہوتا ہے۔ جب میں نے سورج کو دیکھا تو اسے اسی حالت میں پایا جس حالت میں مجھے بتایا گیا تھا، چناچہ میں نے خوشی سے اللہ کی کبریائی بیان کی۔ [مصنف ابن ابي شيبه/كتاب الصيام/حدیث: 9762]

حضرت عمر فرماتے ہیں کہ تم جانتے ہو کہ رسول اللہ صلی اللہ علیہ وآلہ وسلم نے شبِ قدر کے بارے میں فرمایا ہے کہ اسے رمضان کے آخری عشرے میں تلاش کرو۔ [مصنف ابن ابي شيبه/كتاب الصيام/حدیث: 9763]

حضرت عبادہ بن صامت فرماتے ہیں کہ ایک مرتبہ حضرت محمد (صلی اللہ علیہ وآلہ وسلم) لوگوں کو شبِ قدر کے بارے میں بتانے کے لئے باہر تشریف لائے تو دو آدمی لڑ رہے تھے۔ آپ نے فرمایا کہ میں تمہیں شبِ قدر کی اطلاع دینے کے لئے آیا تھا، لیکن فلاں اور فلاں دونوں لڑ رہے تھے، شاید اسی میں خیر ہوگی، تم اسے نویں، ساتویں اور پانچویں رات میں تلاش کرو۔ [مصنف ابن ابي شيبه/كتاب الصيام/حدیث: 9764]

حضرت عبد اللہ بن انیس رضی اللہ عنہ سے شبِ قدر کے بارے میں سوال کیا گیا تو انہوں نے فرمایا کہ میں نے نبی کریم صلی اللہ علیہ وآلہ وسلم کو فرماتے سنا کہ اسے آج کی رات میں تلاش کرو۔ وہ تیئسویں رات تھی۔ [مصنف ابن ابي شيبه/كتاب الصيام/حدیث: 9765]

حضرت ابو مرثد فرماتے ہیں کہ میں جمرۂ وسطیٰ کے پاس حضرت ابو ذر غفاری کے پاس تھا۔ میں نے ان سے شبِ قدر کے بارے میں سوال کیا تو انہوں نے فرمایا کہ رسول اللہ صلی اللہ علیہ وآلہ وسلم سے شب قدر کے بارے میں سب سے زیادہ سوال میں کیا کرتا تھا۔ میں نے عرض کیا یارسول اللہ! ہمیں اس کے بارے میں بتادیجئے۔ آپ نے فرمایا کہ اگر مجھے اس کے بتانے کی اجازت ہوتی تو میں تمہیں ضرور بتادیتا۔ البتہ تم اسے دو ساتوں (یعنی دو سات راتوں) میں سے کسی ایک میں تلاش کرو۔ پھر اپنے یا میرے اس مقام کے بعد مجھ سے اس بارے میں سوال مت کرنا۔ [مصنف ابن ابي شيبه/كتاب الصيام/حدیث: 9766]

حضرت قنان بن عبد اللہ نہمی کہتے ہیں کہ میں نے حضرت زر سے شبِ قدر کے بارے میں سوال کیا۔ انہوں نے فرمایا کہ حضرت عمر، حضرت حذیفہ رضی اللہ عنہ اور بہت سے صحابہ کرام کو اس بارے میں کوئی شک نہیں تھا کہ شبِ قدر رمضان کی ستائیسویں رات ہے۔ حضرت زر نے فرمایا کہ پس اس رات کو مسلسل عبادت میں گزارو۔ [مصنف ابن ابي شيبه/كتاب الصيام/حدیث: 9767]

حضرت عمر فرماتے ہیں کہ عشرۂ ذو الحجہ میں رمضان کی قضا کرنے میں کوئی حرج نہیں۔ [مصنف ابن ابي شيبه/كتاب الصيام/حدیث: 9768]

حضرت علی رضی اللہ عنہ فرماتے ہیں کہ جس پر رمضان کی قضا واجب ہو وہ ذوالحجہ میں اسے ادانہ کرے کیونکہ یہ نسک کا مہینہ ہے۔ [مصنف ابن ابي شيبه/كتاب الصيام/حدیث: 9769]

حضرت ابوہریرہ فرماتے ہیں کہ فرض کو مقدم رکھو اور عشرۂ ذو الحجہ میں اس کی قضاء کرنے میں کوئی حرج نہیں۔ [مصنف ابن ابي شيبه/كتاب الصيام/حدیث: 9770]