حضرت نافع سے مروی ہے کہ یوم فطر سے ایک دو دن پہلے صدقۃ الفطر لینے والا بیٹھ جاتا تو حضرت عبد اللہ بن عمر رضی اللہ عنہما اس کو ایک دو دن پہلے ہی صدقۃ الفطر ادا کردیتے۔ اور حضرت عبد اللہ بن عمر رضی اللہ عنہما اس میں کوئی حرج والی بات نہ سمجھتے۔ [مصنف ابن ابي شيبه/كتاب الزكاة/حدیث: 11103]

حضرت عبد اللہ بن عمرو رضی اللہ عنہ فرماتے ہیں کہ جس شخص سے اللہ کا واسطہ دے کر سوال کیا گیا اور اس نے سوال کرنے والے کو عطا کردیا تو اس کے لئے ستر ٧٠ اجر ہیں۔ [مصنف ابن ابي شيبه/كتاب الزكاة/حدیث: 11104]

حضرت عطاء اس بات کو ناپسند فرماتے تھے کہ اللہ کی ذات (وجہ اللہ) یا قرآن کا واسطہ دے کر دنیا کے معاملات میں سے کوئی چیز مانگی جائے۔ [مصنف ابن ابي شيبه/كتاب الزكاة/حدیث: 11105]

حضرت یزید جو حضرت سلمہ کے غلام ہیں وہ فرماتے ہیں کہ حضرت سلمہ سے جو شخص بھی اللہ کا واسطہ دے کر سوال کرتا اس کو عطا فرماتے، لیکن اس کو ناپسند سمجھتے اور فرماتے یہ (فاقے پر صبر نہ کرنا اور لوگوں سے سوال کرنا) الحاف ہے۔ [مصنف ابن ابي شيبه/كتاب الزكاة/حدیث: 11106]

حضرت عبد اللہ بن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ارشاد فرمایا جو اللہ کا واسطہ دے کر سوال کرے اس کو عطا کردینا چاہئے۔ [مصنف ابن ابي شيبه/كتاب الزكاة/حدیث: 11107]

حضرت مثنیٰ فرماتے ہیں کہ حضرت عمر بن عبد العزیز کا مکتوب ہمارے سامنے پڑھا گیا (اس میں تحریر تھا) مسلمان شراب پر عشر وصول نہیں کرے گا۔ [مصنف ابن ابي شيبه/كتاب الزكاة/حدیث: 11108]

حضرت ابراہیم فرماتے ہیں کہ شراب پر عشر وصول کیا جائے گا اور دو گنا وصول کیا جائے گا۔ [مصنف ابن ابي شيبه/كتاب الزكاة/حدیث: 11109]

حضرت سوید بن غفلہ سے مروی ہے کہ حضرت عمر کے عمال نے حضرت عمر کو خنزیروں اور شراب کے متعلق پوچھا کہ وہ اس میں جزیہ وصول کریں یا نہیں؟ حضرت عمر نے جواب تحریر فرمایا کہ ان کے مالکوں کو ہی ان کا والی بناؤ۔ [مصنف ابن ابي شيبه/كتاب الزكاة/حدیث: 11110]