حضرت یحییٰ بن سعید فرماتے ہیں کہ سنت طریقہ یہ ہے کہ زکوٰۃ وصول کرنے والا ہر اونٹ کے ساتھ رسی (جس کے ساتھ اس کو باندھا جاتا ہے) بھی لے گا اور دو اونٹوں کے ساتھ دو پاؤں باندھنے والی رسیاں اور ایک دوسری رسی۔ [مصنف ابن ابي شيبه/كتاب الزكاة/حدیث: 11064]

حضرت ابراہیم سے مروی ہے کہ حضرت ابوبکر صدیق نے ارشاد فرمایا: اگر وہ لوگ مجھے رسی کا ایک ٹکڑا ادا کرنے سے بھی انکار کردیں جو وہ نبی کریم صلی اللہ علیہ وآلہ وسلم کو دیا کرتے تھے تو میں ان کے خلاف جہاد کروں گا۔ [مصنف ابن ابي شيبه/كتاب الزكاة/حدیث: 11065]

حضرت حارث فرماتے ہیں کہ اللہ تعالیٰ کے ارشاد { وَاَقِیْمُوا الصَّلٰوۃَ وَ اٰتُوا الزَّکٰوۃَ } کا مصداق صدقۃ الفطر ہے۔ [مصنف ابن ابي شيبه/كتاب الزكاة/حدیث: 11066]

حضرت عبد الرحمن فرماتے ہیں کہ صدقۃ الفطر ایک صاع فرض ہے۔ [مصنف ابن ابي شيبه/كتاب الزكاة/حدیث: 11067]

حضرت ابو العالیہ اور حضرت ابن سیرین فرماتے ہیں کہ صدقۃ الفطر فرض ہے۔ [مصنف ابن ابي شيبه/كتاب الزكاة/حدیث: 11068]

حضرت عبد اللہ بن عمر رضی اللہ عنہما فرماتے ہیں کہ نبی کریم صلی اللہ علیہ وآلہ وسلم نے صدقۃ الفطر کو فرض فرمایا ہے۔ [مصنف ابن ابي شيبه/كتاب الزكاة/حدیث: 11069]

حضرت عبد اللہ بن عباس رضی اللہ عنہما فرماتے ہیں کہ نبی کریم صلی اللہ علیہ وآلہ وسلم نے صدقۃ الفطر کو فرض فرمایا ہے۔ [مصنف ابن ابي شيبه/كتاب الزكاة/حدیث: 11070]

حضرت عامر فرماتے ہیں کہ نبی کریم صلی اللہ علیہ وآلہ وسلم کے زمانے میں کافروں کا دل نرم کرنے کے لئے ان کو زکوٰۃ دی جاتی تھی۔ جب حضرت صدیق اکبر خلیفہ بنے تو یہ (سلسلہ) ختم ہوگیا۔ [مصنف ابن ابي شيبه/كتاب الزكاة/حدیث: 11071]

حضرت ابو جعفر فرماتے ہیں کہ آج کل بھی مؤلفۃ قلوب کو زکوٰۃ دیں گے۔ [مصنف ابن ابي شيبه/كتاب الزكاة/حدیث: 11072]

حضرت عفان فرماتے ہیں کہ حضرت حماد سے مؤلفۃ القلوب کے متعلق دریافت کیا گیا؟ تو انہوں نے فرمایا کہ حضرت حسن فرماتے ہیں کہ اس سے مراد وہ لوگ ہیں جو اسلام میں داخل ہوئے ہیں۔ [مصنف ابن ابي شيبه/كتاب الزكاة/حدیث: 11073]