حضرت بشر بن عاصم اپنے والد سے روایت کرتے ہیں کہ حضرت عمر نے ان کے والد (حضرت سفیان) کو طائف کے علاقوں میں زکوٰۃ وصول کرنے کا فریضہ سونپا، (انہوں نے) انکی بکریوں کو چھوٹے بچوں کو ملا کر شمار کیا، لوگوں نے ان سے کہا: اگر آپ زکوٰۃ وصول کرتے وقت اس چھوٹے بچے کو بھی شمار کر رہے ہیں تو پھر زکوٰۃ میں بھی اسی چھوٹے کو وصول کرلو۔ وہ رک گئے ان سے یہاں تک کہ ان کی حضرت عمر سے ملاقات ہوئی، تو انہوں نے حضرت عمر کے سامنے سارا ماجرا بیان کیا، آپ نے فرمایا: انکی بکریوں کو شمار کرتے وقت چھوٹے بچوں کو بھی ساتھ شمار کرو اگرچہ (وہ اتنا چھوٹا ہو کہ) چرواہا اس کو اپنے ہاتھوں پہ اٹھا کر لائے، اور ان کو بتادو کہ بیشک تمہارے لئے وہ بکری جو اپنے نومولود بچے کو پال رہی ہو، حاملہ بکری، وہ بکری جس کو ذبح کرنے کی غرض موٹا اور فربہ کیا ہو اور سانڈ (نر) جانور چھوڑ دیا گیا ہے (یعنی زکوٰۃ میں یہ وصول نہیں کئے جائیں گے) ہاں البتہ لیا جائے گا وہ بچہ جس پر ابھی سال مکمل نہ گذرا ہو اور اسی طرح بکری کا آٹھ ماہ کا بچہ اور وہ بکری جس کے سامنے والے چار دانتوں میں سے دو ظاہر ہوگئے ہوں۔ اس طرح کرنے سے بہترین مال اور چھوٹے مال کے درمیان انصاف اور مساوات ہوجائے گی۔ [مصنف ابن ابي شيبه/كتاب الزكاة/حدیث: 10254]

حضرت حسن بن مسلم سے مروی ہے کہ نبی کریم صلی اللہ علیہ وآلہ وسلم نے حضرت سفیان بن عبد اللہ کو زکوٰۃ وصول کرنے کیلئے بھیجا تو ان کو فرمایا: بہت چھوٹے جانور اور بوڑھے جانور کے درمیان (جو درمیانے عمر والا) جانور ہو اسکو وصول کرنا۔ [مصنف ابن ابي شيبه/كتاب الزكاة/حدیث: 10255]

حضرت ابراہیم بن میسرہ فرماتے ہیں کہ بنو ثقیف کے ایک شخص نے حضرت ابوہریرہ سے سوال کیا کہ مال کے کس حصے میں سے زکوٰۃ لی جائے؟ آپ نے ارشاد فرمایا کہ درمیانی تہائی میں سے، جب تمہارے پاس زکوٰۃ وصول کرنے والا آئے تو اسکے لئے جذعہ اور ثنیہ جانور نکال دو۔ [مصنف ابن ابي شيبه/كتاب الزكاة/حدیث: 10256]

حضرت سعد اعرج فرماتے ہیں کہ میں جہاد کیلئے نکلا تو مکہ میں میری حضرت عمر سے ملاقات ہوگئی، حضرت عمر نے پوچھا کہ تم یعلی بن امیہ رضی اللہ عنہ کی اجازت سے نکلے ہو؟ میں نے عرض کی کہ نہیں۔ آپ نے ارشاد فرمایا کہ اپنے ساتھی کے پاس واپس جاؤ، اور جب کوئی آدمی (زکوٰۃ کے لئے) اپنی بکریاں تمہارے سامنے کھڑی کرے تو تم ان کو دو حصوں میں تقسیم کردو، پھر دوسرے نصف میں سے انتخاب کرو۔ [مصنف ابن ابي شيبه/كتاب الزكاة/حدیث: 10257]

حضرت ابن جریج فرماتے ہیں کہ میں اپنے والد اور دوسرے حضرات سے سنا وہ ذکر کرتے تھے کہ حضرت عمر بن عبد العزیز نے لکھا کہ تم بکریوں کو تین حصوں میں تقسیم کرو۔ پھر مالک ایک تہائی کو اختیار کرے اور زکوٰۃ وصول کرنے والا درمیانے تہائی میں سے وصول کرے۔ [مصنف ابن ابي شيبه/كتاب الزكاة/حدیث: 10258]

حضرت قاسم فرماتے ہیں کہ تم بکریوں کو تین حصوں میں تقسیم کرو۔ [مصنف ابن ابي شيبه/كتاب الزكاة/حدیث: 10259]

حضرت امام زہری ارشاد فرماتے ہیں کہ جب زکوٰۃ وصول کرنے والا آئے تو بکریوں کو تین حصوں میں تقسیم کیا جائے گا، ثلث خیار، ثلث شرار اور ثلث اوساط میں، زکوٰۃ وصول کرنے والا درمیانی تہائی میں سے وصول کرے گا۔ [مصنف ابن ابي شيبه/كتاب الزكاة/حدیث: 10260]

حضرت حکم ارشاد فرماتے ہیں کہ زکوٰۃ وصول کرنے والا بکریوں کو دو حصوں میں بانٹ لے گا اور بکریوں کا مالک بہتر والے حصے کو اختیار کرے گا۔ (دوسرے حصے کو زکوٰۃ وصول کرنے والا لے گا) [مصنف ابن ابي شيبه/كتاب الزكاة/حدیث: 10261]

حضرت امام شعبی ارشاد فرماتے ہیں کہ بکریوں کو دو حصوں میں تقسیم کرلیں گے، بکریوں کا مالک بہتر والے حصے کو لے لے گا اور دوسرے حصے کو زکوٰۃ وصول کرنے والا لے گا۔ [مصنف ابن ابي شيبه/كتاب الزكاة/حدیث: 10262]

حضرت ابراہیم ارشاد فرماتے ہیں کہ بکریوں کو جمع کیا جائے گا اور بکریوں کا مالک بہتر بکریوں والی تہائی کو اپنے پاس رکھے گا اور زکوٰۃ وصول کرنے والا باقی دو تہائیوں میں سے اپنا حصہ (حق) وصول کرے گا۔ [مصنف ابن ابي شيبه/كتاب الزكاة/حدیث: 10263]