حضرت ابو قلابہ سے زکوٰۃ کے متعلق سوال کیا گیا تو آپ نے فرمایا: بادشاہ کو ادا کرو۔ عرض کیا گیا کہ وہ اس میں ایسا ایسا کرتے ہیں (یہ بات دو مرتبہ کہی)۔ آپ نے فرمایا: کیا تم اسے اس کے صحیح مصارف میں خرچ کرسکتے ہو؟ انہوں نے کہا: نہیں۔ آپ نے فرمایا: پھر انہی کو ادا کرو۔ [مصنف ابن ابي شيبه/كتاب الزكاة/حدیث: 10484]

حضرت خیثمہ سے مروی ہے کہ حضرت عبد اللہ بن عمر رضی اللہ عنہما نے ارشاد فرمایا: اپنی زکوٰۃ امراء کو ادا کرو جب تک وہ نماز پڑھتے رہیں۔ [مصنف ابن ابي شيبه/كتاب الزكاة/حدیث: 10485]

راوی کہتے ہیں کہ حضرت خیثمہ نے فرمایا: جب تک وہ نماز کو اس کے وقت پر ادا کرتے رہیں۔ [مصنف ابن ابي شيبه/كتاب الزكاة/حدیث: 10486]

حضرت مسلم بن یسار فرماتے ہیں کہ قرآن پاک کی آیت { وَأَقِیمُوا الصَّلاَۃَ وَآتَوُا الزَّکَاۃَ } (نماز قائم کرو اور زکوٰۃ ادا کرو) اس فریضہ کا تعلق بادشاہ کے ساتھ ہے۔ [مصنف ابن ابي شيبه/كتاب الزكاة/حدیث: 10487]

حضرت امام زہری فرماتے ہیں کہ زکوٰۃ بادشاہ کو دی جائے گی۔ [مصنف ابن ابي شيبه/كتاب الزكاة/حدیث: 10488]

حضرت عبد الرحمن بن البیلمانی سے مروی ہے کہ حضرت صدیق اکبر نے حضرت عمر کو جو وصیت فرمائی تھی وہ یہ تھی کہ جو شخص امراء کے علاوہ کسی اور کو زکوٰۃ ادا کرے اس کی زکوٰۃ اور اس کا صدقہ قبول نہیں اگرچہ وہ پوری دنیا صدقہ کر دے۔ [مصنف ابن ابي شيبه/كتاب الزكاة/حدیث: 10489]

حضرت مجاہد اور حضرت عطاء فرماتے ہیں کہ اپنے مال کی زکوٰۃ سلطان کو ادا کر۔ [مصنف ابن ابي شيبه/كتاب الزكاة/حدیث: 10490]

حضرت ابوہریرہ اور حضرت ابن عمر رضی اللہ عنہما فرماتے ہیں کہ اپنے مال کی زکوٰۃ بادشاہ کو ادا کرو۔ [مصنف ابن ابي شيبه/كتاب الزكاة/حدیث: 10491]

حضرت نعمان فرماتے ہیں کہ حضرت مکحول سے ایک شخص نے زکوٰۃ کے متعلق دریافت کیا (کہ کس کو زکوٰۃ ادا کروں؟) آپ نے فرمایا امام کو ادا کرو۔ پھر فرمایا: امام قرآن ہے۔ اور آپ اس بات کو مخفی رکھتے تھے۔ [مصنف ابن ابي شيبه/كتاب الزكاة/حدیث: 10492]

حضرت ابراہیم اور حضرت حسن فرماتے ہیں کہ زکوٰۃ کو ان کے مواضع (ادا کرنے کی جگہ) پر ادا کرو اور اس کو مخفی رکھو۔ [مصنف ابن ابي شيبه/كتاب الزكاة/حدیث: 10493]