حضرت قزعہ فرماتے ہیں کہ میں نے حضرت عبد اللہ بن عمر رضی اللہ عنہما سے عرض کیا: میرے پاس مال ہے میں زکوٰۃ کس کو ادا کروں؟ آپ نے فرمایا اس قوم کو یعنی امراء کو (بادشاہوں کو) میں نے عرض کیا پھر تو وہ اس کے کپڑے اور خوشبو بنالیں گے (اور خود استعمال کریں گے) آپ نے فرمایا اگرچہ وہ کپڑے اور خوشبو بنالیں، اے قزعہ تیرے مال پر زکوٰۃ کے علاوہ بھی حق ہے۔ [مصنف ابن ابي شيبه/كتاب الزكاة/حدیث: 10474]

حضرت حکم بن اعرج فرماتے ہیں کہ میں نے حضرت ابن عمر رضی اللہ عنہما سے (اس بارے میں) سوال کیا؟ آپ نے فرمایا ان کو دیدو۔ اگرچہ وہ اس سے کتے کا گوشت کھائیں جب لوگوں نے دوبارہ یہی سوال کیا تو آپ نے فرمایا ان کو دیدو۔ [مصنف ابن ابي شيبه/كتاب الزكاة/حدیث: 10475]

حضرت نعیم بن مجالد فرماتے ہیں کہ میں نے حضرت عبد اللہ بن عمر رضی اللہ عنہما سے اس کے متعلق دریافت کیا، آپ نے فرمایا ان کو (بادشاہوں) ادا کردو اگرچہ وہ اس سے لذیذ چیز کھائیں۔ (البیشیار جات: وہ چیز جو مہمان کو کھانے سے پہلے پیش کی جائے۔) [مصنف ابن ابي شيبه/كتاب الزكاة/حدیث: 10476]

حضرت داؤد بن ابی عاصم فرماتے ہیں کہ حضرت مغیرہ بن شعبہ اپنی زکوٰۃ امراء (بادشاہوں) کی طرف بھیجا کرتے تھے۔ [مصنف ابن ابي شيبه/كتاب الزكاة/حدیث: 10477]

حضرت یحییٰ بن ابو کثیر سے مروی ہے کہ حضرت حذیفہ رضی اللہ عنہ، حضرت سعید اور حضرت ابن عمر رضی اللہ عنہما فرمایا کرتے تھے کہ زکوٰۃ نکال کر بادشاہوں کو دینی چاہئے۔ [مصنف ابن ابي شيبه/كتاب الزكاة/حدیث: 10478]

محمد فرماتے ہیں کہ زکوٰۃ آنحضرت صلی اللہ علیہ وآلہ وسلم کو دی جاتی تھی اور جس کو آپ نے وصول کرنے کا حکم دیا تھا اس کو پھر حضرت ابوبکر کو اور جن کو انہوں نے حکم دیا ہوا تھا ان کو، پھر حضرت عمر کو اور جن کو انہوں نے حکم فرمایا ہوا تھا ان کو، پھر حضرت عثمان کو اور جن کو آپ نے حکم فرمایا تھا ان کو، جب حضرت عثمان شہید ہوگئے تو لوگوں کا آپس میں اختلاف ہوگیا۔ بعض کی رائے یہ تھی کہ اب بھی ان کو دی جائے (امراء کو) اور بعض حضرات کی رائے تھی کہ خود تقسیم کی جائے۔ محمد نے فرمایا: جو لوگ زکوٰۃ خود تقسیم کرنا چاہتے ہیں ان کو چاہئے کہ اللہ تعالیٰ سے ڈریں اور ایسا نہ ہو کہ وہ ان پر کسی بات کا عیب لگائیں اور پھر خود بھی ویسا ہی کام کریں جس کا وہ ان پر عیب لگاتے ہیں۔ [مصنف ابن ابي شيبه/كتاب الزكاة/حدیث: 10479]

حضرت حاثہ بن ابی رجال فرماتے ہیں کہ میں نے حضرت عمرہ سے زکوٰۃ ادا کرنے کے بارے میں سوال کیا؟ آپ نے جواب ارشاد فرمایا کہ حضرت عائشہ رضی اللہ عنہا فرماتی تھیں کہ زکوٰۃ اپنے امراء کو ادا کرو۔ [مصنف ابن ابي شيبه/كتاب الزكاة/حدیث: 10480]

حضرت عبد اللہ بن حبیب فرماتے ہیں کہ میں نے حضرت ابو جعفر سے زکوٰۃ سے متعلق دریافت کیا کہ کیا زکوٰۃ امراء کو ادا کی جائے؟ آپ نے فرمایا کہ ہاں امراء کو ادا کی جائے۔ [مصنف ابن ابي شيبه/كتاب الزكاة/حدیث: 10481]

حضرت حسن فرماتے ہیں کہ چار چیزیں بادشاہوں کا حق ہے۔ نماز (امامت) زکوٰۃ، حدود (قائم کرنا) اور فیصلہ کرنا۔ [مصنف ابن ابي شيبه/كتاب الزكاة/حدیث: 10482]

حضرت حسن فرماتے ہیں کہ ان لوگوں کو (بادشاہوں کو) چار چیزوں کا ضامن بنایا گیا ہے۔ نماز، زکوٰۃ، حدود اور فیصلہ کا۔ [مصنف ابن ابي شيبه/كتاب الزكاة/حدیث: 10483]