حضرت ابو معشر سے مروی ہے کہ حضرت ابراہیم صدقۃ الفطر عید گاہ (کھلا میدان) جانے سے پہلے ادا کرنے کو پسند کرتے تھے۔ [مصنف ابن ابي شيبه/كتاب الزكاة/حدیث: 10614]

حضرت عبد اللہ بن مسلم بن یسار اپنے والد سے روایت کرتے ہیں کہ وہ صدقۃ الفطر نماز عید سے قبل ادا فرمایا کرتے تھے۔ [مصنف ابن ابي شيبه/كتاب الزكاة/حدیث: 10615]

حضرت افلح سے مروی ہے کہ حضرت قاسم نماز سے پہلے صدقۃ الفطر ادا فرمایا کرتے تھے۔ [مصنف ابن ابي شيبه/كتاب الزكاة/حدیث: 10616]

حضرت سعید بن یزید سے مروی ہے کہ حضرت ابو نضرہ محلہ کی مسجد میں یوم الفطر کے دن بیٹھ جاتے، ان کے پاس زکوٰۃ (وغیرہ) لائی جاتی تو اور جو باقی رہ جاتے ان کی طرف قاصد روانہ کرتے ان کی زکوٰۃ بھی آجاتی وہ اس کو محلہ کے فقراء کے درمیان تقسیم فرماتے پھر مسجد سے نکلتے۔ [مصنف ابن ابي شيبه/كتاب الزكاة/حدیث: 10617]

حضرت ضحاک فرماتے ہیں کہ آدمی عید الفطر کے دن عید گاہ کی طرف تب تک نہ جائے جب تک کہ صدقۃ الفطر ادا نہ کرے اور جو اس کے اہل پر واجب ہے وہ ادا نہ کرلے۔ [مصنف ابن ابي شيبه/كتاب الزكاة/حدیث: 10618]

حضرت عکرمہ فرماتے ہیں کہ اپنی نماز سے قبل (نماز عید) زکوٰۃ (صدقۃ الفطر) ادا کرو۔ [مصنف ابن ابي شيبه/كتاب الزكاة/حدیث: 10619]

حضرت حکم سے مروی ہے کہ فقہاء کرام صدقۃ الفطر نماز سے قبل ادا کرنے کو پسند فرماتے تھے۔ [مصنف ابن ابي شيبه/كتاب الزكاة/حدیث: 10620]

حضرت عامر فرماتے ہیں کہ اگر چاہے تو صدقۃ الفطر جلدی ادا کرے اور اگر چاہے تو مؤخر کرے۔ [مصنف ابن ابي شيبه/كتاب الزكاة/حدیث: 10621]

حضرت ابن عون سے مروی ہے کہ حضرت ابن سیرین صدقۃ الفطر نماز کے بعد ادا فرمایا کرتے تھے۔ [مصنف ابن ابي شيبه/كتاب الزكاة/حدیث: 10622]

حضرت مجاہد فرماتے ہیں کہ صدقۃ الفطر یوم الفطر کو (ادا کیا جائے تو) زکوٰۃ ہے۔ اور جو اس کو اس کے بعد ادا کرے تو یہ اس کے حق میں صدقہ ہے۔ [مصنف ابن ابي شيبه/كتاب الزكاة/حدیث: 10623]