حضرت ابو قلابہ فرماتے ہیں کہ صدقۃ الفطر ہر چھوٹے، بڑے پر، ہر آزاد و غلام پر اور ہر مرد اور عورت پر ہے۔ تحقیق وہ ادا کرتے تھے یہاں تک کہ وہ حمل کی طرف سے بھی صدقۂ فطر ادا کرتے تھے۔ [مصنف ابن ابي شيبه/كتاب الزكاة/حدیث: 10654]

حضرت امام شعبی، حضرت ابو العالیہ اور حضرت ابن سیرین فرماتے ہیں کہ صدقۃ الفطر ہر چھوٹے، بڑے پر، ہر آزاد و غلام پر، ہر حاضر و غائب پر اور ہر مرد اور عورت اور ہر فقیر اور غنی پر لازم ہے۔ [مصنف ابن ابي شيبه/كتاب الزكاة/حدیث: 10655]

حضرت علی رضی اللہ عنہ فرماتے ہیں کہ صدقۃ الفطر ان پر ہے جو روزہ رکھنے کی طاقت رکھتے ہوں۔ [مصنف ابن ابي شيبه/كتاب الزكاة/حدیث: 10656]

حضرت علی رضی اللہ عنہ فرماتے ہیں کہ صدقہ فطر ہر اس شخص کی طرف سے ہے جس کا نفقہ تجھ پر ہے۔ [مصنف ابن ابي شيبه/كتاب الزكاة/حدیث: 10657]

حضرت ابو مجلز فرماتے ہیں کہ حضرت عبد اللہ بن عمر رضی اللہ عنہما اس بات کو پسند فرماتے تھے کہ صدقۃ الفطر میں کھجور ادا کی جائے۔ [مصنف ابن ابي شيبه/كتاب الزكاة/حدیث: 10658]

حضرت ابن سیرین فرماتے ہیں کہ صدقۃ الفطر گندم، جو، کھجور، کشمش اور سُلت (بے چھلکے والے جو) سے ادا کرسکتے ہیں۔ اور انہوں نے آٹے اور ستو کے متعلق شک فرمایا۔ اور فرمایا کہ یہ سب کے سب برابر ہیں۔ (جس سے مرضی صدقۃ الفطر ادا کر دے)۔ [مصنف ابن ابي شيبه/كتاب الزكاة/حدیث: 10659]

حضرت ابن عوف فرماتے ہیں کہ حضرت عمر بن عبد العزیز نے بصرہ میں حضرت عدی کی جانب (خط) لکھا تو جب وہ پڑھا گیا تو میں نے سنا اس میں تحریر تھا کہ: اہل دیوان سے ان کے عطایا (وظائف) میں سے ہر شخص کی طرف سے نصف درہم وصول کریں گے۔ [مصنف ابن ابي شيبه/كتاب الزكاة/حدیث: 10660]

حضرت قرہ فرماتے ہیں کہ ہمارے پاس حضرت عمر بن عبد العزیز کا مکتوب لایا گیا جس میں صدقۃ الفطر سے متعلق تحریر تھا کہ: صدقۃ الفطر ہر شخص سے نصف صاع یا اس کی قیمت نصف درہم وصول کی جائے گی۔ [مصنف ابن ابي شيبه/كتاب الزكاة/حدیث: 10661]

حضرت حسن فرماتے ہیں کہ صدقۃ الفطر میں دراہم دے دئیے جائیں اسمیں کوئی حرج والی بات نہیں ہے۔ [مصنف ابن ابي شيبه/كتاب الزكاة/حدیث: 10662]

حضرت زہیر فرماتے ہیں کہ میں نے حضرت ابو اسحاق کو یہ فرماتے ہوئے سنا کہ: ”میں نے اپنے سے پہلے والوں کو پایا کہ وہ صدقۃ الفطر میں کھانے (غلے) کی قیمت دراھم دیا کرتے تھے۔ [مصنف ابن ابي شيبه/كتاب الزكاة/حدیث: 10663]