حضرت مجاہد فرماتے ہیں کہ اس مد سے ادا کریں گے جس سے اپنے اہل و عیال کو خوراک وغذا دیتے ہو۔ [مصنف ابن ابي شيبه/كتاب الزكاة/حدیث: 10684]

حضرت خالد بن ابوبکر سے مروی ہے کہ حضرت سالم اس دن بازار میں جو صاع رائج ہوتا اس سے صدقۃ الفطر صبح (عید گاہ کی طرف) نکلنے سے قبل ادا کیا کرتے تھے۔ اور صدقۃ الفطر میں صرف کھجور ہی ادا کیا کرتے تھے۔ [مصنف ابن ابي شيبه/كتاب الزكاة/حدیث: 10685]

حضرت حسن فرماتے ہیں کہ ہر قوم اپنے ہی صاع سے صدقۃ الفطر ادا کرے گی۔ [مصنف ابن ابي شيبه/كتاب الزكاة/حدیث: 10686]

حضرت اسمائ فرماتی ہیں کہ اس مد اور صاع سے صدقۃ الفطر نکالیں گے جو ان کے درمیان رائج (گھومتا) ہو۔ [مصنف ابن ابي شيبه/كتاب الزكاة/حدیث: 10687]

حضرت عطاء فرماتے ہیں کہ اگر تم نبی کریم صلی اللہ علیہ وآلہ وسلم کا مد دیدو تو وہ بھی تمہارے لئے کافی ہے۔ اور اگر وہ مد دیدو جس سے تم اپنے اہل و عیال کو خوراک دے دیتے ہو تو وہ بھی تمہارے لئے کافی ہے۔ [مصنف ابن ابي شيبه/كتاب الزكاة/حدیث: 10688]

حضرت عطاء فرماتے ہیں کہ مجھے تو یہ پسند ہے کہ تم صدقۃ الفطر آج کے اپنے اس کیل (پیمانے) کے ساتھ ادا کرو جس کے ساتھ تم لیتے ہو اور اپنی خوراک حاصل کرتے ہو۔ [مصنف ابن ابي شيبه/كتاب الزكاة/حدیث: 10689]

حضرت سعید بن جبیر سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: تم صدقہ مت دو مگر اپنے دین والوں کو (مسلمانوں کو) تو قرآن پاک کی آیت { لَیْسَ عَلَیْکَ ھُدٰھُم } سے لیکر { وَ مَا تُنْفِقُوْا مِنْ خَیْرٍ یُّوَفَّ اِلَیْکُم } نازل ہوئی تو آپ صلی اللہ علیہ وآلہ وسلم نے فرمایا: تم صدقہ دیا کرو تمام اہل ادیان پر۔ (غیر مسلموں پر بھی)۔ [مصنف ابن ابي شيبه/كتاب الزكاة/حدیث: 10690]

حضرت ابن حنفیہ فرماتے ہیں کہ (شروع میں) لوگ مشرکین کو صدقہ دینے کو ناپسند کرتے تھے تو اللہ تعالیٰ نے قرآن پاک کی آیت { لَیْسَ عَلَیْکَ ھُدٰھُم } نازل فرمائی تو لوگوں نے ان کو (مشرکین) کو بھی صدقہ دینا شروع کردیا۔ [مصنف ابن ابي شيبه/كتاب الزكاة/حدیث: 10691]

حضرت مجاہد فرماتے ہیں کہ یہودیوں اور نصرانیوں کو صدقہ نہ دو مگر تب جب ان کے علاوہ کسی کو نہ پاؤ۔ [مصنف ابن ابي شيبه/كتاب الزكاة/حدیث: 10692]

حضرت ابو رزین فرماتے ہیں کہ میں حضرت شقیق بن سلمہ کے ساتھ تھا کہ ان کے پاس سے مشرک قیدی گذرے تو آپ نے مجھے حکم فرمایا کہ ان کو صدقہ دوں اور پھر یہ آیت تلاوت فرمائی کہ { وَیُطْعِمُوْنَ الطَّعَامَ عَلٰی حُبِّہٖ مِسْکِیْنًا وَّیَتِیْمًا وَّاَسِیْرًا }۔ [مصنف ابن ابي شيبه/كتاب الزكاة/حدیث: 10693]