حضرت علی رضی اللہ عنہ اور حضرت عبد اللہ فرماتے ہیں کہ جس شخص کے پاس پچاس درہم یا اس کے برابر سونا موجود ہو اس کو زکوٰۃ دینا جائز نہیں ہے۔ [مصنف ابن ابي شيبه/كتاب الزكاة/حدیث: 10724]

حضرت عبد اللہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جس شخص نے غنی ہونے کے باوجود سوال کیا قیامت کے دن وہ اپنے چہرے اور جسم کو نوچتا ہوا حاضر ہوگا۔ آپ صلی اللہ علیہ وآلہ وسلم سے پوچھا گیا کہ غناء کی مقدار کتنی ہے؟ آپ صلی اللہ علیہ وآلہ وسلم نے فرمایا پچاس درہم یا اس کی بقدر سونا (جس کے پاس ہو وہ غنی ہے)۔ [مصنف ابن ابي شيبه/كتاب الزكاة/حدیث: 10725]

ابراہیم فرماتے ہیں کہ جس شخص کے پاس پچاس درہم موجود ہوں اس کو زکوٰۃ نہیں دی جائے گی، اور نہ ہی کسی کو زکوٰۃ میں سے پچاس درہم سے زیادہ دیا جائے گا۔ [مصنف ابن ابي شيبه/كتاب الزكاة/حدیث: 10726]

حضرت سفیان اور حضرت حسن ارشاد فرماتے ہیں کہ جس کے پاس پچاس درہم موجود ہوں اس کو زکوٰۃ نہیں دی جائیگی اور نہ ہی پچاس دراھم سے زائد کسی کو دیا جائے گا۔ ہاں اگر کسی پر قرض ہو اور وہ اس سے قرض ادا کرے تو تو پھر پچاس دراہم سے زائد دے سکتے ہیں۔ [مصنف ابن ابي شيبه/كتاب الزكاة/حدیث: 10727]

حضرت مسعر فرماتے ہیں کہ میں نے حضرت حماد سے سنا وہ فرماتے ہیں کہ جس شخص کے پاس اتنا مال نہ ہو جس پر زکوٰۃ آتی ہے اس کو زکوٰۃ دے سکتے ہو۔ [مصنف ابن ابي شيبه/كتاب الزكاة/حدیث: 10728]

حضرت فضیل فرماتے ہیں کہ میں نے حضرت ابراہیم سے اہل اہواء کو زکوٰۃ دینے کے متعلق دریافت کیا؟ آپ نے فرمایا وہ لوگ سوال نہیں کرتے مگر حاجت کے وقت۔ [مصنف ابن ابي شيبه/كتاب الزكاة/حدیث: 10729]

حضرت طاؤس سے مروی ہے کہ نبی کریم صلی اللہ علیہ وآلہ وسلم نے حضرت معاذ کو یمن بھیجا اور حکم فرمایا کہ گندم اور جو میں سے زکوٰۃ و صدقات وصول کرنا۔ پس انہوں نے گندم اور جو کے بدلے سامان یعنی کپڑے وصول فرمائے۔ [مصنف ابن ابي شيبه/كتاب الزكاة/حدیث: 10730]

حضرت عطاء فرماتے ہیں کہ حضرت عمر صدقات و زکوٰۃ میں سکوں (چاندی) اور اس کے علاوہ دوسری اشیاء کے بدلے سامان وصول فرماتے تھے۔ [مصنف ابن ابي شيبه/كتاب الزكاة/حدیث: 10731]

حضرت طاؤس سے مروی ہے کہ حضرت معاذ نے فرمایا: تم لوگ میرے پاس وہ کپڑے جو پانچ گز لمبے ہیں اور وہ کپڑے جو تم استعمال کرتے ہو لے کر آؤ تا کہ میں تم سے وصول کروں۔ [مصنف ابن ابي شيبه/كتاب الزكاة/حدیث: 10732]

حضرت طاؤس سے مروی ہے کہ حضرت معاذ زکوٰۃ و صدقات میں سامان وصول فرمایا کرتے تھے۔ [مصنف ابن ابي شيبه/كتاب الزكاة/حدیث: 10733]