حضرت ابو العالیہ فرماتے ہیں کہ حضرت اسامہ نے اللہ کی راہ میں گھوڑا (بچھڑا) صدقہ فرمایا، پھر بعد میں اسی جانور کو دیکھا کہ وہ (بازار میں) بیچا جا رہا ہے، فرماتے ہیں کہ میں نے نبی کریم صلی اللہ علیہ وآلہ وسلم سے عرض کیا کہ میں نے اس کو پہچان لیا ہے (کیا اسکو خرید لوں؟) آپ نے مجھے اس سے منع فرما دیا۔ [مصنف ابن ابي شيبه/كتاب الزكاة/حدیث: 10804]

حضرت عمر فاروق ارشاد فرماتے ہیں کہ جسکو آپ نے زکوٰۃ (صدقہ) دیا ہے اس سے نکل کر کسی اور کے پاس پہنچ جائے تو پھر اس کو خریدنے میں کوئی حرج نہیں ہے۔ [مصنف ابن ابي شيبه/كتاب الزكاة/حدیث: 10805]

حضرت ابن عمر رضی اللہ عنہما سے مروی ہے کہ حضرت عمر نے گھوڑا اللہ کے راستے میں صدقہ کیا اور مجاہد کو سوار فرمایا بعد میں بازار میں ان کو دیکھا اور خود ہی دوبارہ خریدنے کا ارادہ فرمایا اور آنحضرت صلی اللہ علیہ وآلہ وسلم سے جا کر اس کے متعلق دریافت فرمایا: آپ صلی اللہ علیہ وآلہ وسلم نے فرمایا اس کو چھوڑ دو تا کہ قیامت کے دن اس کا (پورا) بدلہ تجھے عطاء کیا جائے۔ [مصنف ابن ابي شيبه/كتاب الزكاة/حدیث: 10806]

حضرت زید بن حارثہ سے بھی نبی کریم صلی اللہ علیہ وآلہ وسلم سے حضرت اسامہ کی حدیث کے مثل منقول ہے۔ [مصنف ابن ابي شيبه/كتاب الزكاة/حدیث: 10807]

حضرت عمران بن حصین سے ایک شخص نے دریافت فرمایا کہ صدقہ (زکوٰۃ) ادا کرنے کے بعد آدمی کو کچھ حصہ واپس مل جائے تو اس کا کیا حکم ہے؟ آپ نے فرمایا کہ جتنی مقدار اس کو پہنچا ہے اس کے بقدر اجر کم کردیا جائے گا۔ [مصنف ابن ابي شيبه/كتاب الزكاة/حدیث: 10808]

حضرت ابو سعید خدری سے مروی ہے کہ نبی کریم صلی اللہ علیہ وآلہ وسلم نے صدقات کو خریدنے سے منع فرمایا ہے یہاں تک کہ ان پر قبضہ کرلیا جائے۔ [مصنف ابن ابي شيبه/كتاب الزكاة/حدیث: 10809]

حضرت طاؤس سے دریافت کیا گیا کہ کیا صدقہ کو قبضہ سے قبل خریدا جاسکتا ہے؟ آپ نے اس کو ناپسند فرمایا۔ [مصنف ابن ابي شيبه/كتاب الزكاة/حدیث: 10810]

حضرت مکحول فرماتے ہیں کہ صدقہ کو نہ خریدو یہاں تک کہ نشان لگا لیا جائے اور تم سے قبضہ کرلیا جائے۔ [مصنف ابن ابي شيبه/كتاب الزكاة/حدیث: 10811]

حضرت مکحول سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: صدقہ کو دوبارہ مت خریدو یہاں تک کہ نشان لگا لیا جائے۔ [مصنف ابن ابي شيبه/كتاب الزكاة/حدیث: 10812]

حضرت ہشام سے مروی ہے کہ حضرت حسن اور حضرت محمد ناپسند فرماتے تھے کہ آدمی اپنے مال سے ادا شدہ صدقات خرید لے یہاں تک کہ صدقہ وصول کرنے والے کے پاس سے پھیرلیا جائے۔ [مصنف ابن ابي شيبه/كتاب الزكاة/حدیث: 10813]