حضرت سالم ابی عبد اللہ البراد فرماتے ہیں کہ میں نے حضرت عبد اللہ بن مسعود رضی اللہ عنہ سے سنا آپ فرماتے ہیں میں انگاروں پر چلوں یہ مجھے زیادہ پسند ہے اس بات سے کہ میں کسی مسلمان کی قبر کو روندوں۔ [مصنف ابن ابي شيبه/كتاب الجنائز/حدیث: 12131]

حضرت عقبہ بن عامر فرماتے ہیں کہ میں آگ کے انگاروں پر یا تلوار کی دھار پر چلوں یہاں تک کہ میرا پاؤں کٹ جائے یہ مجھے زیادہ پسند ہے اس بات سے کہ میں کسی مسلمان کی قبر پر چلوں۔ میرے نزدیک قبرستان میں رفع حاجت کرنا اور بازار میں لوگوں کے درمیان جبکہ لوگ دیکھ رہے ہوں برابر ہے۔ [مصنف ابن ابي شيبه/كتاب الجنائز/حدیث: 12132]

حضرت حسن اور حضرت محمد قبروں پر بیٹھنے اور ان کے اوپر سے چلنے کو ناپسند فرماتے تھے۔ [مصنف ابن ابي شيبه/كتاب الجنائز/حدیث: 12133]

حضرت عمران بن حدیر فرماتے ہیں کہ حضرت ابو العلاء بن الشخیر نے فرمایا: فلاں تم اپنی قبروں کے اوپر سے گزرتے (چلتے) ہو؟ میں نے کہا ہاں۔ آپ نے فرمایا: پھر تم پر بارش کس طرح برسائی جاتی ہے۔ [مصنف ابن ابي شيبه/كتاب الجنائز/حدیث: 12134]

حضرت محمد بن ابی یحییٰ اپنے والد سے روایت کرتے ہیں کہ میں جنازوں میں حضرت ابو ہریرہ رضی اللہ عنہ کے پیچھے پیچھے چلا کرتا تھا، آپ قبروں سے بچ کر چلتے تھے، آپ نے فرمایا: تم میں سے کوئی انگارے پر بیٹھے اور وہ اس کے کپڑے جلا دے، پھر اس کی قمیص، پھر اس کا تہبند، یہاں تک کہ اس کی کھال تک پہنچ جائے، یہ مجھے اس سے زیادہ پسند ہے کہ وہ کسی قبر پر بیٹھے۔ [مصنف ابن ابي شيبه/كتاب الجنائز/حدیث: 12135]

حضرت برد فرماتے ہیں کہ حضرت مکحول قبروں پر بیٹھنے اور ان کے اوپر سے گذرنے کو ناپسند کرتے تھے۔ [مصنف ابن ابي شيبه/كتاب الجنائز/حدیث: 12136]

حضرت جابر سے مروی ہے کہ نبی کریم صلی اللہ علیہ وآلہ وسلم نے قبروں پر بیٹھنے سے منع فرمایا۔ [مصنف ابن ابي شيبه/كتاب الجنائز/حدیث: 12137]

حضرت مجاہد فرماتے ہیں کہ مقبروں کے درمیان قضائے حاجت یا پیشاب مت کرو۔ [مصنف ابن ابي شيبه/كتاب الجنائز/حدیث: 12138]

حضرت عقبہ بن عامر فرماتے ہیں کہ مجھے اس بات کی کوئی پروا نہیں ہے کہ میں قبروں کے درمیان قضائے حاجت کروں یا بازار میں اور لوگ مجھے دیکھ رہے ہوں۔ [مصنف ابن ابي شيبه/كتاب الجنائز/حدیث: 12139]

حضرت زاذان فرماتے ہیں کہ حضرت علی رضی اللہ عنہ کرم اللہ وجہہ کسی قبرستان میں داخل ہوتے تو یہ دعا پڑھتے۔ اس جگہ کے مومنوں اور مسلمانوں تم پر سلامتی ہو، تم پہلے چلے گئے ہم تمہارے بعد آئیں گے اور تم سے مل جائیں گے۔ ہم سب اللہ کے لیے ہیں اور ہمیں اسی کی طرف لوٹ کر جانا ہے۔ [مصنف ابن ابي شيبه/كتاب الجنائز/حدیث: 12140]