حضرت خالد بن حارث فرماتے ہیں کہ حضرت ہشام سے سوال کیا گیا کیا حضرت عروہ نبی کریم صلی اللہ علیہ وآلہ وسلم کی قبر مبارک پر آ کر سلام عرض کرتے تھے؟ آپ نے فرمایا کہ نہیں۔ [مصنف ابن ابي شيبه/كتاب الجنائز/حدیث: 12151]

حضرت نافع فرماتے ہیں کہ حضرت عبد اللہ بن عمر رضی اللہ عنہما جب (سفر پر) نکلنے کا ارادہ فرماتے تو مسجد نبوی (صلی اللہ علیہ وآلہ وسلم) میں داخل ہوتے اور نماز ادا کرتے پھر روضۂ رسول پر آتے اور یوں سلام پیش فرماتے: السَّلاَمُ عَلَیْکَ یَا رَسُولَ اللہِ السَّلاَمُ عَلَیْکَ یَا أَبَا بَکْرٍ السَّلاَمُ عَلَیْک یَا أَبَتَاہُ پھر اپنے سفر پر روانہ ہوجاتے، اسی طرح جب آپ سفر سے تشریف لاتے تو گھر داخل ہونے سے پہلے مسجد آتے اور یہ کام کرتے۔ [مصنف ابن ابي شيبه/كتاب الجنائز/حدیث: 12152]

حضرت ثمامہ بن شفی فرماتے ہیں کہ ہم حضرت معاویہ کے دور میں غزوہ (جنگ) کے لئے اس درّے (سرحدی راستے) کی طرف نکلے، ہمارے امیر حضرت فضالہ بن عبید تھے، میرے چچا کے لڑکے نافع نامی انتقال کر گئے، حضرت فضالہ ہمارے ساتھ ان کی قبر پر کھڑے ہوئے، جب ہم نے اس کو دفن کردیا، تو آپ نے فرمایا اس کی قبر ہلکی اور برابر کرو، بیشک رسول اللہ صلی اللہ علیہ وآلہ وسلم قبروں کو برابر کرنے کا حکم دیا کرتے تھے۔ [مصنف ابن ابي شيبه/كتاب الجنائز/حدیث: 12153]

حضرت عبد اللہ بن شرحبیل فرماتے ہیں کہ حضرت عثمان نکلے اور قبروں کو برابر کرنے کا حکم فرمایا: ہم نے تمام قبریں برابر کردیں سوائے ام عمرو بنت عثمان کی قبر کے، آپ نے پوچھا یہ کس کی قبر ہے؟ لوگوں نے عرض کیا ام عمرو کی قبر ہے، آپ نے اس کو بھی برابر کرنے کا حکم فرمایا چناچہ وہ بھی برابر کردی گئی۔ [مصنف ابن ابي شيبه/كتاب الجنائز/حدیث: 12154]

حضرت حنش الکنانی فرماتے ہیں کہ حضرت علی رضی اللہ عنہ پولیس کے سربراہ کے پاس گئے اور اس سے فرمایا، چلتا جا، کوئی نقش و نگار (آرائش) نہ چھوڑنا مگر اسے گرا دینا، اور کوئی قبر بغیر برابر کیے نہ چھوڑنا، آپ نے اس کو بلا کر پوچھا کہ تجھے معلوم ہے میں نے تجھے کس کام کیلئے بھیجا ہے؟ اس کام کیلئے بھیجا ہے جس کام کیلئے رسول اکرم (صلی اللہ علیہ وآلہ وسلم) نے مجھے بھیجا تھا۔ [مصنف ابن ابي شيبه/كتاب الجنائز/حدیث: 12155]

حضرت ابن عباس رضی اللہ عنہما کے غلام فرماتے ہیں مجھ سے حضرت عبد اللہ بن عباس رضی اللہ عنہما نے فرمایا: جب تو کسی قوم کو دیکھے جس نے مردے کو دفن کر کے قبر ایسی بنائی ہو جو مسلمانوں کی قبروں کی طرح نہ ہو تو تم اس کو مسلمانوں کی قبروں کے برابر کردو۔ [مصنف ابن ابي شيبه/كتاب الجنائز/حدیث: 12156]

حضرت ابو مجلز فرماتے ہیں کہ قبروں کر برابر کرنا سنت میں سے ہے۔ [مصنف ابن ابي شيبه/كتاب الجنائز/حدیث: 12157]

حضرت ابو مجلز سے اسی کے مثل منقول ہے۔ [مصنف ابن ابي شيبه/كتاب الجنائز/حدیث: 12158]

حضرت منصور بن عبد الرحمن فرماتے ہیں کہ ایک شخص نے حضرت امام شعبی سے عرض کیا ایک شخص نے اپنی میت کو دفن کای اور اس کی قبر زمین کے برابر بنائی (کیا درست ہے؟) آپ نے فرمایا میں نے شھدائے احد کی قبریں دیکھی ہیں وہ زمین سے بلند اوپر اٹھی ہوئی ہیں۔ [مصنف ابن ابي شيبه/كتاب الجنائز/حدیث: 12159]

حضرت ابن عون فرماتے ہیں کہ حضرت محمد بن سیرین سے قبر کو لیپنے کے بارے میں سوال کیا گیا؟ آپ نے فرمایا میں اس میں کوئی حرج نہیں سمجھتا۔ [مصنف ابن ابي شيبه/كتاب الجنائز/حدیث: 12160]