حضرت عبد اللہ بن حبیب بن ابی ثابت فرماتے ہیں کہ میں نے حضرت عطاء سے دریافت کیا حائضہ عورت نماز جنازہ ادا کرے گی؟ آپ نے فرمایا نہیں۔ [مصنف ابن ابي شيبه/كتاب الجنائز/حدیث: 12261]

حضرت ثور ایک شخص سے روایت کرتے ہیں کہ حضرت ابو عبیدہ نے شام میں کھوپڑیوں پر نماز جنازہ ادا فرمائی۔ [مصنف ابن ابي شيبه/كتاب الجنائز/حدیث: 12262]

حضرت خالد بن معدان سے اسی کے مثل منقول ہے۔ [مصنف ابن ابي شيبه/كتاب الجنائز/حدیث: 12263]

حضرت سفیان ایک شخص سے روایت کرتے ہیں کہ حضرت ابو ایوب نے ایک ٹانگ پر نماز پڑھائی۔ [مصنف ابن ابي شيبه/كتاب الجنائز/حدیث: 12264]

حضرت عامر سے مروی ہے کہ حضرت عمر نے ہڈیوں پر نماز جنازہ ادا فرمائی شام کے علاقہ میں۔ [مصنف ابن ابي شيبه/كتاب الجنائز/حدیث: 12265]

حضرت صاعد بن مسلم فرماتے ہیں کہ حضرت شعبی سے دریافت کیا گیا کہ مقتول تین جگہوں میں (محلوں) پایا گیا، اس کا سر ایک جگہ، درمیانہ حصہ ایک جگہ اور ٹانگیں دوسری جگہ؟ آپ نے فرمایا اس کے درمیانی حصہ پر نماز جنازہ ادا کی جائے گی۔ [مصنف ابن ابي شيبه/كتاب الجنائز/حدیث: 12266]

حضرت عامر بن ربیعہ اس حدیث کو نبی کریم صلی اللہ علیہ وآلہ وسلم تک پہنچاتے ہیں کہ آپ صلی اللہ علیہ وآلہ وسلم نے ارشاد فرمایا: جب تم جنازہ گزرتے ہوئے دیکھو تو کھڑے ہو جاؤ یہاں تک کہ وہ تمہیں پیچھے چھوڑ (کر آگے نکل جائے) یا وہ رکھ دیا جائے۔ [مصنف ابن ابي شيبه/كتاب الجنائز/حدیث: 12267]

حضرت عامر بن ربیعہ سے اسی کے مثل منقول ہے۔ [مصنف ابن ابي شيبه/كتاب الجنائز/حدیث: 12268]

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم کے پاس سے ایک جنازہ گزرا تو آپ صلی اللہ علیہ وآلہ وسلم کھڑے ہوگئے اور اپنے ساتھ والوں سے فرمایا: کھڑے ہو جاؤ بیشک موت کے لیے خوف اور گھبراہٹ ہے۔ [مصنف ابن ابي شيبه/كتاب الجنائز/حدیث: 12269]

حضرت خارجہ بن زید اپنے چچا حضرت یزید بن ثابت سے روایت کرتے ہیں کہ وہ نبی کریم صلی اللہ علیہ وآلہ وسلم کے ساتھ تشریف فرما تھے کہ ایک جنازہ نکلا، جب نبی کریم صلی اللہ علیہ وآلہ وسلم نے اس کو دیکھا تو آپ صلی اللہ علیہ وآلہ وسلم کھڑے ہوگئے اور آپ صلی اللہ علیہ وآلہ وسلم کے صحابہ بھی کھڑے ہوگئے اور جنازے کے گزرنے تک کھڑے رہے، اللہ کی قسم! میں نہیں جانتا کہ آپ اس (جنازے) سے تکلیف کی وجہ سے کھڑے ہوئے یا جگہ کی تنگی کی وجہ سے، اور میرا خیال ہے کہ یہ یہودی مرد یا عورت کا جنازہ تھا ہم نے نبی صلی اللہ علیہ وآلہ وسلم سے اس کھڑے ہونے کی وجہ دریافت نہ کی۔ [مصنف ابن ابي شيبه/كتاب الجنائز/حدیث: 12270]