حضرت محمد بن سیرین فرماتے ہیں کہ مجھ سے ایک عورت نے بیان کیا جو ہمارے پاس آیا کرتی تھی جس کا نام ماویہ تھا، وہ کہتی ہے کہ میں حضرت عبید اللہ بن معمر کی خدمت میں حاضر ہوئی ان کے پاس نبی کریم صلی اللہ علیہ وآلہ وسلم کے صحابہ میں سے ایک صحابی موجود تھے، اس صحابی نے بیان کیا کہ نبی کریم صلی اللہ علیہ وآلہ وسلم کی خدمت میں ایک خاتون اپنا بچہ لے کر حاضر ہوئی اور عرض کیا اے اللہ کے رسول! اس کے لیے دعا فرمائیں کہ اللہ تعالیٰ اس کو باقی رکھیں بیشک میرے تین بچے فوت ہوچکے ہیں، آنحضرت صلی اللہ علیہ وآلہ وسلم نے اس سے فرمایا: کیا جب سے تو مسلمان ہوئی ہے تب سے؟ اس نے کہا جی ہاں، آپ صلی اللہ علیہ وآلہ وسلم نے ارشاد فرمایا: وہ تیرے لیے آگ سے محفوظ ڈھال ہے۔ البتہ آپ صلی اللہ علیہ وآلہ وسلم نے اس سے تین بار فرمایا: کیا جب سے تو مسلمان ہوئی ہے؟ (پھر فرمایا:) آگ سے محفوظ ڈھال ہے۔ ماویہ کہتی ہیں کہ پھر حضرت عبید اللہ نے مجھ سے کہا: اے ماویہ! آؤ اور یہ حدیث سنو۔ ابن سیرین کہتے ہیں کہ اس نے یہ حدیث سنی، پھر وہ حضرت عبید اللہ کے پاس سے نکلی اور ہمارے پاس آکر ہمیں یہ حدیث سنائی۔ [مصنف ابن ابي شيبه/كتاب الجنائز/حدیث: 12251]

حضرت عطاء فرماتے ہیں کہ اگر مرد اور عورت کو ایک ہی قبر میں دفن کیا جائے تو مرد کو عورت کے آگے مقدم کریں گے۔ [مصنف ابن ابي شيبه/كتاب الجنائز/حدیث: 12252]

حضرت مجاہد اور حضرت عطاء فرماتے ہیں کہ اگر مرد اور عورت کو ایک ہی قبر میں دفن کیا جائے تو مرد کو عورت کے آگے مقدم کریں گے۔ [مصنف ابن ابي شيبه/كتاب الجنائز/حدیث: 12253]

حضرت ابو اسحاق فرماتے ہیں کہ حضرت علی رضی اللہ عنہ کرم اللہ وجہہ جب مردوں اور عورتوں کا اکٹھا جنازہ پڑھاتے تو مردوں کو امام کی طرف (قریب) رکھتے اور عورتوں کو قبلہ کے قریب رکھتے۔ اور جب ان کو دفن فرماتے تو پہلے مردوں کو رکھتے پھر عورتوں کو۔ [مصنف ابن ابي شيبه/كتاب الجنائز/حدیث: 12254]

حضرت قتادہ فرماتے ہیں کہ اگر ایک قبر میں مرد اور عورت کو دفن کیا جائے تو مرد کو اس کے آگے مقدم کیا جائے گا۔ [مصنف ابن ابي شيبه/كتاب الجنائز/حدیث: 12255]

حضرت قتادہ سے اسی کے مثل منقول ہے۔ [مصنف ابن ابي شيبه/كتاب الجنائز/حدیث: 12256]

حضرت واثلہ بن اسقع فرماتے ہیں کہ وہ نصرانی عورت جس کے پیٹ میں مسلمان کا بچہ ہو تو اس مقبرہ میں دفن کریں گے جو یہود و نصاریٰ کا نہ ہو۔ [مصنف ابن ابي شيبه/كتاب الجنائز/حدیث: 12257]

حضرت عمرو فرماتے ہیں کہ ایک نصرانی عورت کا شام میں انتقال ہوگیا اس کے پیٹ میں مسلمان کا بچہ تھا، حضرت عمر نے فرمایا اس کو اس کے بچے کی وجہ سے مسلمانوں کے قبرستان میں دفن کرو۔ [مصنف ابن ابي شيبه/كتاب الجنائز/حدیث: 12258]

حضرت قاسم فرماتے ہیں کہ حائضہ عورت نماز جنازہ نہیں ادا کرے گی۔ [مصنف ابن ابي شيبه/كتاب الجنائز/حدیث: 12259]

حضرت محل فرماتے ہیں کہ حضرت امام شعبی سے حائضہ عورت کے متعلق دریافت کیا گیا کہ کیا وہ نماز جنازہ ادا کرے گی؟ آپ نے فرمایا: نہ حائضہ ادا کرے گی اور نہ ہی طاھرہ عورت۔ [مصنف ابن ابي شيبه/كتاب الجنائز/حدیث: 12260]