حضرت عبد اللہ بن قیس فرماتے ہیں کہ میں حضرت ابو بردہ کے پاس ایک رات بیٹھا ہوا تھا، حضرت حارث بن اقیش ہمارے پاس تشریف لائے اور اس رات ہمیں حدیث بیان فرمائی کہ نبی کریم صلی اللہ علیہ وآلہ وسلم نے ارشاد فرمایا: جس مسلمان شوہر و بیوی کے چار چھوٹے بچے انتقال کر جائیں اللہ پاک ان دونوں کو جنت میں داخل فرمائیں گے، صحابہ کرام نے عرض کیا یا رسول اللہ! تین بچے؟ آپ صلی اللہ علیہ وآلہ وسلم نے فرمایا تین، صحابہ کرام نے عرض کیا یا رسول اللہ! دو بچے؟ آپ صلی اللہ علیہ وآلہ وسلم نے فرمایا اور دو بھی۔ [مصنف ابن ابي شيبه/كتاب الجنائز/حدیث: 12241]

حضرت معاذ بن جبل سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: تین چھوٹے بچے فوت ہوجانے والوں پر جنت واجب ہے، صحابہ نے عرض کیا یا رسول اللہ! دو بچے والوں پر؟ آپ صلی اللہ علیہ وآلہ وسلم نے دو بچوں والوں بھی جنت واجب ہوچکی۔ [مصنف ابن ابي شيبه/كتاب الجنائز/حدیث: 12242]

حضرت ابو امامہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جن مسلمان والدین کے تین چھوٹے نابالغ بچے فوت ہوچکے ہوں اللہ تعالیٰ اپنی رحمت کے فضل سے ان کو (والدین کو) جنت میں داخل فرمائیں گے۔ [مصنف ابن ابي شيبه/كتاب الجنائز/حدیث: 12243]

حضرت ام سلیم فرماتی ہیں کہ میں نے رسول اکرم (صلی اللہ علیہ وآلہ وسلم) کو ارشاد فرماتے ہوئے سنا کہ: جن مسلمان والدین کے تین چھوٹے نابالغ بچے فوت ہوچکے ہوں اللہ تعالیٰ اپنی رحمت کے فضل سے ان کو (والدین کو) جنت میں داخل فرمائیں گے۔ [مصنف ابن ابي شيبه/كتاب الجنائز/حدیث: 12244]

حضرت عائشہ رضی اللہ عنہا فرماتی ہیں کہ جس کے تین چھوٹے بچے اس حالت میں انتقال کر گئے کہ وہ صابر ہے اور ثواب کا امید وار ہے تو وہ اس کے لئے اللہ کے حکم سے آگ سے حجاب ہوں گے۔ [مصنف ابن ابي شيبه/كتاب الجنائز/حدیث: 12245]

حضرت ابو ذر فرماتے ہیں کہ میں نے رسول اللہ صلی اللہ علیہ وآلہ وسلم کو ارشاد فرماتے ہوئے سنا: جن مسلمان والدین کے تین چھوٹے نابالغ بچے فوت ہوچکے ہوں اللہ تعالیٰ اپنی رحمت کے فضل سے ان کو (والدین کو) جنت میں داخل فرمائیں گے۔ [مصنف ابن ابي شيبه/كتاب الجنائز/حدیث: 12246]

حضرت عبد اللہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جن مسلمان والدین کے تین نابالغ بچے وفات پاجائیں اللہ تعالیٰ ان دونوں کو جنت میں داخل فرمائیں گے، حضرت ابو ذر نے عرض کیا یا رسول اللہ! میرے دو بچے فوت ہوچکے ہیں آپ صلی اللہ علیہ وآلہ وسلم نے فرمایا اور دو میں بھی (جنت واجب ہے) حضرت ابو المنذر سید القراء نے عرض کیا یا رسول اللہ! میرا ایک بچہ فوت ہوچکا ہے آپ صلی اللہ علیہ وآلہ وسلم نے ارشاد فرماتا ایک میں بھی اور یہ (اجر) پہلے صدمے کے وقت ہے۔ [مصنف ابن ابي شيبه/كتاب الجنائز/حدیث: 12247]

حضرت معاویہ بن قرہ اپنے والد سے روایت کرتے ہیں کہ ایک شخص حضور اقدس کی خدمت میں حاضر ہوا اس کے ساتھ اس کا چھوٹا بیٹا بھی تھا، آپ صلی اللہ علیہ وآلہ وسلم نے اس سے فرمایا کیا تو اس سے محبت کرتا ہے؟ اس نے عرض کیا: جی ہاں، آپ نے فرمایا اللہ تعالیٰ تجھ سے محبت کرے جس طرح تو اس سے محبت کرتا ہے، پھر (کچھ عرصہ بعد) آپ صلی اللہ علیہ وآلہ وسلم نے اس بچے کو گم پایا تو فرمایا: تیرے بیٹے کو کیا ہوا؟ اس نے عرض کیا: کیا آپ کو معلوم نہیں ہوا کہ وہ فوت ہوگیا ہے؟ پھر آنحضرت صلی اللہ علیہ وآلہ وسلم نے اس سے فرمایا: کیا تو اس بات سے راضی نہیں ہے کہ تو جنت کے دروازوں میں سے کسی دروازے پر آئے اس کو کھلوانے کیلئے، مگر تیرا بیٹا دوڑتا ہوا آئے اور تیرے لیے جنت کا دروازہ کھلوا دے؟ کسی نے عرض کیا یا رسول اللہ! یہ صرف میرے لیے خاص ہے یا لوگوں کیلئے عام ہے؟ آپ صلی اللہ علیہ وآلہ وسلم نے فرمایا تم سب کے لیے ہے۔ [مصنف ابن ابي شيبه/كتاب الجنائز/حدیث: 12248]

حضرت علی رضی اللہ عنہ کرم اللہ وجہہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: بیشک ناتمام بچہ اپنے رب سے اصرار کے ساتھ جھگڑے گا جب اس کے والدین کو آگ میں داخل کیا جائے گا، یہاں تک کہ اس کو کہا جائے گا، اے اپنے رب سے جھگڑنے والے ناتمام بچے! لوٹ جا، بیشک میں نے تیرے والدین کو جنت میں داخل کردیا ہے، اور فرمایا: وہ بچہ ان دونوں کو (والدین کو) ناف کاٹنے کی جگہ سے کھینچ کر جنت میں داخل کروا دے گا۔ [مصنف ابن ابي شيبه/كتاب الجنائز/حدیث: 12249]

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: ناتمام (کچا) بچہ جو میں اپنے آگے بھیج دوں مجھے زیادہ پسند ہے اس بات سے کہ وہ شہسوار بن کر (میدان جہاد) میں میرے پیچھے آئے۔ [مصنف ابن ابي شيبه/كتاب الجنائز/حدیث: 12250]