حضرت ابراہیم فرماتے ہیں کہ میت کو غسل دینے والا ہر غسل کے بعد استراحت کی بقدر بیٹھے گا۔ [مصنف ابن ابي شيبه/كتاب الجنائز/حدیث: 11221]

حضرت ابراہیم فرماتے ہیں کہ میت کو کلی اور ناک میں پانی نہ ڈالا جائے گا۔ لیکن صاف کپڑے کا ٹکڑا لے کر اس کے منہ اور ناک کو صاف کیا جائے گا۔ [مصنف ابن ابي شيبه/كتاب الجنائز/حدیث: 11222]

حضرت ابو تمیمہ الہجیمی فرماتے ہیں کہ حضرت عمر نے حضرت ابو موسیٰ اشعری کو لکھا کہ دانیال (علیہ السلام) کو بیری اور ریحان کے پانی سے غسل دو۔ [مصنف ابن ابي شيبه/كتاب الجنائز/حدیث: 11223]

حضرت عبد اللہ بن عمرو رضی اللہ عنہ سے مروی ہے کہ ان کے والد نے ان کو وصیت فرمائی اے بیٹے! جب میں مر جاؤں تو مجھے پانی سے غسل دینا پھر کسی کپڑے سے میرے جسم کو خشک کردینا اور پھر دوسری بار خالص پانی سے غسل دینا، اور پھر کپڑے سے سکھا دینا پھر جب تم مجھے کپڑے (کفن) پہنا دو تو مجھے ازار بھی پہنانا۔ [مصنف ابن ابي شيبه/كتاب الجنائز/حدیث: 11224]

حضرت حسن فرماتے ہیں کہ میت کو پہلی بار خالص پانی سے غسل دیا جائے گا اور دوسری بار پانی اور بیری سے اور تیسری بار پانی اور کافور سے، پھر کافور لے کر میت کی سجدے کی جگہوں پر رکھی جائے گی۔ [مصنف ابن ابي شيبه/كتاب الجنائز/حدیث: 11225]

حضرت ابو قلابہ جب میت کو غسل دیتے تو بیری (کے پتوں) کا حکم فرماتے، پھر اس (کے پانی) کو کپڑے میں چھان لیا جاتا، اس کے صاف پانی سے غسل دیا جاتا اور اس کا تلچھٹ پھینک دیا جاتا۔ [مصنف ابن ابي شيبه/كتاب الجنائز/حدیث: 11226]

حضرت ابی سے مروی ہے کہ جب حضرت آدم کا آخری وقت آیا تو آپ نے اپنے بیٹوں کو حکم دیا کہ وہ ان کے لئے جنت کے پھل لے کر آئیں، پس وہ چلے گئے، جب وہ فرشتوں سے ملے تو فرشتوں نے کہا، تم واپس لوٹو اللہ تعالیٰ نے تمہارے والد کی روح قبض کرنے کا حکم فرمایا ہے، وہ فرشتے ان کے ساتھ لوٹے اور ان کی روح قبض فرمائی اور وہ اپنے ساتھ کفن اور خوشبو لائے اور ان کے بیٹوں سے کہا، ان کے پاس حاضر ہو جاؤ، ان کو غسل دو، ان کو کفن دو اور خوشبو لگاؤ اور ان پر نماز پڑھو، پھر فرمایا اے بنی آدم! یہ تمہارے درمیان (جاری رہنے والی) سنت ہے۔ [مصنف ابن ابي شيبه/كتاب الجنائز/حدیث: 11227]

حضرت حکیم بن جابر الاحمسی فرماتے ہیں کہ جب حضرت اشعث بن قیس کا انتقال ہوا، ان کی بیٹی حضرت حسن بن علی رضی اللہ عنہ کی زوجہ تھیں، حضرت حسن بن علی رضی اللہ عنہ نے فرمایا جب تم ان کو غسل دیدو تو مجھے بتائے بغیر ان کو کفن نہ پہنانا۔ ہم نے ان کو بتایا تو آپ نے ان کو خوشبو کے ساتھ وضو کروایا۔ [مصنف ابن ابي شيبه/كتاب الجنائز/حدیث: 11228]

حضرت ابراہیم فرماتے ہیں کہ میت کو غسل دیتے وقت وضو کے بعد سر سے ابتدا کی جائے گی۔ [مصنف ابن ابي شيبه/كتاب الجنائز/حدیث: 11229]

ابراہیم فرماتے ہیں پہلے میت کو پانی سے نماز والا وضو کروایا جائے گا، پھر پانی اور بیری سے غسل دیا جائے گا اور پھر پانی سے غسل دیا جائے گا۔ [مصنف ابن ابي شيبه/كتاب الجنائز/حدیث: 11230]