حضرت امام شعبی سے مروی ہے کہ جب حضرت سلمان بلنجر کے غزوہ میں شریک ہوئے تو غنیمت کی تقسیم میں مشک کی تھیلی ملی، جب وہ واپس آئے تو وہ تھیلی اپنی اہلیہ کے پاس امانت رکھوا دی، پھر جب وہ مریض ہوئے، جس مرض میں ان کی وفات ہوئی تو انہوں نے اپنی اہلیہ سے فرمایا: جو تھیلی میں نے آپ کے پاس امانت رکھوائی تھی وہ لا کر مجھے دکھاؤ، وہ تھیلی لے کر حاضر ہوگئیں، آپ نے فرمایا: میرے پاس ایک صاف برتن لاؤ، وہ برتن لے آئیں تو آپ نے فرمایا: اس (مشک) کو (پانی میں) گھول دو پھر اس کو میرے اردگرد چھڑک دو، کیونکہ میرے اردگرد ایسی مخلوق حاضر ہوتی ہے جو کھاتی (پیتی) نہیں ہے مگر خوشبو (محسوس) کرتے ہیں اور پھر فرمایا میرے پاس سے باہر چلی جاؤ اور (پھر آکر) میری خبر لینا، وہ فرماتی ہیں کہ میں نکل گئی پھر جب میں واپس آئی تو آپ کی روح اس دنیا سے کوچ کرچکی تھی۔ [مصنف ابن ابي شيبه/كتاب الجنائز/حدیث: 11361]

حضرت نافع فرماتے ہیں کہ حضرت عبد اللہ بن عمر رضی اللہ عنہما میت کو مشک سے خوشبو لگایا کرتے تھے۔ [مصنف ابن ابي شيبه/كتاب الجنائز/حدیث: 11362]

حضرت ابن مغفل سے مروی ہے کہ حضرت عمر ارشاد فرماتے ہیں مجھے مشک بطور خوشبو تم نہ لگانا۔ [مصنف ابن ابي شيبه/كتاب الجنائز/حدیث: 11363]

حضرت سفیان بن عاصم فرماتے ہیں کہ میں حضرت عمر بن عبد العزیز کے پاس حاضر ہوا آپ اپنی خادمہ سے فرما رہے تھے، میرا خیال ہے کہ تو میرے مرنے کے بعد میت کو لگانی والی خوشبو تیار کرنے کا مطالبہ تجھ سے ہوگا تو اس میں مشک شامل نہ کرنا۔ [مصنف ابن ابي شيبه/كتاب الجنائز/حدیث: 11364]

حضرت عطاء فرماتے ہیں کہ میت کو عنبر لگانے میں کوئی حرج نہیں ہے۔ فرماتے ہیں کہ یہ تو گوند (شیرے) کی مانند ہے، اور مشک کو زندہ اور میت دونوں کیلئے ناپسند سمجھتے ہیں اور فرماتے ہیں وہ تو مردہ ہے۔ [مصنف ابن ابي شيبه/كتاب الجنائز/حدیث: 11365]

حضرت مجاہد میت کو مشک لگانے کو ناپسند فرماتے ہیں۔ [مصنف ابن ابي شيبه/كتاب الجنائز/حدیث: 11366]

حضرت حسن مشک خوشبو زندہ اور میت دونوں کیلئے ناپسند فرماتے ہیں اور فرماتے ہیں مسلمان تو اس کو ناپسند کرتے ہیں اور کہتے ہیں یہ تو مردہ ہے۔ [مصنف ابن ابي شيبه/كتاب الجنائز/حدیث: 11367]

حضرت ضحاک میت کو مشک لگانے کو ناپسند فرماتے ہیں۔ [مصنف ابن ابي شيبه/كتاب الجنائز/حدیث: 11368]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم کو تین یمنی کپڑوں میں کفن دیا گیا، اس میں (کفن میں) قمیص اور عمامہ شامل نہ تھا، راوی کہتے ہیں کہ ہم نے حضرت عائشہ رضی اللہ عنہا سے عرض کیا کہ لوگوں کا تو یہ گمان ہے کہ آپ صلی اللہ علیہ وآلہ وسلم کو یمنی دھاری دار چادر (حبرہ) میں کفن دیا گیا ہے؟ آپ نے فرمایا یمنی دھاری دار چادر لائی تو گئی تھی لیکن اس میں کفن نہ دیا گیا آپ صلی اللہ علیہ وآلہ وسلم کو۔ [مصنف ابن ابي شيبه/كتاب الجنائز/حدیث: 11369]

حضرت عبد اللہ بن عباس رضی اللہ عنہما ارشاد فرماتے ہیں کہ نبی کریم صلی اللہ علیہ وآلہ وسلم کو تین کپڑوں میں کفن دیا گیا، اس میں ایک تو وہ قمیص تھی جس میں آپ کی وفات ہوئی تھی اور (دوسرا) آپ کا نجرانی جوڑا تھا، یعنی دو ایک ہی طرح کے کپڑے۔ [مصنف ابن ابي شيبه/كتاب الجنائز/حدیث: 11370]