حسن فرماتے ہیں کہ میت کے پاخانے کے مقام، کانوں اور ناک میں (روئی) بھر دی جائے گی۔ [مصنف ابن ابي شيبه/كتاب الجنائز/حدیث: 11351]

حضرت ربیع فرماتے ہیں کہ میں نے حضرت ابن سیرین سے سنا میت کے دبر، منہ اور ناک میں روئی بھر دی جائے گی، محمد کہتے ہیں اس کے پاخانے کی جگہ پر جو علاج کرنا پڑے (کوئی چیز رکھنا پڑے) وہ اپنے بائیں ہاتھ سے کرنا۔ [مصنف ابن ابي شيبه/كتاب الجنائز/حدیث: 11352]

حضرت جابر بن زید فرماتے ہیں کہ اگر میت کے سوراخوں سے کچھ نکلنے کا اندیشہ ہو اس کے جسم کے سوراخ اور کان روئی سے بند کردیئے جائیں۔ [مصنف ابن ابي شيبه/كتاب الجنائز/حدیث: 11353]

حضرت انس نے اپنی (میت کو لگائی جانے والی) خوشبو (حنوط) میں مشک کی ایک تھیلی رکھی، یا ایسا مشک رکھا جس میں حضور صلی اللہ علیہ وآلہ وسلم کے بال مبارک میں سے ایک بال تھا۔ [مصنف ابن ابي شيبه/كتاب الجنائز/حدیث: 11354]

حضرت عبد اللہ بن عمر رضی اللہ عنہما سے سوال کیا گیا کہ کیا مشک کو بھی میت کو لگائی جانے والی خوشبو میں شمار کیا جائے گا؟ آپ نے فرمایا کیا یہ تمہاری خوشبوؤں میں سے سب سے خوشبو دار نہیں ہے۔ [مصنف ابن ابي شيبه/كتاب الجنائز/حدیث: 11355]

حضرت محمد بن سیرین سے مروی ہے کہ حضرت عبد اللہ بن عمر رضی اللہ عنہما سے سوال کیا گیا! مشک خوشبو میت کے قریب کرسکتے ہیں (اس کو لگا سکتے ہیں؟) آپ نے فرمایا کیا یہ تمہاری خوشبوؤں میں سے سب سے زیادہ خوشبو دار نہیں ہے؟ [مصنف ابن ابي شيبه/كتاب الجنائز/حدیث: 11356]

حضرت قتادہ فرماتے ہیں کہ میں نے حضرت سعید بن مسیب سے دریافت کیا کہ میت کو مشک خوشبو لگا سکتے ہیں؟ آپ نے فرمایا اس میں کوئی حرج نہیں۔ [مصنف ابن ابي شيبه/كتاب الجنائز/حدیث: 11357]

اور حضرت جابر بن زید سے بھی اس کے متعلق دریافت کیا گیا تو انہوں نے فرمایا: اس میں کوئی حرج نہیں۔ [مصنف ابن ابي شيبه/كتاب الجنائز/حدیث: 11358]

حضرت عبد الملک فرماتے ہیں کہ حضرت عطاء سے دریافت کیا گیا کیا میت کو مشک بطور خوشبو لگا سکتے ہیں؟ آپ نے فرمایا: ہاں کیا لوگ اس کو دھونی دینے کیلئے استعمال نہیں کرتے۔ [مصنف ابن ابي شيبه/كتاب الجنائز/حدیث: 11359]

حضرت ہارون بن سعد فرماتے ہیں کہ حضرت علی رضی اللہ عنہ کرم اللہ وجہہ نے وصیت فرمائی تھی کہ میرے مرنے کے بعد مشک بطور خوشبو لگائی جائے، اور فرماتے ہیں کہ وہ حضور صلی اللہ علیہ وآلہ وسلم کی بچی ہوئی مسک تھی۔ [مصنف ابن ابي شيبه/كتاب الجنائز/حدیث: 11360]