حضرت حذیفہ رضی اللہ عنہ فرماتے ہیں کہ مجھے ان دو کپڑوں میں کفن دینا وہ دو پرانے کپڑے جو انہوں نے پہنے ہوئے تھے۔ [مصنف ابن ابي شيبه/كتاب الجنائز/حدیث: 11381]

حضرت عبد اللہ بن عمرو رضی اللہ عنہ ارشاد فرماتے ہیں کہ میت کو تین کپڑوں میں کفن دیا جائے گا، قمیص، ازار اور لفافہ۔ [مصنف ابن ابي شيبه/كتاب الجنائز/حدیث: 11382]

حضرت نافع ہیں کہ واقد بن عبد اللہ کا انتقال ہوا تو حضرت عبداللہ بن عمر نے اس کو پانچ کپڑوں میں کفن دیا، ایک قمیص، تین لفافے اور ایک عمامہ۔ [مصنف ابن ابي شيبه/كتاب الجنائز/حدیث: 11383]

حضرت ہشام بن عروہ اپنے والد سے روایت کرتے ہیں کہ حضرت حمزہ کو ایک کپڑے میں کفن دیا گیا۔ [مصنف ابن ابي شيبه/كتاب الجنائز/حدیث: 11384]

حضرت جابر ارشاد فرماتے ہیں کہ نبی کریم صلی اللہ علیہ وآلہ وسلم نے حضرت حمزہ کو ایک کپڑے میں کفن دیا اور وہ کپڑا سفید اور دوسرے رنگوں والا تھا۔ [مصنف ابن ابي شيبه/كتاب الجنائز/حدیث: 11385]

حضرت ہشام اپنے والد سے روایت کرتے ہیں کہ حضرت صفیہ غزوہ احد کے دن دو کپڑے لے کر آئیں تاکہ حضرت حمزہ بن عبد المطلب کو کفن دیں، فرماتے ہیں کہ ایک کپڑا دوسرے سے لمبا تھا، فرماتے ہیں کہ انہوں حضرت حمزہ کے پہلو میں ایک انصاری صحابی کی لاش کو پایا، تو ان دونوں کے درمیان قرعہ ڈالا، اور جو بلند ہوا (جس کا نام نکلا) اس کو لمبے سے کفن دیا اور دوسرے کو باقی رہ جانے والے کپڑے سے۔ [مصنف ابن ابي شيبه/كتاب الجنائز/حدیث: 11386]

حضرت سوید فرماتے ہیں کہ عورت اور مرد دونوں کو دو کپڑوں میں کفن دیا جائے گا۔ [مصنف ابن ابي شيبه/كتاب الجنائز/حدیث: 11387]

حضرت سوید فرماتے ہیں کہ حضر ت ابوبکر صدیق کو دو کپڑوں میں کفن دیا گیا۔ [مصنف ابن ابي شيبه/كتاب الجنائز/حدیث: 11388]

حضرت غنیم بن قیس فرماتے ہیں کہ ہم دو، تین اور چار کپڑوں میں کفن دیا کرتے تھے۔ [مصنف ابن ابي شيبه/كتاب الجنائز/حدیث: 11389]

حضرت ابو اسید فرماتے ہیں کہ میں نبی اکرم (صلی اللہ علیہ وآلہ وسلم) کے ساتھ حضرت حمزہ کی قبر کے پاس موجود تھا، کفن والی چادر (جو سفید اور دوسرے رنگوں والی تھی) کو آپ کی سر کی طرف کھینچا گیا تو آپ کے پاؤں برہنہ ہوگئے، اور اس کو پاؤں پر کیا گیا تو سر برہنہ ہوگیا، آپ صلی اللہ علیہ وآلہ وسلم نے ارشاد فرمایا، اس کفن کو اس کے سر پر ڈال دو اور پاؤں پر حرمل نامی بوٹی کے پتے ڈال دو۔ [مصنف ابن ابي شيبه/كتاب الجنائز/حدیث: 11390]