حضرت ابن عون فرماتے ہیں کہ میرے بیٹے کا انتقال ہوا تو حضرت ابن سیرین نے مجھ سے فرمایا: اگر طاقت ہو تو ایسے وقت جنازہ لے کر نکلنا کہ جس میں پہلے جنازہ کی نماز پڑھ لو پھر نماز عصر۔ [مصنف ابن ابي شيبه/كتاب الجنائز/حدیث: 11671]

حضرت عمرو بن ھرم فرماتے ہیں کہ حضرت جابر سے دریافت کیا گیا نماز جنازہ (جب حاضر ہوجائے تو) نماز مغرب سے پہلے ادا کیا جائے یا بعد میں؟ آپ نے فرمایا نماز جنازہ پہلے پڑھی جائے پھر مغرب کی نماز ادا کی جائے۔ [مصنف ابن ابي شيبه/كتاب الجنائز/حدیث: 11672]

حضرت بکر فرماتے ہیں کہ جب جنازے کو کندھا دو تو جب تک اس کو اٹھائے رکھو تسبیح پڑھتے رہو۔ [مصنف ابن ابي شيبه/كتاب الجنائز/حدیث: 11673]

حضرت بکر بن عبد اللہ فرماتے ہیں کہ جب کندھا دو تو بسم اللہ پڑھو اور جب تک کندھا دیئے رکھو تسبیح پڑھتے رہو۔ [مصنف ابن ابي شيبه/كتاب الجنائز/حدیث: 11674]

حضرت ابی خلدہ فرماتے ہیں کہ میں نے حضرت حسن کو دیکھا آپ درازگوش پر سوار حضرت ابو رجاء العطاردی کی نماز جنازہ ادا فرما رہے تھے۔ [مصنف ابن ابي شيبه/كتاب الجنائز/حدیث: 11675]

حضرت حسن فرماتے ہیں کہ اس میں کوئی حرج نہیں کہ عورت درازگوش پر سوار نماز جنازہ ادا کرے۔ [مصنف ابن ابي شيبه/كتاب الجنائز/حدیث: 11676]

حضرت عبد اللہ سے مروی ہے کہ رسول اللہ صلی اللہ علیہ وآلہ وسلم نے ارشاد فرمایا: وہ ہم میں سے نہیں جو گالوں پر طمانچے مارے، اور گریبان چاک کرے اور جاہلیت کی طرح (جاہلوں کی طرح) پکارے۔ [مصنف ابن ابي شيبه/كتاب الجنائز/حدیث: 11677]

حضرت عبد اللہ سے مروی ہے کہ رسول اکرم (صلی اللہ علیہ وآلہ وسلم) نے ارشاد فرمایا: وہ ہم میں سے نہیں جو چہروں پر مارے، گریبان چاک کرے اور جاہلوں کی طرح پکارے۔ [مصنف ابن ابي شيبه/كتاب الجنائز/حدیث: 11678]

حضرت عیاض اشعری فرماتے ہیں کہ جب حضرت ابو موسیٰ پر غشی طاری ہوئی تو ان کی اہلیہ نے چیخنا شروع کردیا، جب ان کو افاقہ ہوا تو انہوں نے اپنی اہلیہ سے فرمایا کیا تمہیں نہیں معلوم میں نے آپ سے کیا کہا تھا؟ فرماتے ہیں پھر جب ان کا انتقال ہوا تو اس نے ان پر واویلا نہیں کیا، ہم نے عرض کیا ابو موسیٰ نے آپ سے کیا کہا تھا؟ اہلیہ نے فرمایا انہوں نے کہا تھا وہ ہم میں سے نہیں جو (مصیبت پر) سر منڈوائے، یا گریبان چاک کرے یا چیخے چلائے۔ [مصنف ابن ابي شيبه/كتاب الجنائز/حدیث: 11679]

حضرت قرثع فرماتے ہیں کہ جب حضرت ابو موسیٰ پر زندگی ثقیل ہوگئی تو ان کی اہلیہ نے چیخنا شروع کردیا۔ انہوں نے ان سے فرمایا کیا تجھے نہیں معلوم نبی کریم صلی اللہ علیہ وآلہ وسلم نے کیا فرمایا ہے؟ کہا کیوں نہیں پھر خاموش ہوگئی۔ بعد میں ان سے پوچھا گیا کہ نبی کریم صلی اللہ علیہ وآلہ وسلم نے کیا فرمایا تھا۔ انہوں نے فرمایا رسول اللہ صلی اللہ علیہ وآلہ وسلم نے لعنت فرمائی ہے اس پر جو گریبان چاک کرے، (مصیبت پر) سر منڈوائے اور چیخے اور چلائے۔ [مصنف ابن ابي شيبه/كتاب الجنائز/حدیث: 11680]