حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم ایک جنازہ میں شریک تھے حضرت عمر نے ایک عورت کو دیکھا تو اس پر چیخے۔ آنحضرت صلی اللہ علیہ وآلہ وسلم نے حضرت عمر سے فرمایا: اے عمر اسے چھوڑ دو بیشک آنکھیں اشک بار ہیں اور نفس غم میں مبتلا ہے اور صدمہ تازہ ہے۔ [مصنف ابن ابي شيبه/كتاب الجنائز/حدیث: 11631]

حضرت جبار الطائی فرماتے ہیں کہ میں حضرت ام مصعب بن زبیر کے جنازہ میں حاضر ہوا وہاں حضرت ابن عباس رضی اللہ عنہما بھی اپنی گدھی پر سوار موجود تھے۔ وہ گزرے اور حضرت عبد اللہ بن عمرو رضی اللہ عنہما اور حضرت عبد اللہ بن عمر رضی اللہ عنہما کے برابر آگئے۔ راوی کہتے ہیں کہ انہوں نے چلانے اور چیخنے والیوں کی آوازیں سنیں تو میں نے ابن عباس رضی اللہ عنہما سے عرض کیا: اے ابو العباس! یہاں پر یہ ہو رہا ہے اور آپ پھر بھی یہاں موجود ہیں؟ آپ نے فرمایا: اے جبار ہم سے خود کو دور رکھو (ہم اس کے مکلف نہیں) بیشک اللہ تعالیٰ ہی ہنساتا ہے اور اللہ ہی رلاتا ہے۔ [مصنف ابن ابي شيبه/كتاب الجنائز/حدیث: 11632]

حضرت حسن ایک جنازے کے ساتھ نکلے تو اس میں چیخنے کی آوازیں تھی، حضرت ثابت لوٹے تو حضرت حسن نے ان سے کہا کیا آپ باطل کے لیے (کی وجہ سے) حق کو چھوڑ رہے ہیں؟ راوی کہتے ہیں (یہ سن کر) وہ جنازے کے ساتھ چل پڑے۔ [مصنف ابن ابي شيبه/كتاب الجنائز/حدیث: 11633]

حضرت خالد بن ابی بکر فرماتے ہیں میں نے حضرت سالم اور حضرت قاسم کو دیکھا آپ جنازے کے آگے آگے چل رہے ہیں اور عورتیں جنازے کے پیچھے۔ [مصنف ابن ابي شيبه/كتاب الجنائز/حدیث: 11634]

حضرت محارب بن دثار فرماتے ہیں کہ حضرت ام سلمہ نے وصیت فرمائی تھی کہ میری نماز جنازہ حضرت سعید بن زید پڑھائیں۔ [مصنف ابن ابي شيبه/كتاب الجنائز/حدیث: 11635]

حضرت محمد فرماتے ہیں کہ حضرت یونس بن جبیر نے وصیت فرمائی تھی کہ ان کی نماز جنازہ حضرت انس بن مالک رضی اللہ عنہ پڑھائیں۔ [مصنف ابن ابي شيبه/كتاب الجنائز/حدیث: 11636]

حضرت عبیدہ نے وصیت فرمائی تھی کہ ان کی نماز جنازہ حضرت اسود پڑھائیں۔ [مصنف ابن ابي شيبه/كتاب الجنائز/حدیث: 11637]

حضرت ابو اسحاق فرماتے ہیں کہ حضرت ابو میسرہ نے وصیت فرمائی تھی کہ میری نماز جنازہ مسلمان کے قاضی حضرت شریح پڑھائیں۔ [مصنف ابن ابي شيبه/كتاب الجنائز/حدیث: 11638]

حضرت ابو اسحاق فرماتے ہیں کہ حضرت حارث نے وصیت فرمائی تھی کہ ان کی نماز جنازہ حضرت عبد اللہ بن یزید پڑھائیں۔ [مصنف ابن ابي شيبه/كتاب الجنائز/حدیث: 11639]

حضرت محمد فرماتے ہیں کہ مجھے نہیں معلوم کہ کوئی شخص کسی کی نماز جنازہ پڑھانے کا زیادہ حقدار ہے ہاں مگر وہ شخص (زیادہ حقدار ہے) جس کے لیے مرنے والا وصیت کرے، اور اگر مرنے والا وصیت نہ کرے تو اھل بیت میں سے جو سب سے افضل ہے وہ جنازہ کی نماز پڑھائے۔ [مصنف ابن ابي شيبه/كتاب الجنائز/حدیث: 11640]