حضرت عبد اللہ بن ابی بکر فرماتے ہیں کہ حضرت انس بن مالک رضی اللہ عنہ جب میت کو دفن کرنے کے بعد مٹی برابر کردیتے تو اس پر کھڑے ہو کر یہ دعا مانگتے: اللَّہُمَّ عَبْدُکَ رُدَّ إلَیْکَ فَارْأَفْ بِہِ وَارْحَمْہُ، اللَّہُمَّ جَافِ الأَرْضَ عَنْ جَنْبَیْہِ، وَافْتَحْ أَبْوَابَ السَّمَائِ لِرُوحِہِ، وَتَقَبَّلْہُ مِنْکَ بِقَبُولٍ حَسَنٍ، اللَّہُمَّ إِنْ کَانَ مُحْسِنًا فَضَاعِفْ لَہُ فِی إحْسَانِہِ (یا فرماتے) فَزِدْ فِی إحْسَانِہِ، وَإِنْ کَانَ مُسِیئًا فَتَجَاوَزْ عَنْہُ۔ ”اے اللہ! تیرا بندہ تیری طرف لوٹا دیا گیا ہے، پس اس پر شفقت فرما اور اس پر رحم فرما، اے اللہ! زمین کو اس کے دونوں پہلوؤں سے الگ کر دے، اس کی روح کے لیے آسمان کے دروازے کھول دے اور اسے اپنی طرف سے اچھی قبولیت کے ساتھ قبول فرما۔ اے اللہ! اگر وہ نیکوکار تھا تو اس کی نیکی کو دگنا فرما اور اگر یہ گناہ گار ہے تو اس سے درگزر فرما۔“ [مصنف ابن ابي شيبه/كتاب الجنائز/حدیث: 12061]

حضرت عمیر بن سعید فرماتے ہیں کہ حضرت علی رضی اللہ عنہ نے حضرت یزید کی نماز جنازہ پڑھائی اور چار تکبیریں پڑھیں پھر یہ دعا پڑھی: اللَّہُمَّ عَبْدُک وَابْنُ عَبْدِکَ نَزَلَ بِکَ الْیَوْمَ، وَأَنْتَ خَیْرُ مَنْزُولٍ بِہِ، اللَّہُمَّ وَسِّعْ لَہُ مُدْخَلَہُ، وَاغْفِرْ لَہُ ذَنْبَہُ، فَإِنَّا لاَ نَعْلَمُ إِلاَّ خَیْرًا وَأَنْتَ أَعْلَمُ بِہِ۔ ”اے اللہ! تیرا بندہ اور تیرے بندے کا بیٹا آج تیرے پاس آیا ہے، تو اس کا بہترین ٹھکانہ ہے، اے اللہ اس کی قبر کو کشادہ فرما اور اس کے گناہوں کو معاف فرما، ہم تو صرف خیر کو جانتے ہیں اور تو اسے زیادہ جاننے والا ہے۔“ [مصنف ابن ابي شيبه/كتاب الجنائز/حدیث: 12062]

حضرت ابن ابی ملیکہ فرماتے ہیں کہ جب حضرت عبد اللہ بن السائب کو دفن کر فارغ ہوئے تو حضرت عبد اللہ بن عباس رضی اللہ عنہما قبر پر کچھ دیر کھڑے رہے پھر دعا فرمائی اور پھر لوٹے۔ [مصنف ابن ابي شيبه/كتاب الجنائز/حدیث: 12063]

حضرت خالد بن سمیر فرماتے ہیں کہ میں حضرت احنف کے ساتھ حضرت ضرار بن قعقاع التمیمی کے جنازے میں تھا، حضرت احنف بیٹھ گئے تو میں بھی آپ کے ساتھ بیٹھ گیا، میں نے حضرت احنف کو دیکھا آپ قبر کے کنارے پر کھڑے ہوئے اور دعا سے قبل میت کی تعریف ان الفاظ میں بیان کی: بخدا میرے علم کے مطابق تم ایسے ایسے تھے، بخدا میرے علم کے مطابق تم ایسے ایسے تھے۔ پھر آپ نے ان کیلئے دعا فرمائی۔ [مصنف ابن ابي شيبه/كتاب الجنائز/حدیث: 12064]

حضرت عمیر بن سعید فرماتے ہیں کہ میں نے حضرت علی رضی اللہ عنہ کے ساتھ حضرت یزید بن المکفف کی نماز جنازہ پڑھی، آپ نے اس پر چار تکبیریں پڑھیں، پھر آپ جنازے کے ساتھ چل کر جب قبر کے پاس آئے تو یوں دعا مانگی: اللَّہُمَّ عَبْدُک، وَابْنُ عَبْدِکَ نَزَلَ بِکَ الْیَوْمَ فَاغْفِرْ لَہُ ذَنْبَہُ، وَوَسِّعْ عَلَیْہِ مُدْخَلَہُ فَإِنَّا لاَ نَعْلَمُ إِلاَّ خَیْرًا وَأَنْتَ أَعْلَمُ بِہِ۔ ”اے اللہ! تیرا بندہ اور تیرے بندے کا بیٹا آج تیرے پاس آیا ہے، تو اس کے گناہوں کو معاف فرما اور اس کی قبر کو کشادہ فرما۔ ہم تو صرف خیر کو جانتے ہیں اور تو اسے زیادہ جاننے والا ہے۔“ [مصنف ابن ابي شيبه/كتاب الجنائز/حدیث: 12065]

حضرت ابن علیہ فرماتے ہیں کہ میں نے حضرت ایوب کو دیکھا کہ قبر پر کھڑے میت کیلئے دعا مانگ رہے ہیں اور کبھی کبھی میں آپ کو دیکھتا کہ آپ میت کو قبر میں اتارنے کے بعد قبر میں سے نکلتے سے پہلے اس کے لیے دعا کرتے تھے۔ [مصنف ابن ابي شيبه/كتاب الجنائز/حدیث: 12066]

حضرت عمیر بن سعید فرماتے ہیں کہ حضرت علی رضی اللہ عنہ نے حضرت ابن المکفف کی قبر میں مٹی ڈالی۔ [مصنف ابن ابي شيبه/كتاب الجنائز/حدیث: 12067]

حضرت عمیر بن سعید فرماتے ہیں کہ حضرت علی رضی اللہ عنہ نے ابن المکفف کی قبر میں مٹی ڈالی۔ [مصنف ابن ابي شيبه/كتاب الجنائز/حدیث: 12068]

حضرت یعقوب بن زید فرماتے ہیں کہ بیشک نبی کریم صلی اللہ علیہ وآلہ وسلم نے (میت کی) قبر میں مٹی ڈالی۔ [مصنف ابن ابي شيبه/كتاب الجنائز/حدیث: 12069]

حضرت ابو الدرداء ارشاد فرماتے ہیں کہ جنازے کا مکمل اجر (تب ملتا ہے) کہ قبر پر مٹی ڈالی جائے۔ [مصنف ابن ابي شيبه/كتاب الجنائز/حدیث: 12070]