حضرت سعید بن جبیر اور حضرت عکرمہ فرماتے ہیں کہ اگر حلق کروانے سے قبل ہی قربانی کا جانور میسر آجائے تو وہ اس کو ذبح کرے۔ [مصنف ابن ابي شيبه/كتاب الحج/حدیث: 14320]

حضرت مجاہد فدیہ کے متعلق فرماتے ہیں کہ روزے رکھے یا صدقہ کرے یا قربانی کرے، اپنے حج اور عمرہ کے دوران جو اس کے لیے آسان ہو۔ [مصنف ابن ابي شيبه/كتاب الحج/حدیث: 14321]

حضرت سلیمان بن موسیٰ فرماتے ہیں کہ اگر وہ حج میں ہے تو جب تک حلال نہ ہوجائے، اور اگر وہ عمرہ میں ہے تو جب تک بیت اللہ کا طواف نہ کرلے۔ [مصنف ابن ابي شيبه/كتاب الحج/حدیث: 14322]

حضرت عطاء، حضرت ابن سیرین اور حضرت حسن فرماتے ہیں کہ اگر آپ نے حج میں روزے رکھے ہیں پھر اپنے روزوں سے فارغ ہونے سے قبل ہی آپ نے قربانی کو پا لیا تو کفارہ ادا کرو اور اگر روزے مکمل ہونے کے بعد پایا تو پھر آپ پر کفارہ نہیں ہے۔ [مصنف ابن ابي شيبه/كتاب الحج/حدیث: 14323]

حضرت ابن زبیر ارشاد فرماتے ہیں کہ بنی اسرائیل میں سے سات سو لوگ بیت اللہ کا حج کیا کرتے تھے، وہ اپنے جوتے مقام تنعیم پر اتارا کرتے اور بیت اللہ کی تعظیم کی وجہ سے برہنہ پاؤں داخل ہوتے۔ [مصنف ابن ابي شيبه/كتاب الحج/حدیث: 14324]

حضرت عطاء فرماتے ہیں کہ صحابہ کرام بیت اللہ کی تعظیم کی وجہ سے موزے، جوتے یا باریک کپڑے پہن کر اس میں آنے کو ناپسند کرتے تھے۔ [مصنف ابن ابي شيبه/كتاب الحج/حدیث: 14325]

حضرت عبد اللہ بن شریک فرماتے ہیں کہ میں نے حضرت عبد اللہ بن عمر رضی اللہ عنہما کو جوتے پہن کر طواف کرتے ہوئے دیکھا۔ [مصنف ابن ابي شيبه/كتاب الحج/حدیث: 14326]

اور میں نے حضرت ابن زبیر رضی اللہ عنہ کو دیکھا وہ اس طرح نہ کرتے تھے۔ [مصنف ابن ابي شيبه/كتاب الحج/حدیث: 14327]

حضرت جابر فرماتے ہیں کہ میں نے حضرت طاؤس، حضرت مجاہد اور حضرت عطاء کو جوتوں میں طواف کرتے ہوئے دیکھا۔ [مصنف ابن ابي شيبه/كتاب الحج/حدیث: 14328]

حضرت ابن الزبیر ارشاد فرماتے ہیں کہ بنی اسرائیل کے لوگ مقام ذو طوی پر جب آتے تو تعظیم کی وجہ سے اپنے جوتے اتار دیا کرتے۔ [مصنف ابن ابي شيبه/كتاب الحج/حدیث: 14329]