حضرت عبد اللہ بن عمرو رضی اللہ عنہ ارشاد فرماتے ہیں کہ اللہ تعالیٰ نے اس پتھر کو جنت سے نازل فرمایا: بیشک یہ پتھر برف سے زیادہ سفید تھا اس کو بنی آدم کے گناہوں نے کالا کردیا۔ [مصنف ابن ابي شيبه/كتاب الحج/حدیث: 14720]

حضرت کعب سے حجر اسود کے متعلق دریافت کیا گیا؟ آپ نے فرمایا کہ یہ جنت کے پتھروں میں سے ایک پتھر ہے۔ [مصنف ابن ابي شيبه/كتاب الحج/حدیث: 14721]

حضرت انس ارشاد فرماتے ہیں کہ جنت کے پتھروں میں سے ایک پتھر ہے۔ [مصنف ابن ابي شيبه/كتاب الحج/حدیث: 14722]

حضرت عبد اللہ بن عمرو رضی اللہ عنہ ارشاد فرماتے ہیں کہ بیت اللہ کا حج کرو اور حجر اسود کا استلام کرو، اللہ کی قسم ضرور بضرور یہ اٹھا لیا جائے گا یا اس کو آسمان سے کوئی امر پیش آئے گا، بیشک جنت سے دو پتھر اتارے گئے تھے ایک تو اٹھا لیا گیا ہے اور عنقریب دوسرا بھی اٹھا لیا جائے گا، اور جو میں کہہ رہا ہوں ایسا نہ ہوا تو جو شخص میری قبر پر سے گزرے وہ یوں کہے کہ یہ (حضرت) عبد اللہ بن عمرو رضی اللہ عنہ کی قبر ہے جو (نعوذ باللہ) جھوٹا ہے۔ [مصنف ابن ابي شيبه/كتاب الحج/حدیث: 14723]

حضرت زیاد جو بنو مخزوم کے غلام ہیں ان سے مروی ہے کہ اگر اس پتھر کو بنی نوع آدم کے گناہوں نے (گناہ گاروں) نے نہ چھوا ہوتا، تو اس کو کوئی آفت زدہ نہ چھوتا مگر وہ اس سے بری ہوجاتا۔ [مصنف ابن ابي شيبه/كتاب الحج/حدیث: 14724]

حضرت ابن عباس رضی اللہ عنہما قرآن پاک کی آیت { وَ مَنْ یُّعَظِّمْ شَعَآئِرَ اللّٰہِ فَاِنَّھَا مِنْ تَقْوَی الْقُلُوْبِ } کی تفسیر میں فرماتے ہیں کہ موٹا اونٹ تلاش کرنا اور عمدہ وبڑا تلاش کرنا تقویٰ میں سے ہے۔ [مصنف ابن ابي شيبه/كتاب الحج/حدیث: 14725]

حضرت محمد بن ابو موسیٰ اللہ تعالیٰ کے ارشاد { وَ مَنْ یُّعَظِّمْ شَعَآئِرَ اللّٰہِ فَاِنَّھَا مِنْ تَقْوَی الْقُلُوْبِ } کی تفسیر میں فرماتے ہیں کہ وقوف عرفہ شعائر اللہ میں سے ہے، مزدلفہ کا قیام شعائر اللہ میں سے ہے، اونٹ کی قربانی کرنا شعائر اللہ میں سے ہے، سر منڈانا شعائر اللہ میں سے ہے، رمی کرنا شعائر اللہ میں سے ہے، پس جو شخص ان کی تعظیم کرے گا، پس یہ اس کے دل کے تقویٰ میں سے ہے (دل کے تقویٰ کی علامت ہے)۔ [مصنف ابن ابي شيبه/كتاب الحج/حدیث: 14726]

حضرت عطاء سے شعائر اللہ کے متعلق دریافت کیا گیا؟ آپ نے فرمایا: اللہ کی حرمات، اللہ کی ناراضگی سے اجتناب کرو، اس کی طاعات کی اتباع کرو، یہی شعائر اللہ ہیں۔ [مصنف ابن ابي شيبه/كتاب الحج/حدیث: 14727]

حضرت مجاہد قرآن پاک کی آیت { وَ مَنْ یُّعَظِّمْ شَعَآئِرَ اللّٰہِ } کے متعلق فرماتے ہیں کہ اس کی عظمت کرنا اور اس کو اچھا سمجھنا کہ اس کا بڑا سمجھنا اور اس کا عمدہ کرنا ہے۔ [مصنف ابن ابي شيبه/كتاب الحج/حدیث: 14728]

حضرت ابو جعفر سے مروی ہے کہ نبی کریم صلی اللہ علیہ وآلہ وسلم سب سے پہلے مقام ابطح میں اترے تھے، (قیام کیا تھا)۔ [مصنف ابن ابي شيبه/كتاب الحج/حدیث: 14729]