حضرت زہری فرماتے ہیں کہ امام وقوف عرفہ میں ظہر وعصر کی نمازوں میں قراءت جہراً نہیں کرے گا۔ [مصنف ابن ابي شيبه/كتاب الحج/حدیث: 14750]

حضرت ابن عمر رضی اللہ عنہما اپنے غلاموں کو بغیر احرام مکہ میں داخل فرماتے تھے (پھر) ان سے نفع حاصل کرتے تھے (اپنے کاموں وغیرہ میں)۔ [مصنف ابن ابي شيبه/كتاب الحج/حدیث: 14751]

حضرت عروہ اپنے غلاموں کو بغیر احرام کے مکہ میں داخل کرلیتے۔ [مصنف ابن ابي شيبه/كتاب الحج/حدیث: 14752]

حسن اس بات میں کوئی حرج نہیں سمجھتے تھے کہ آدمی اپنے غلام کو احرام سے روک دے۔ [مصنف ابن ابي شيبه/كتاب الحج/حدیث: 14753]

اور حضرت ابن سیرین فرماتے ہیں کہ مجھے نہیں معلوم کہ یہ احسان میں سے ہے۔ [مصنف ابن ابي شيبه/كتاب الحج/حدیث: 14754]

حضرت خالد بن ابوبکر فرماتے ہیں کہ میں نے حضرت سالم کو دیکھا کہ ان کے غلام حج کے لیے نکالے گئے، پس انھوں نے ذوالحلیفہ سے احرام نہیں باندھا، انھوں نے اس کے آگے سے احرام باندھا۔ [مصنف ابن ابي شيبه/كتاب الحج/حدیث: 14755]

حضرت زید بن السائب فرماتے ہیں کہ میں نے حضرت خارجہ بن زید کو دیکھا کہ وہ اپنے غلام نکال رہے تھے پھر انھوں نے ان کے ساتھ ذوالحلیفہ سے احرام باندھا۔ [مصنف ابن ابي شيبه/كتاب الحج/حدیث: 14756]

حسن فرماتے ہیں کہ اگر کوئی شخص دو دن میں جلدی کر کے (منیٰ سے) روانہ ہوجائے پھر شکار کرلے تو اس پر کچھ بھی لازم نہیں ہے۔ [مصنف ابن ابي شيبه/كتاب الحج/حدیث: 14757]

حضرت شعبی سے دریافت کیا گیا کہ اگر کوئی شخص دو دن میں جلدی کر کے (منیٰ سے) روانہ ہوجائے تو کیا وہ شکار کرسکتا ہے؟ آپ نے فرمایا کہ اگر وہ حرم سے باھر نکل کر شکار کرلے تو کوئی حرج نہیں۔ [مصنف ابن ابي شيبه/كتاب الحج/حدیث: 14758]

حضرت ابن عباس رضی اللہ عنہما ان لوگوں کو جو بغیر احرام کے مکہ مکرمہ میں داخل ہوتے، واپس میقات کی طرف بھیج دیا کرتے تھے۔ [مصنف ابن ابي شيبه/كتاب الحج/حدیث: 14759]