حضرت ابو مجلز فرماتے ہیں کہ حضرت جبرئیل ابراہیم کو عرفات لے کر آئے اور فرمایا کہ آپ کو معلوم ہوگیا؟ انھوں نے فرمایا ہاں، اسی وجہ سے اس کا نام عرفات پڑگیا۔ [مصنف ابن ابي شيبه/كتاب الحج/حدیث: 14700]

حضرت عطاء فرماتے ہیں کہ اس جگہ کا نام عرفات اس لیے پڑا ہے کہ حضرت جبرئیل حضرت ابراہیم کو مناسک حج سکھاتے اور پھر پوچھتے کہ آپ کو پتہ چل گیا؟ پھر سکھاتے اور فرماتے معلوم ہوگیا؟ اسی وجہ سے اس کا نام عرفات پڑگیا۔ [مصنف ابن ابي شيبه/كتاب الحج/حدیث: 14701]

حضرت ابو ذر سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: یہ یعنی آب زم زم بابرکت ہے، کھانے والے کے لیے خوراک ہے (یعنی اس سے بھوک بھی مٹ جاتی ہے)۔ [مصنف ابن ابي شيبه/كتاب الحج/حدیث: 14702]

حضرت ابن عباس رضی اللہ عنہما آب زم زم کے متعلق فرماتے ہیں کہ یہ کھانے والے کے لیے خوراک ہے (یعنی اس سے بھوک بھی مٹ جاتی ہے) اور بیماری سے شفاء ہے۔ [مصنف ابن ابي شيبه/كتاب الحج/حدیث: 14703]

حضرت ابن عباس رضی اللہ عنہما ارشاد فرماتے ہیں کہ ہم آب زم زم کا نام شباعہ یعنی خوب سیر کرنے والا رکھا کرتے تھے اور ہم گمان کرتے تھے کہ یہ اھل و عیال (کی کفالت) کے لیے بہترین مدد گار ہے۔ [مصنف ابن ابي شيبه/كتاب الحج/حدیث: 14704]

حضرت کعب ارشاد فرماتے ہیں کہ بیشک اللہ کی نازل کردہ کتاب میں ہے کہ آب زم زم کھانے والے کے لیے خوراک ہے اور بیماری سے شفاء ہے۔ [مصنف ابن ابي شيبه/كتاب الحج/حدیث: 14705]

حضرت قیس بن کر کم فرماتے ہیں کہ میں نے حضرت عبد اللہ بن عباس رضی اللہ عنہما سے دریافت کیا کہ مجھے آب زم زم کے متعلق خبر دیں؟ آپ نے فرمایا کہ میں تجھے علم کے ساتھ خبر دیتا ہوں، نہ اس کا پانی کھینچ کر ختم کیا جاسکتا ہے، نہ یہ سوکھتا ہے اور نہ اس کی مذمت کی جاتی ہے، یہ کھانے والے کے لیے خوراک ہے اور بیماری سے شفاء ہے۔ [مصنف ابن ابي شيبه/كتاب الحج/حدیث: 14706]

حضرت جابر سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: آب زم زم ہر اس مقصد کے لیے ہے کہ جس مقصد کے لیے اس کو پیا جائے (یعنی جس مقصد سے پئیں گے وہ حاصل ہوگا)۔ [مصنف ابن ابي شيبه/كتاب الحج/حدیث: 14707]

حضرت طاؤس فرماتے ہیں کہ ایسی صورت میں اس پر اس کی نیت ہے۔ [مصنف ابن ابي شيبه/كتاب الحج/حدیث: 14708]

حضرت قاسم سے بھی اسی طرح منقول ہے۔ [مصنف ابن ابي شيبه/كتاب الحج/حدیث: 14709]