حضرت قدامہ فرماتے ہیں کہ میں نے ابراہیم سے اس کے متعلق دریافت کیا تو انہوں نے فرمایا کہ اس کی طرف سے حج کرو۔ [مصنف ابن ابي شيبه/كتاب الحج/حدیث: 15801]

حضرت قدامہ فرماتے ہیں کہ میں نے حضرت ضحاک سے دریافت کیا تو انہوں نے فرمایا کہ اس کی طرف سے حج کرو، بیشک یہ اس کی طرف سے کافی ہوجائے گا، اور اس کے مال سے حج کرو۔ [مصنف ابن ابي شيبه/كتاب الحج/حدیث: 15802]

حضرت عبد اللہ بن زبیر سے مروی ہے کہ ایک شخص خدمت نبوی (صلی اللہ علیہ وآلہ وسلم) میں حاضر ہوا اور عرض کیا کہ اے اللہ کے رسول (صلی اللہ علیہ وآلہ وسلم)! میرے والد بنا حج کیے فوت ہوگئے ہیں، کیا میں ان کی طرف سے حج کرسکتا ہوں؟ آپ صلی اللہ علیہ وآلہ وسلم نے ارشاد فرمایا کیا تو ان کا بڑا لڑکا ہے؟ اس شخص نے عرض کیا کہ جی ہاں، آپ صلی اللہ علیہ وآلہ وسلم نے ارشاد فرمایا کہ تو پھر اپنے والد کی طرف سے حج کر، تیرا کیا خیال ہے اگر تیرے والد پر قرضہ ہوتا تو تو اس کو ادا نہ کرتا؟ [مصنف ابن ابي شيبه/كتاب الحج/حدیث: 15803]

حضرت عطاء فرماتے ہیں کہ مرنے والے کی طرف سے حج کیا جائے گا اگرچہ وہ وصیت نہ بھی کرے۔ [مصنف ابن ابي شيبه/كتاب الحج/حدیث: 15804]

حضرت ابن عمر رضی اللہ عنہما ارشاد فرماتے ہیں کہ کوئی شخص دوسرے شخص کی طرف سے حج نہیں کرے گا اور کوئی شخص دوسرے شخص کی جگہ روزے نہیں رکھے گا۔ [مصنف ابن ابي شيبه/كتاب الحج/حدیث: 15805]

حضرت ابراہیم فرماتے ہیں کہ کوئی شخص دوسرے شخص کی طرف سے حج نہیں کرے گا۔ [مصنف ابن ابي شيبه/كتاب الحج/حدیث: 15806]

حضرت قاسم بھی یہی فرماتے ہیں۔ [مصنف ابن ابي شيبه/كتاب الحج/حدیث: 15807]

حضرت ابراہیم فرماتے ہیں کہ مرنے والے کی طرف سے حج کی قضا نہیں کی جائے گی۔ [مصنف ابن ابي شيبه/كتاب الحج/حدیث: 15808]

حضرت ابن عمر رضی اللہ عنہما فرماتے ہیں کہ اگر میں ہوتا تو اس کی طرف سے صدقہ کرتا اور ھدی (قربانی کا جانور) بھیجتا۔ [مصنف ابن ابي شيبه/كتاب الحج/حدیث: 15809]

حضرت شریح فرماتے ہیں کہ جب حج وعمرہ کا احرام باندھو پھر جب مکہ آؤ تو یوم النحر تک اپنا احرام نہ کھولو، بیشک وہ عنقریب تم سے کہیں گے کہ: جب تم اپنے عمرہ کا طواف کرلو تو احرام کھول دو، پس تم اس معاملہ میں ان کی اطاعت مت کرنا۔ [مصنف ابن ابي شيبه/كتاب الحج/حدیث: 15810]