حضرت علی رضی اللہ عنہ فرماتے ہیں کہ حج اکبر سے مراد قربانی کا دن ہے۔ [مصنف ابن ابي شيبه/كتاب الحج/حدیث: 15791]

ایک شخص نے یوم النحر میں حضرت علی رضی اللہ عنہ کی سواری کی لگام پکڑی اور پوچھا کہ حج اکبر سے کیا مراد ہے؟ آپ نے فرمایا کہ آج کا دن ہی مراد ہے۔ [مصنف ابن ابي شيبه/كتاب الحج/حدیث: 15792]

حضرت مغیرہ بن شعبہ اونٹ پر سوار ہو کر فرما رہے تھے کہ یہ قربانی کا دن ہے، یہ عید الاضحی کا دن ہے اور یہی حج اکبر کا دن ہے۔ [مصنف ابن ابي شيبه/كتاب الحج/حدیث: 15793]

حضرت عامر فرماتے ہیں کہ حج اکبر سے مراد وہ دن ہے جس دن قربانی کی جاتی ہے اور احرام کو کھولا جاتا ہے۔ [مصنف ابن ابي شيبه/كتاب الحج/حدیث: 15794]

حضرت ابن ابی اوفی ارشاد فرماتے ہیں کہ حج اکبر سے مراد قربانی والا دن ہے۔ [مصنف ابن ابي شيبه/كتاب الحج/حدیث: 15795]

حضرت ابن عباس رضی اللہ عنہما فرماتے ہیں کہ حج اکبر سے مراد قربانی کا دن ہے۔ [مصنف ابن ابي شيبه/كتاب الحج/حدیث: 15796]

حضرت ابو جحیفہ فرماتے ہیں کہ حج اکبر سے مراد قربانی کا دن ہے۔ [مصنف ابن ابي شيبه/كتاب الحج/حدیث: 15797]

حضرت ابن عباس رضی اللہ عنہما سے ایک شخص نے دریافت کیا کہ میرے والد بغیر حج کیے فوت ہوگئے ہیں کیا میں ان کی طرف سے حج کرلوں؟ آپ نے فرمایا کہ ہاں، کیونکہ اگر تم ان کے لیے خیر میں اضافہ نہ کرسکو تو شر میں بھی اضافہ نہیں کرو گے۔ [مصنف ابن ابي شيبه/كتاب الحج/حدیث: 15798]

حضرت طارق فرماتے ہیں کہ میں حضرت سعید بن المسیب کے پاس بیٹھا ہوا تھا تو ایک شخص آپ کے پاس آیا اور عرض کیا کہ میرے والد جہاد بہت زیادہ کیا کرتے تھے لیکن انہوں نے حج نہیں کیا تھا، کیا میں ان کی طرف سے حج کرلوں؟ حضرت سعید بن المسیب نے اس سے فرمایا: نبی کریم صلی اللہ علیہ وآلہ وسلم نے ایک شخص کو اجازت دی تھی کہ وہ اپنے والد کی طرف سے حج ادا کرے اور کیا یہ قرض نہیں ہے؟ [مصنف ابن ابي شيبه/كتاب الحج/حدیث: 15799]

حضرت قدامہ بن عبد اللہ الرواسی فرماتے ہیں کہ میں نے حضرت سعید بن جبیر سے دریافت کیا کہ میرے بھائی بنا حج کیے فوت ہوگئے ہیں کیا میں ان کی طرف سے حج کرسکتا ہوں؟ آپ نے فرمایا کہ کیا اس کی کوئی اولاد ہے؟ میں نے عرض کیا کہ ایک چھوٹے بچے کے سوا اور کوئی نہیں ہے، آپ نے فرمایا پھر اس کی طرف سے حج کرو، بیشک اگر کوئی قاصد پایا جاتا تو تیری طرف بھیجتا کہ اس کو جلدی ادا کر، میں نے عرض کیا کہ اس کے مال سے حج کروں یا اپنے مال سے؟ آپ نے فرمایا کہ نہیں بلکہ اس کے مال سے کرو۔ [مصنف ابن ابي شيبه/كتاب الحج/حدیث: 15800]