حضرت حسین بن علی رضی اللہ عنہ اور حضرت شریح نے حج وعمرہ کے لیے اکٹھے احرام باندھا پھر ان میں سے کوئی بھی یوم النحر سے پہلے حلال نہ ہوا۔ [مصنف ابن ابي شيبه/كتاب الحج/حدیث: 15811]

حضرت ابو نصر سے مروی ہے کہ حضرت علی رضی اللہ عنہ نے ان سے فرمایا کہ حج وعمرہ دونوں کے لیے تلبیہ پڑھو، جب تم مکہ مکرمہ آؤ تو ان کے لیے دو طواف کرو، ایک طواف عمرہ کے لیے اور ایک طواف حج کے لیے، اور یوم النحر سے پہلے اپنا احرام نہ کھولنا۔ [مصنف ابن ابي شيبه/كتاب الحج/حدیث: 15812]

حضرت جابر سے مروی ہے کہ نبی کریم صلی اللہ علیہ وآلہ وسلم نے حضرت علی رضی اللہ عنہ سے فرمایا: جب تم نے حج کا ارادہ کیا تھا تو کیا کہا تھا؟ حضرت علی رضی اللہ عنہ نے فرمایا کہ میں نے یوں کہا: اللَّہُمَّ إِنِّی أُہِلُّ بِمَا أَہَلَّ بِہِ رَسُولُکَ صَلَّی اللَّہُ عَلَیْہِ وَسَلَّمَ، آپ صلی اللہ علیہ وآلہ وسلم نے ارشاد فرمایا کہ بیشک میرے پاس تو ھدی ہے، لہٰذا تم احرام نہ کھولنا، راوی فرماتے ہیں کہ تمام لوگوں نے احرام کھول دیا اور قصر کروا لیا سوائے آپ صلی اللہ علیہ وآلہ وسلم کے اور ان لوگوں کے جن کے پاس ھدی تھی۔ [مصنف ابن ابي شيبه/كتاب الحج/حدیث: 15813]

حضرت عروہ سے مروی ہے کہ حضرت ابوبکر صدیق اور حضرت عمر تشریف لائے اور آپ دونوں نے حج کا احرام باندھا ہوا تھا، پس آپ دونوں یوم النحر تک حلال نہ ہوئے۔ [مصنف ابن ابي شيبه/كتاب الحج/حدیث: 15814]

حضرت ابن عمر رضی اللہ عنہما ارشاد فرماتے ہیں کہ جو شخص حج وعمرہ کا احرام باندھے اس کے لیے ایک طواف ہی کافی ہے اور وہ احرام نہ کھولے یہاں تک کہ اپنا حج بھی مکمل کرے پھر دونوں احراموں کو کھول دے۔ [مصنف ابن ابي شيبه/كتاب الحج/حدیث: 15815]

حضرت ابو شعبہ فرماتے ہیں کہ عرفہ میں میں حضرت ابن عمر رضی اللہ عنہما کے پہلو میں تھا اور میرا گھٹنا ان کے گھٹنے کے ساتھ لگا ہوا تھی یا میری ران ان کی ران کے ساتھ لگی ہوئی تھی، میں نے ان سے ان کلمات سے زائد کچھ نہیں سنا، لاَ إلَہَ إِلاَّ اللَّہُ وَحْدَہُ لاَ شَرِیکَ لَہُ، لَہُ الْمُلْکُ وَلَہُ الْحَمْدُ وَہُوَ عَلَی کُلِّ شَیْئٍ قَدِیرٌ یہاں تک کہ عرفات سے مزدلفہ کی طرف چل پڑے۔ [مصنف ابن ابي شيبه/كتاب الحج/حدیث: 15816]

حضرت داوٗد بن ابو عاصم فرماتے ہیں کہ میں حضرت سالم بن عبد اللہ کے ساتھ عرفہ میں ٹھہرا تا کہ میں دیکھوں وہ کیا کرتے ہیں، وہ ذکر اور دعاؤں میں مشغول رہے یہاں تک کہ لوگ (عرفات سے) روانہ ہوگئے۔ [مصنف ابن ابي شيبه/كتاب الحج/حدیث: 15817]

حضرت علی رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا کہ: اکثر میں اور میرے سے پہلے انبیاء کرام عرفات میں یہ دعا مانگتے تھے۔ اللہ کے علاوہ کوئی عبادت کے لائق نہیں، وہ اکیلا ہے، اس کا کوئی شریک نہیں ہے، اس ہی کی بادشاہی اور اس ہی کے لیے تمام تعریفیں ہیں۔ وہ ہر چیز پر قادر ہے۔ اے اللہ تو میرے دل، کان اور آنکھ کو منور فرما۔ اے اللہ میرے سینہ کو کھول دے اور میرے کام کو آسان کر دے۔ میں تجھ سے قلبی وساوس اور معاملات کے بکھراؤ سے پناہ مانگتا ہوں اور فتنۂ قبر سے پناہ مانگتا ہوں۔ اے اللہ میں تجھ سے اس چیز کے شر سے پناہ مانگتا ہوں جو رات میں داخل ہوتی ہے اور اس چیز کے شر سے جو دن میں داخل ہوتی ہے اور اس چیز کے شر سے جسے ہوائیں اڑا کر لاتی ہیں۔ [مصنف ابن ابي شيبه/كتاب الحج/حدیث: 15818]

حضرت ابن ابی حسین سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: اکثر میں اور مجھ سے پہلے انبیاء کرام عرفات میں یہ دعا مانگتے ہیں: اللہ کے سوا کوئی عبادت کے لائق نہیں۔ وہ اکیلا ہے اس کا کوئی شریک نہیں ہیں اس ہی کی بادشاہی اور اس ہی کے لیے تمام تعریفیں ہیں۔ تمام بھلائیاں اس ہی کے قبضہ میں ہیں۔ وہ زندہ کرتا اور موت دیتا ہے اور وہ ہر شی پر قادر ہے۔ [مصنف ابن ابي شيبه/كتاب الحج/حدیث: 15819]

حضرت ابن الحنفیہ سے ایک شخص نے دریافت کیا کہ حج میں کون سی دعا پڑھنا افضل ہے؟ آپ نے فرمایا کہ: لاَ إلَہَ إِلاَّ اللَّہُ، وَاللَّہُ أَکْبَرُ۔ [مصنف ابن ابي شيبه/كتاب الحج/حدیث: 15820]