حضرت قاسم نے جمرہ عقبہ کی رمی فرمائی اور ہر کنکری کے ساتھ تکبیر پڑھی۔ [مصنف ابن ابي شيبه/كتاب الحج/حدیث: 15771]

حضرت ابو مجلز سے مروی ہے کہ حضرت جبرئیل نے ابراہیم کو سات کنکریاں دیں پھر دونوں عقبہ کی طرف چلے تو شیطان ان کے سامنے آگیا، حضرت جبرئیل نے آپ سے فرمایا کہ اس کو مارو، چنانچہ دونوں نے اس کو مارا اور ہر بار مارتے ہوئے تکبیر پڑھی یہاں تک کہ شیطان غائب ہوگیا، پھر دوسرے دونوں جمروں کے پاس بھی ایسے ہی کیا۔ [مصنف ابن ابي شيبه/كتاب الحج/حدیث: 15772]

حضرت ابراہیم فرماتے ہیں کہ یوم النحر اور یوم النفر کے پہلے طواف کی ابتدا اور اختتام حجر اسود سے نہ کرنے میں کوئی رخصت نہیں دی گئی۔ [مصنف ابن ابي شيبه/كتاب الحج/حدیث: 15773]

حضرت حسن اس بات کو پسند فرماتے تھے کہ طواف شروع اور ختم کرتے وقت حجر اسود کا استلام کیا جائے۔ [مصنف ابن ابي شيبه/كتاب الحج/حدیث: 15774]

حضرت سعید بن جبیر حجر اسود پر آ کر طواف کو ختم کرتے پھر اپنے اھل کے پاس تشریف لاتے۔ [مصنف ابن ابي شيبه/كتاب الحج/حدیث: 15775]

حضرت ابن سابط نے ایک شخص سے جو طواف کے ارادے سے کھڑا ہوا اور رکن یمانی کے استلام کا ارادہ کیا کہ اس سے طواف کی ابتدا کرے، آپ نے اس کو فرمایا کہ جب طواف کرنے کا ارادہ کرو تو طواف کا پہلا چکر حجر اسود سے شروع کرو۔ [مصنف ابن ابي شيبه/كتاب الحج/حدیث: 15776]

حضرت ضحاک فرماتے ہیں کہ اگر قدرت ہو تو ہر چکر میں حجر اسود کا استلام کرو وگرنہ حجر اسود سے طواف شروع کرو اور اسی پر ختم کرو۔ [مصنف ابن ابي شيبه/كتاب الحج/حدیث: 15777]

حضرت عطاء فرماتے ہیں کہ اگر طاقت رکھو تو ہر چکر میں استلام کرو وگرنہ جب بھی اس پر گزرو تو اس کی طرف رخ کر کے، اگر چاہو تو، تکبیر پڑھو، اور طواف حجر اسود سے شروع کر کے اس پر ختم کرو۔ [مصنف ابن ابي شيبه/كتاب الحج/حدیث: 15778]

حضرت ہلال بن ابو میمونہ فرماتے ہیں کہ میں نے حضرت انس کو طواف کرتے ہوئے دیکھا، جب حجر اسود کے پاس پہنچتے تو تکبیر پڑھتے، اور طواف حجر اسود سے شروع کرتے اور حجر اسود پر ختم کرتے۔ [مصنف ابن ابي شيبه/كتاب الحج/حدیث: 15779]

حضرت عطاء سے مروی ہے کہ نبی کریم صلی اللہ علیہ وآلہ وسلم نے طواف کی ابتدا حجر اسود سے فرمائی اور حجر اسود سے لے کر دوبارہ حجر اسود تک رمل بھی فرمایا۔ [مصنف ابن ابي شيبه/كتاب الحج/حدیث: 15780]