حضرت عمر ارشاد فرماتے ہیں کہ جو شخص کوچ سے پہلے اپنا سامان منتقل کر دے اس کا حج نہیں ہوا۔ [مصنف ابن ابي شيبه/كتاب الحج/حدیث: 16091]

حضرت ابو عبیدہ بن عمار بن یاسر سے مروی ہے کہ حضرت عمار فرماتے ہیں کہ جب تمہارے لئے واپسی جائز ہوجائے (حج مکمل ہوجائے) تو اگر چاہو تو اپنا سامان پہلے منتقل کرسکتے ہو۔ [مصنف ابن ابي شيبه/كتاب الحج/حدیث: 16092]

حضرت طاؤس فرماتے ہیں کہ مکی شخص حج تمتع کے لئے میقات سے نکلے تو اس پر ھدی لازم ہے۔ [مصنف ابن ابي شيبه/كتاب الحج/حدیث: 16093]

حضرت طاؤس فرماتے ہیں کہ اس پر ھدی لازم ہے۔ [مصنف ابن ابي شيبه/كتاب الحج/حدیث: 16094]

اور حضرت عطاء فرماتے ہیں کہ اس پر کچھ لازم نہیں۔ [مصنف ابن ابي شيبه/كتاب الحج/حدیث: 16095]

حضرت عطاء حضرت طاؤس اور حضرت مجاہد فرماتے ہیں مکی شخص اگر حج تمتع کرے تو اس پر ھدی نہیں ہے۔ [مصنف ابن ابي شيبه/كتاب الحج/حدیث: 16096]

ایک شخص نے حضرت ابن عمر رضی اللہ عنہما سے دریافت کیا کہ میں نے قسم اٹھائی یا اپنے اوپر اونٹ کی قربانی کو لازم کیاٗ کیا میں اس کو اس زمین پر ذبح کرلوں جہاں میں ہوں؟ فرمایا نہیں ‘ اونٹ کے محل کے علاوہ اس کو ذبح نہ کرو ‘ اس شخص نے عرض کیا کہ میں نے کہا تھا کہ جس جگہ میں ہوں وہیں پر ذبح کروں گا؟ حضرت عبداللہ بن عمر نے اس کا انکار فرمایا اور فرمایا کہ شیطان جس کے لئے چاہتا ہے مزین کردیتا ہے۔ [مصنف ابن ابي شيبه/كتاب الحج/حدیث: 16097]

حضرت وقاء فرماتے ہیں کہ میں نے حضرت سعید بن جبیر کے سامنے حضرت ابن عمر رضی اللہ عنہما کے اس قول کو ذکر کیا کہ اس کو مکہ مکرمہ میں ذبح کرو ‘ آپ نے فرمایا کہ مجھے اس کا علم نہیں تھا۔ [مصنف ابن ابي شيبه/كتاب الحج/حدیث: 16098]

حضرت حسن ‘ حضرت شعبی اور حضرت عطاء فرماتے ہیں کہ جس پر اونٹ کی قربانی لازم ہو وہ مکہ میں قربانی کرے اور جو شخص جزور اور گائے (مؤنث) بولے تو وہ جہاں چاہے اور جہاں کی نیت کرے وہاں قربانی کرے۔ [مصنف ابن ابي شيبه/كتاب الحج/حدیث: 16099]

حضرت شعبی اور حضرت عطاء فرماتے ہیں کہ جو شخص اپنے اوپر بدنہ (قربانی کا اونٹ) لازم کرے تو وہ مکہ میں ذبح کرے، اور اگر یوں کہے کہ جزور یا گائے، تو جہاں چاہے اور جہاں کی نیت کی ہو وہاں ذبح کرے۔ [مصنف ابن ابي شيبه/كتاب الحج/حدیث: 16100]