اور حضرت عمر بن عبد العزیز نے بھی اسی طرح کیا۔ [مصنف ابن ابي شيبه/كتاب الحج/حدیث: 16302]

حضرت عبد اللہ بن السائب فرماتے ہیں کہ رمضان المبارک میں لوگوں کو نماز پڑھا رہا تھا کہ اچانک میں نے مسجد کے دروازے پر حضرت عمر کی تکبیر سنی جو عمرہ کے لیے تشریف لائے تھے، آپ تشریف لائے اور میری اقتدا میں نماز ادا فرمائی۔ [مصنف ابن ابي شيبه/كتاب الحج/حدیث: 16303]

حضرت محرش الکعبی سے مروی ہے کہ نبی کریم صلی اللہ علیہ وآلہ وسلم نے مقام جعرانہ سے عمرہ فرمایا، پھر آپ صلی اللہ علیہ وآلہ وسلم نے رات گزارنے والے کی طرح صبح کی، جب سورج زائل ہونا شروع ہوا تو آپ بطن سرف میں چلے، یہاں تک کہ آپ نے راستوں کو ملا لیا۔ [مصنف ابن ابي شيبه/كتاب الحج/حدیث: 16304]

حضرت صالح بن ابی الاخضر سے مروی ہے کہ حضرات حسنین رات کے وقت مکہ مکرمہ تشریف لائے، طواف فرمایا اور واپس تشریف لے گئے۔ [مصنف ابن ابي شيبه/كتاب الحج/حدیث: 16305]

حضرت محرش سے مروی ہے کہ نبی کریم صلی اللہ علیہ وآلہ وسلم نے مقام جعرانہ سے عمرہ فرمایا پھر آپ صلی اللہ علیہ وآلہ وسلم جعرانہ کی طرف لوٹے رات گزارنے والے کی طرح، راوی فرماتے ہیں کہ میں نے آپ صلی اللہ علیہ وآلہ وسلم کی کمر مبارک کو دیکھا وہ چاندی کی ڈلی کی طرح چمک رہی تھی۔ [مصنف ابن ابي شيبه/كتاب الحج/حدیث: 16306]

حضرت ابراہیم یا حضرت مجاہد فرماتے ہیں کہ القانع سے مراد وہ شخص ہے کہ جو اس کی طرف بھیجا جائے اس پر قناعت کرے (اور مزید کا سوال نہ کرے)، اور المعتر سے مراد وہ شخص ہے کہ جو تیرے سامنے آ کر تجھ سے سوال کرے۔ [مصنف ابن ابي شيبه/كتاب الحج/حدیث: 16307]

حضرت عبد اللہ بن عمرو رضی اللہ عنہما منیٰ میں اس آیت کی تلاوت فرما رہے تھے کہ { فَکُلُوْا مِنْھَا وَ اَطْعِمُوا الْقَانِعَ وَ الْمُعْتَرَّ } پھر اپنے ساتھ موجود غلام کے بارے میں کہا کہ یہ قانع ہے جو میں اسے دیتا ہوں اس پر قناعت کرتا ہے (سوال نہیں کرتا)۔ [مصنف ابن ابي شيبه/كتاب الحج/حدیث: 16308]

حضرت مجاہد فرماتے ہیں کہ قانع سے مراد مکہ مکرمہ والے ہیں اور المعتر سے مراد وہ شخص جو (محتاجی میں) سوال کرے۔ [مصنف ابن ابي شيبه/كتاب الحج/حدیث: 16309]

حسن فرماتے ہیں کہ القانع وہ شخص ہے جو (حاجت لے کر) تیری طرف رجوع کرے اور المعتر وہ شخص ہے جو تجھے اپنا نفس دکھائے اور تیرے سے سوال نہ کرے۔ [مصنف ابن ابي شيبه/كتاب الحج/حدیث: 16310]

حضرت مجاہد فرماتے ہیں کہ القانع سے مراد سوال کرنے والا ہے، اور المعتر سے مراد قربانی کے اونٹوں کے پاس آنے والا ہے، (بےسوالی)۔ [مصنف ابن ابي شيبه/كتاب الحج/حدیث: 16311]