حضرت عطاء فرماتے ہیں کہ حرم میں بجو کا خون بہا دیا جائے گا۔ [مصنف ابن ابي شيبه/كتاب الحج/حدیث: 16342]

حضرت جابر بن عبد اللہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے بجو کو شکار میں شمار فرمایا اور اس کے شکار پر مینڈھا لازم فرمایا۔ [مصنف ابن ابي شيبه/كتاب الحج/حدیث: 16343]

حضرت عکرمہ فرماتے ہیں کہ محرم اگر ٹڈی کو مار دے تو روٹی کا ٹکڑا صدقہ کرے۔ [مصنف ابن ابي شيبه/كتاب الحج/حدیث: 16344]

حضرت عطاء فرماتے ہیں کہ ٹڈی میں ایک مٹھی یا ایک لقمہ صدقہ کرے گا۔ [مصنف ابن ابي شيبه/كتاب الحج/حدیث: 16345]

حضرت کعب کے پاس سے ٹڈی گزری تو انہوں نے اس کو کوڑے سے مارا، پھر اس کو پکڑ کر پکا لیا، لوگوں نے ان سے کہا (یہ کیا ہے)؟ آپ نے کہا یہ غلطی سے ہوا ہے، اور اس بارے میں میں نے اپنے اوپر ایک درھم لازم کرلیا ہے، پھر حضرت عمر کے پاس آئے، حضرت عمر نے فرمایا کہ تم اھل حمص کے پاس دراھم زیادہ ہیں، ایک کھجور ٹڈی سے بہتر ہے۔ [مصنف ابن ابي شيبه/كتاب الحج/حدیث: 16346]

حضرت عمر سے اسی طرح منقول ہے۔ [مصنف ابن ابي شيبه/كتاب الحج/حدیث: 16347]

حضرت عبد اللہ بن عمر رضی اللہ عنہما فرماتے ہیں کہ ٹڈی میں ایک مٹھی بھر کر طعام صدقہ کرے گا۔ [مصنف ابن ابي شيبه/كتاب الحج/حدیث: 16348]

حضرت محمد بن علی رحمہ اللہ ‘ حضرت عطاء ‘ حضرت مجا ہد اور حضرت طاؤس فرماتے ہیں کہ جھینگر، ٹڈی، چیونٹی اور چھپکلی کو اگر جان بوجھ کر مار دے تو کھانا صدقہ کرے، اور اگر غلطی سے مار دے تو اس پر کچھ بھی نہیں ہے۔ [مصنف ابن ابي شيبه/كتاب الحج/حدیث: 16349]

حضرت عامر شعبی اور حضرت عبد اللہ بن اسود فرماتے ہیں کہ خواہ غلطی سے ہو یا جان بوجھ کر، وہ کچھ کھانا صدقہ کرے گا۔ [مصنف ابن ابي شيبه/كتاب الحج/حدیث: 16350]

حضرت ابو سلمہ سے مروی ہے کہ حالت احرام میں ایک شخص نے ٹڈی کو مار دیا تو حضرت عبد اللہ بن عمر رضی اللہ عنہما اور ایک دوسرے صاحب نے فیصلہ فرمایا: ان میں سے ایک نے کھجور صدقہ کرنے کا اور دوسرے نے روٹی کا ٹکڑا صدقہ کرنے کا حکم فرمایا۔ [مصنف ابن ابي شيبه/كتاب الحج/حدیث: 16351]