حضرت ابن عمر رضی اللہ عنہما حج یا عمرہ کے لیے مکہ مکرمہ میں داخل نہ ہوتے جب تک ذو طوی (مقام) پر غسل نہ فرما لیتے۔ [مصنف ابن ابي شيبه/كتاب الحج/حدیث: 16332]

حضرت ابن عمر رضی اللہ عنہما جب مکہ مکرمہ میں داخل ہونے کا ارادہ فرماتے تو غسل فرماتے اور دوسروں کو بھی اس کا حکم فرماتے۔ [مصنف ابن ابي شيبه/كتاب الحج/حدیث: 16333]

حضرت عبد الرحمن ابن الاسود کوچ والے دن میں جمرات کی رمی فرماتے پھر واپس منیٰ اپنے سامان کے پاس تشریف لے آتے۔ [مصنف ابن ابي شيبه/كتاب الحج/حدیث: 16334]

حضرت ابوبکر الھذلی فرماتے ہیں کہ میں نے حضرت زہری سے دریافت کیا، کیا آدمی جمرہ عقبہ کی رمی کرنے کے بعد واپس اپنی جگہ آسکتا ہے پھر وہ مکہ مکرمہ چلا جائے؟ آپ نے فرمایا کہ صحابہ کرام رمی کے بعد واپس نہ آیا کرتے تھے، لیکن اگر کوئی شخص ضرورت یا سامان کی وجہ سے واپس آئے تو امید ہے اس پر کوئی حرج نہیں ہوگا اگر اللہ تعالیٰ نے چاہا تو۔ [مصنف ابن ابي شيبه/كتاب الحج/حدیث: 16335]

حضرت عبد اللہ فرماتے ہیں کہ محرم اگر گوہ کو مار دے تو اس پر ایک بڑا پیالہ بھر کر کھانا لازم ہے۔ [مصنف ابن ابي شيبه/كتاب الحج/حدیث: 16336]

حضرت طارق فرماتے ہیں کہ ہم لوگ حج کے لیے گئے، جب ہم راستے میں تھے تو ہم میں سے ایک شخص نے جو حالت احرام میں تھا گوہ کو پاؤں تلے کچل دیا، پھر حضرت عمر کے پاس آیا تاکہ آپ اس کے متعلق فیصلہ فرمائیں، حضرت عمر نے اس سے فرمایا میرے ساتھ مل کر فیصلہ کرو۔ پس دونوں نے بکری کے ایسے بچے کا فیصلہ کیا جس نے پانی اور درخت کو جمع کیا ہو (یعنی چرتی ہو اور پانی پیتی ہو اتنی چھوٹی نہ ہو کہ صرف دودھ پر گزرا کرتی ہو)۔ پھر حضرت عمر نے آیت مبارکہ تلاوت فرمائی کہ { یَحْکُمُ بِہٖ ذَوَا عَدْلٍ مِّنْکُمْ }، (تم میں سے دو عادل لوگ فیصلہ کریں)۔ [مصنف ابن ابي شيبه/كتاب الحج/حدیث: 16337]

حضرت عطاء فرماتے ہیں کہ گوہ کے مارنے پر بکری لازم ہے۔ [مصنف ابن ابي شيبه/كتاب الحج/حدیث: 16338]

حضرت جابر سے مروی ہے کہ حضرت عمر نے بجو پر مینڈھا ذبح کرنے کا فیصلہ فرمایا۔ [مصنف ابن ابي شيبه/كتاب الحج/حدیث: 16339]

حضرت ابن عمر رضی اللہ عنہما فرماتے ہیں کہ محرم اگر بجو کو مار دے تو اس پر اس کی جزاء لازم ہے۔ [مصنف ابن ابي شيبه/كتاب الحج/حدیث: 16340]

حضرت علی رضی اللہ عنہ ارشاد فرماتے ہیں کہ بجو اگر محرم پر حملہ آور ہو تو اس کو مار دے، اور اگر حملہ کرنے سے پہلے ہی اس کو مار دیا تو اس پر بڑی عمر کی (مسنہ) بکری لازم ہے۔ [مصنف ابن ابي شيبه/كتاب الحج/حدیث: 16341]