حضرت عطاء فرماتے ہیں کہ بیت اللہ میں تمام لوگ برابر ہیں۔ [مصنف ابن ابي شيبه/كتاب الحج/حدیث: 16362]

حضرت حسن فرماتے ہیں کہ مکہ مکرمہ اور باہر والے کعبہ میں سب برابر ہیں۔ [مصنف ابن ابي شيبه/كتاب الحج/حدیث: 16363]

حضرت عائشہ رضی اللہ عنہا وادی محسّر میں سواری کو تیز چلاتی تھیں۔ [مصنف ابن ابي شيبه/كتاب الحج/حدیث: 16364]

حضرت ابن عمر رضی اللہ عنہما جب وادی محسّر میں پہنچتے تو سواری کو تیز کرنے کے لیے مارتے۔ [مصنف ابن ابي شيبه/كتاب الحج/حدیث: 16365]

حضرت ابن مسعود وادی محسر میں سواری کو تیز چلاتے۔ [مصنف ابن ابي شيبه/كتاب الحج/حدیث: 16366]

حضرت ابن عباس رضی اللہ عنہما وادی محسر میں سواری کو تیز چلانے میں کوئی حرج نہ سمجھتے تھے اور عرفات کی پہاڑیوں میں ایسا کرنے کو ناپسند سمجھتے تھے۔ [مصنف ابن ابي شيبه/كتاب الحج/حدیث: 16367]

حضرت عقبہ سے مروی ہے کہ وہ حضرت حسین بن علی رضی اللہ عنہ کے ساتھ مزدلفہ سے نکلے، آپ تیز نہیں چلے، جب وادی محسّر میں آئے تو فرمایا کہ آواز بلند کرو اور پاؤں سے ایڑ لگا دو اور کوڑے سے سواری کو مارو، اور آپ وادی میں تیزی سے چلتے رہے، یہاں تک کہ زمین ہموار ہوگئی اور وہ وادی محسّر سے نکل گئے۔ [مصنف ابن ابي شيبه/كتاب الحج/حدیث: 16368]

حضرت عروہ سے مروی ہے کہ حضرت عمر سواری کو تیز کرتے اور یہ اشعار پڑھتے: ”تیری طرف سواری تیز رفتاری سے چلتی ہے، اس کا تنگ ڈھیلا ہو کر ہل رہا ہے۔ اس کے پیٹ میں اس کا بچہ حرکت کرتا ہے، اس کا دین نصاریٰ کے دین سے مختلف ہے۔“ [مصنف ابن ابي شيبه/كتاب الحج/حدیث: 16369]

اور حضرت ابن زبیر رضی اللہ عنہ سواری کو بہت زیادہ تیز چلاتے تھے۔ [مصنف ابن ابي شيبه/كتاب الحج/حدیث: 16371]

حضرت خالد بن ابو عثمان فرماتے ہیں کہ میں نے حضرت عمر بن عبد العزیز کو غیر عربی گھوڑے پر سوار وادی محسّر سے تیز چلتے ہوئے دیکھا۔ [مصنف ابن ابي شيبه/كتاب الحج/حدیث: 16372]