حضرت عثمان بن اسود رحمہ اللہ فرماتے ہیں کہ ایک آدمی کو اپنے بچے کے نسب کے بارے میں شک ہوا تو حضرت عطاء رحمہ اللہ نے اس سے فرمایا کہ اسے حکم دو کہ بچے کو اپنا بچہ قرار دے۔ کیونکہ حضرت عمر بن خطاب رضی اللہ عنہ نے اس بارے میں فرمایا ہے کہ جس نے اس بات کا اقرار کیا کہ اس نے کسی باندی سے جماع کیا ہے تو ہم بچے کو اسی کا قرار دیں گے۔ [مصنف ابن ابي شيبه/كتاب النكاح/حدیث: 18410]

حضرت عثمان بن اسود رحمہ اللہ فرماتے ہیں کہ میں نے اس بارے میں حضرت عکرمہ بن خالد رحمہ اللہ سے سوال کیا تو انہوں نے فرمایا کہ اسے حکم دو کہ بچے کو اپنا بچہ قرار دے۔ [مصنف ابن ابي شيبه/كتاب النكاح/حدیث: 18411]

حضرت عمر بن خطاب رضی اللہ عنہ فرماتے ہیں کہ تم ان باندیوں کی حفاظت کرو (انہیں پاکدامن رکھو) یا نہ کرو، ان میں سے کسی عورت نے اگر تم میں سے کسی کے بستر پر بچے کو جنم دیا تو وہ بچہ اسی کا ہوگا۔ [مصنف ابن ابي شيبه/كتاب النكاح/حدیث: 18412]

حضرت ابو یحییٰ رحمہ اللہ فرماتے ہیں کہ ایک آدمی نے حضرت عبد اللہ بن عباس رضی اللہ عنہما سے سوال کیا کہ اے ابن عباس رضی اللہ عنہما! میں اپنے آلۂ تناسل کو ہاتھ میں لیتا ہوں اور مجھے انزال ہوجاتا ہے اس کا کیا حکم ہے؟ حضرت ابن عباس رضی اللہ عنہما نے فرمایا ”اف، اف! یہ زنا سے بہتر ہے، لیکن باندیوں سے نکاح کرلینا اس سے بہتر ہے۔“ [مصنف ابن ابي شيبه/كتاب النكاح/حدیث: 18413]

حضرت ابن عباس رضی اللہ عنہما فرماتے ہیں کہ مشت زنی کرنے والا اپنے ساتھ بدکاری کرنے والا ہے۔ [مصنف ابن ابي شيبه/كتاب النكاح/حدیث: 18414]

حضرت ابن عمر رضی اللہ عنہما سے مشت زنی کے بارے میں سوال کیا گیا تو انہوں نے فرمایا کہ وہ اپنے ساتھ بدکاری کرنے والا ہے۔ [مصنف ابن ابي شيبه/كتاب النكاح/حدیث: 18415]

حضرت قاسم رحمہ اللہ سے قرآن مجید کی اس آیت کے بارے میں سوال کیا گیا: ”جو لوگ اپنی شرم گاہوں کی حفاظت کرتے ہیں، سوائے اپنی باندیوں اور بیویوں کے کہیں شہوت پوری نہیں کرتے، اس بارے میں وہ قابل ملامت نہیں ہیں۔ جو لوگ اس حد سے تجاوز کریں تو وہ سرکشی کرنے والے ہیں“ اس پر حضرت قاسم رحمہ اللہ نے فرمایا کہ جو باندیوں اور بیویوں کے علاوہ کہیں شہوت پوری کریں تو وہ سرکشی کرنے والے ہیں۔ [مصنف ابن ابي شيبه/كتاب النكاح/حدیث: 18416]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے نکاح شغار سے منع فرمایا ہے۔ ابن نمیر رحمہ اللہ فرماتے ہیں کہ نکاح شغار یہ ہے کہ ایک آدمی کہے کہ تو اپنی بیٹی سے میری شادی کرا دے میں اپنی بیٹی سے تیری شادی کرادیتا ہوں یا اپنی بہن سے میری شادی کرادے میں اپنی بہن سے تیری شادی کرادیتا ہوں۔ [مصنف ابن ابي شيبه/كتاب النكاح/حدیث: 18417]

حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے نکاح شغار سے منع فرمایا ہے۔ [مصنف ابن ابي شيبه/كتاب النكاح/حدیث: 18418]

حضرت ابن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے نکاح شغار سے منع فرمایا ہے۔ [مصنف ابن ابي شيبه/كتاب النكاح/حدیث: 18419]